Ai Vola I Jeremaia Na Parofita 21 - AI VOLA TABU（FIJ1864）

O Sitikiya, sa talaki kivei Jeremaia me taroga e na vuku ni valu i Nipukatiresari, 1, 2. O Jeremaia sa parofisaitaka na ka rarawa levu ena yaco kina, 3-7. Sa vakavulici ira na tamata me dro vei ira na kai Kalitea, 8-10; ka sa vunauci ira na mataqali i tui Juta, 11-14.

1A VOSA ka yaco vei Jeremaia maivei Jiova, ni sa talai rau vua ko Sitikiya na tui, io ko Pasuri na luve i Melikia, kei Sifaniya na luve i Meeseya na bete, me rau kaya,

2Mo tarogi Jiova mada e na vukuda, ni sai valu mai vei keda ko Nipukatiresari na tui Papiloni, de na cakacaka beka mai vei keda ko Jiova me vaka na nona cakacaka vakurabui kecega, me sa lako cake tani mada ga vei keda ko koya.

3Sa qai kaya vei rau ko Jeremaia, Drau vosa vakaoqo vei Sitikiya:

4Sa vosa vakaoqo ko Jiova na Kalou nei Isireli; Raica, au na vakalesuya tani nai yaragi ni valu e na ligamudou, a ya dou sa veivaluti kina kei tui Papiloni, kei ira na kai Kalitea, era mai kabai kemudou mai daku ni bai, ia kaʼu na vakasoqoni ira mai ki loma ni koro.

5Ia kaʼu na veivala kei kemudou koi au e na liga e dodo yani, kei na liga kaukauwa, io e na cudru, kei na lesa, kei na cudru levu.

6Ia kaʼu na yaviti ira na lewe ni koro o qo, na tamata kei na manumanu: e na mate dauveitauvi era na mate ga kina:

7ni sa oti o qori, sa kaya ko Jiova, kaʼu na soli Sitikiya na tui Juta, kei ira na nonai talatala, kei ira na tamata, kei ira sa vo e na koro o qo mai na mate dauveitauvi, kei nai seleiwau, kei na viakana, ki na liga i Nipukatiresari na tui Papiloni, kei na ligadra na nodra meca, kei na ligadra era qarai ira me ra vakamatea: ia ena yaviti ira ko koya e na bati ni seleiwau; ena sega ni vosoti ira, ena sega talega ni yalovinaka, se yalololoma.

8Ia vei ira na tamata o qo mo kaya, Sa vosa vakaoqo ko Jiova; Raica, au sa tauca e na matamudou na sala ni bula, kei na sala ni mate:

9o koya sa tiko e na koro o qo ena mate e nai seleiwau, kei na mate dauveitauvi: ia ko koya sa curu kitautuba, ka dro vei ira na kai Kalitea era mai kabai kemudou, ena bula, ena soli vua na nona bula me nonai toki ni valu:

10niʼu sa vaqara na mataqu ki na koro o qo me ca, me kakua ni vinaka, sa kaya ko Jiova: ki na liga i tui Papiloni ena soli ga kina, ia ena vakama e na buka ko koya.

11Ia e na vuku ni mataqali i tui Juta, mo kaya, Dou rogoca na vosa i Jiova;

12Oi kemudou na mataqali i Tevita, sa vosa vakaoqo ko Jiova; Dou ia na lewa dodonu e na mataka, ka vakabulai koya sa vakacacani mai na liga i koya sa vakacacana, de lako yani, me vaka na buka, na noqu cudru, ka waqa, me sega e dua e bokoca, e na vuku ni ca ni nomudoui valavala.

13Raica, au sa veivala kei iko, o iko sa tiko o na buca, o na uluvatu ni buca, sa kaya ko Jiova; oi kemudou sa kaya, O cei me na lako sobu me mai kabai keimami? se ko cei me mai curu ki na neimami tikotiko?

14Ia kaʼu na cudruvi kemudou me vaka na vua ni nomudoui valavala, sa kaya ko Jiova: ia kaʼu na tutuvaka na buka e na kena veikau, ena kania na ka kecega sa tu vakavolivolita.