1SAI koya o qo na vosa sa vosataka ko Jiova na kei Papiloni kei na kena na vanua ni kai Kalitea, ia ko Jeremaia na parofita sa tukuna.
2Dou tukuna e na veimatanitu, ka vakarogotaka, ka vakaduria na drotini; dou vakarogotaka, kakua ni vunia: dou kaya, Sa kabai ko Papiloni, sa taqaya ko Peli, sa ramusu sara ko Mirotaki; sa taqaya na nona ka veivakaocataki, sa ramusu sara na nona matakau.
3Ni sa lako cake mai vei koya e dua na matanitu mai na mata ni tokalau, ena vakalalataka ko koya na nodra vanua, ia ena sega e tiko kina: o ira na tamata kei na manumanu talega era na yavalati, era na lako tani yani.
4E na veisiga ko ya, kei na gauna ko ya, sa kaya ko Jiova, era na lako mai na luve i Isireli, o ira vata kei na luve i Juta, era na lako tu mai ka tagi lako, ia ko Jiova na nodra Kalou era na vakasaqara.
5Na sala ki Saioni era na taroga, ka vagolea kina na matadra, ka kaya, Me da mai laʼki ia na veivauci kei Jiova e na veiyalayalati tawa mudu ena sega ni guilecavi.
6Na sipi sa yali na noqu tamata: o ira na nodrai vakatawa era sa vakasesei ira, ki na veiulu-ni-vanua era sa vakalesui ira tani: era sa veilakoyaki tu mai na ulu-ni-vanua ki na ulu-ni-vanua, era sa guilecava na nodrai vakavakacegu.
7O ira kece sa kunei ira, sa kani ira ga: ia na nodra meca era sa kaya, Keimami sa tawa cala ga! ni ra sai valavala ca vei: Jiova, nai tikotiko ni lewa dodonu, kei na ka ka vakararavi kina ko ira na nodra qase, io ko Jiova.
8Dou yavala ka lako tani mai na loma i Papiloni, ia mai na nodra vanua na kai Kalitea, dou lako tani maikina, mo dou vaka ga na koti tagane sa liutaka na qele ni koti.
9Ni sai au, raica, ena vakatura ka vakalakova cake ki Papiloni nai vavakoso matanitu lelevu mai na vanua mai na tokalau: a ra na tuvai valu vua, ka laʼki kaba sara: a nodra gasau, ena vaka na nona na daudakai matua; ena tabu cala sara e dua.
10Ia ko Kalitea, ena yaco mei toki ni valu: o ira kece era tokitaki koya, era na vakamamautaki ga; sa kaya ko Jiova.
11Ni dou a marau, ni dou a rereki, oi kemudou sa vakacacana na noqui votavota, ni dou sa tubu me uro me vaka na luve ni karavau e na co, ka tagi me vaka na ose;
12o koya sa taqaya vakalevu kina ko koya na tinamudou; ena madua ko koya ka vakasucumi kemudou: raici koya na kedrai murimuri na veimatanitu, ni sa lekutu, ka vanua dravuisiga, ka veikau.
13E na vuku ni cudru i Jiova ena sega kina ni tawa, ena lala sara ga ko koya: o ira kece era lako voli yani ki Papiloni, era na kidacala ga ka vakasiusiu e na vuku ni kena ca levu kecega.
14Dou tuvai valu kei Papiloni ka vakavolivolita: oi kemudou kece sa dauyavia na dakai, dou vanai koya, kakua ni maninitaka na gasau: ni sai Jiova sai valavala ca kina ko koya.
15Dou kailavaka vua mai na veiyasana: Sa gu ca mai ko koya: sa bale na kena bai kaukauwa, sa talaraki sobu na kena bai: ni sa veisaumi i Jiova o qo: dou saumi kemudou vua, me vaka na ka sa cakava ko koya, dou cakava vakakina vua:
16dou muduki koya tani mai Papiloni e sa daukaburaka na sila, kei koya sa dautarai sele-takelo e na vula i matua: e na vuku ni seleiwau kaukauwa, era na dui gole yadua ki na kai nona, ka dui dro yadua ki na nona vanua.
17Na sipi dau vakasevi ko Isireli; o ira na laioni era sa vakasevi koya: a kenai liuliu ka kani koya, ko tui Asiria; a kenai murimuri sa musuka na suina, ko Nipukatiresari na tui Papiloni o qo.
18O koya sa vosa vakaoqo kina ko Jiova ni lewe vuqa, na Kalou nei Isireli; Raica, au na cudruvi tui Papiloni kei na nona vanua, me vaka niʼu a cudruvi tui Asiria.
19Ia kaʼu na kauti Isireli tale mai ki na nonai tikotiko, ena kana ko koya mai Karimeli kei Pasani, ia e na ulu-ni-vanua ko Ifireimi kei Kiliati ena vakamamautaki kina na yalona.
20E na veisiga ko ya, kei na gauna ko ya, sa kaya ko Jiova, ena qarai na nodra caka cala na Isireli, ia ena sega ga; kei na nodrai valavala ca na Juta, ia ena tawa kune: niʼu na tawa cudruvi ira kaʼu sa vakavoca.
21Ia ki na vanua gaga sara mo lako cake kina, o koya kei na lewena, mo cudruvi ira ga: mo vakarusa ka vakawabokotaka sara, sa kaya ko Jiova, ia mo cakava ga me vaka na ka kece kaʼu sa vakarota vei iko.
22A domo ni valu sa rogo e na vanua, ia na veivakarusai levu.
23Sa tamusuki vakaidina, ia sa musuki nai tukituki kei vuravura kecega! sa vakalalataki vakaidina mai ko Papiloni e na maliwa ni veimatanitu!
24Au a cakava na kemui cori, ia ko sa coriti talega, Papiloni, ia ko iko, ko a tawa kila ga: ko sa kune, ka sa toboki talega, ni sai Jiova ko sa bole mai kina.
25Sa dolava ko Jiova na vale ni nonai yaya, a sa kauta mai nai yaragi ni nona cudru: ni sa cakacaka ni Turaga ko Jiova ni lewe vuqa o qo, e na nodra vanua na kai Kalitea.
26Dou lako mai vei koya mai na veiyalayala, dolava na nona lololo: kelei koya me vaka nai soqosoqo, ka vakawabokotaki koya sara: me kakua na nona ka e vo;
27vakamatei ira kece na nona karavau; me ra lako sobu ga ki na veivakamatei: ule ko ira! ni sa yaco mai na kedra siga, na gauna me ra cudruvi kina.
28A domodra era sa dro ka se tani mai na vanua vaka-Papiloni, me tukuna yani ki Saioni na veisaumi nei Jiova na noda Kalou, na veisaumi ni nona vale tabu!
29Kacivi ira mai ki Papiloni era dauvanavana: oi kemudou kece sa yavia na dakai, dou mai bukutaka na kena lawa; me kakua e dro bula: dou sauma vua me vaka na nona cakacaka; me vaka na ka kece sa cakava, dou cakava vakakina vua: ni sai Jiova sa yalovosalevu kina ko koya, io vei Koya na Yalosavasava nei Isireli.
30O koya o qo era na bale kina na nona cauravou e nai saqata ni koro, ia ko ira kece na nona tamatai valu era na muduki tani e na siga ko ya, sa kaya ko Jiova.
31Raica, edaru sa veimecaki kei iko na yalovosalevu, sa kaya na Turaga ko Jiova ni lewe vuqa: ni sa yaco mai na kemu siga, na gauna kaʼu na cudruvi iko kina.
32Ia ena toqi ko koya na yalovosalevu, ka bale, ka sega me na vakaduri koya cake tale: ia kaʼu na tutuvaka na buka e na nona veikoro, ena kati ira kece era tiko voliti koya.
33Sa vosa vakaoqo ko Jiova ni lewe vuqa; Era a vakasaurarataki vata na luve i Isireli kei na luve i Juta: ia ko ira kece era a vakabobulataki ira era sa tauri ira matua; era a bese ni laivi ira me lako.
34A nodrai Vakabula, sa kaukauwa; o Jiova ni lewe vuqa na yacana: ena ia vakaidina ko koya na veilewai e na vukudra, me vakasaututaka na vanua, ka vakayavalataki ira na kai Papiloni.
35Ai seleiwau, sa tau mai vei ira na kai Kalitea, sa kaya ko Jiova, vei ira talega na kai Papiloni, kei ira na kena turaga, kei ira na kena tamata vuku.
36Ai seleiwau, sa tau mai vei ira na daulasu; a ra na yalosese mai: ai seleiwau, sa tau mai vei ira na kena tamata qaqa; a ra na taqaya.
37Ai seleiwau, sa tau mai ki na nodra ose, kei na nodra vale-vodoki, kei ira kece na tamata era dui kaikai era tiko kaya; a ra na yalovakaalewa mai: ai seleiwau, sa tau mai ki na nonai yau; ia ena vakayanaki.
38A dausiga, sa tauca na mena wai; ia ena di mai: ni sa vanua ni matakau ceuceu ko ya, ia e na nodra ka veivakarerei era sa yalosese kina.
39O koya o qo ena tiko vata kina na manumanu ni lekutu kei na koli kila, ena tiko kina talega na lulu: ena sega ni tawa tale e na dua sara na gauna; ena sega ni tikori tale e na dua sara nai tabatamata.
40Me vaka na Kalou, ni sa vakarusai Sotoma kei Komora, kei na veikoro ka tu voleka kina, sa kaya ko Jiova, ena vakakina, ena sega ni tiko tale maikea e dua na tamata, ena sega talega ni vakatawa tale e dua na luve ni tamata.
41Raica, e dua na mataqali, ena lako mai na mata ni tokalau; ia e dua na matanitu levu, kei na tui e vuqa, ena vakaturi cake mai nai yalayala kei vuravura:
42a dakai kei na moto, era na lukuta; era sa yalokaukauwa, a ra na tawa yalololoma: a domodra, ena vadugu me vaka na Wasawasa; era na vodo tu e na ose, ka lautuva vakaivalu, me ia nai valu vei iko, na gonealewa ni Papiloni.
43Sa rogoca ko tui Papiloni na kedrai rogorogo, a sa malumalumu mai na ligana: a rarawa, sa tauvi koya; kei na yaluma, me vaka na alewa sa taratara.
44Raica, ena lako cake mai ko koya, me vaka na laioni mai na Joritani ni sa vuabale, ki nai tikotiko i koya sa kaukauwa: ia kaʼu na sauriva walega ka cakavi ira me dro tani maikina: ia ko cei na tamata digitaki meʼu lesia me kena turaga? ni sai cei me tautauvata kei au? se ko cei me na lokuca mai vei au na bose? se ko cei nai vakatawa ko ya me na tu mai e mataqu?
45O koya o qo dou rogoca kina na lewa i Jiova, sa bosea ko koya me yacovi Papiloni; kei na ka e sa nakita, sa nakita ko koya me tauca na nodra vanua na kai Kalitea: O iratou dina eratou lalai sara e na qele ni sipi ena yarataki ira ga: ena cakavi iratou dina ko koya me vakalalataka na nodrai tikotiko.
46Ni sa rorogo ni sa kabai ko Papiloni, sa yavavala ko vuravura; ia na nodra tagi, sa rogo yani ki na veimatanitu.
Who We AreWhat We EelieveWhat We Do
2025 by iamachristian.org,Inc All rights reserved.
