Ai Vola I Jeremaia Na Parofita 20 - AI VOLA TABU（FIJ1864）

O Pasuri, ni sa yaviti Jeremaia, sa lewai sara me cudruvi kina, 1-6. O Jeremaia, ni sa rarawa na lomana, sa tagicaka vua na Kalou; ni sa vakalialiai, ka vereti, sa cata kina na siga ni nona sucu, 7-18.

1IA ko Pasuri na luve i Imeri na bete, o koya na turaga sa liu e na vale i Jiova, sa rogoca ni sa parofisaitaka na ka o qo ko Jeremaia.

2A sa yaviti Jeremaia na parofita ko Pasuri, ka vesuki koya e nai vesu kau sa tu mai na matamata-ni-koro cecere i Penijamini, sa volekata na vale i Jiova.

3Ia e na sabogibogi, sa qai kauti Jeremaia ko Pasuri mai nai vesu kau. Sa qai kaya vua ko Jeremaia, Sa sega ni Pasuri sa vakatoka ko Jiova me yacamu, ia ko Mekori-misapipi ga.

4Ni sa vosa vakaoqo ko Jiova, Raica, au na cakavi iko mo ka rerevaki vei iko, vei ira kece talega na wekamu: ia era na bale e nai seleiwau ni nodra meca, a matamu talega ena kunea: ia ko ira na Juta kecega kaʼu na solia ki na ligai tui Papiloni, ena kauti ira vakabobula ki Papiloni, ka vakamatei ira e nai seleiwau.

5Ia kaʼu na solia na kaukauwa kecega ni koro o qo, kei na kena cakacaka kecega, kei na kena ka talei kecega, ia na nodrai yau kece talega na tui Juta kaʼu na solia ki na liga ni nodra meca, a ra na tokitaka, ka taura, ka kauta ki Papiloni.

6Ia ko iko, Pasuri, kei ira kece era tiko e na nomu vale, dou na laʼki bobulataki: ia dou na yaco ki Papiloni, ia maikea talega dou na mate kina, ka maikea dou na bulu kina, ko iko, kei ira kecega na wekamu, ko sa parofisaitaka kina na ka lasu.

7I Jiova, ko sa rawai au sara, ia kaʼu sa rawai sara kina, ko sa kaukauwa vei kedaru, ka sa gumatua mai: au sa dredrevaki e na veisiga, era sa vakalialiai au kecega.

8Ia niʼu a sa qai vosa, kaʼu sa qolou, nai valavala kaukauwa kei na veivakacacani kaʼu sa kacivaka; ka ni sa yaco na vosa i Jiova me ka kaʼu sa rogo ca kina, ka dredrevaki kina e na veisiga.

9Au a qai kaya, Au na sega ni cavuti koya, se vosa tale e na yacana. Ia na nona vosa, sa qai e lomaqu me vaka na buka, sa sogo tu e loma ni suiqu, ia kaʼu sa oca ni kinoca, ka tawa rawata.

10Niʼu sa rogoca na nodra vosa ca na lewe vuqa, sa vakavolivoliti au na rere. Era kaya, Dou tukuna mai, ia keitou na qai tukuna. O ira kece na wekaqu era sa yadrava na noqu bale, ka kaya, Ena vecei beka ko koya, keimami na qai rawai koya, ka saumi keda vua.

11Ia ko Jiova ga sa tiko kei au me vaka e dua na qaqa rerevaki: o koya o qo era na tarabe kina era sa vakacacani au, a ra na sega ni gumatua: era na madua vakalevu; ni ra na tawa cakacaka yaco: a nodra madua tawa mudu ena tawa guilecavi.

12Ia, ko iko Jiova ni lewe vuqa, sa vakatovolea na yalododonu, ka dikeva nai ivi kei na loma ni tamata, meʼu raica mada na nomu cudruvi ira: ni sa vei iko kaʼu sa tukuni au kina.

13Dou meke vei Jiova, vakavinavinaka vei Jiova: ni sa vakabula na yalo i koya sa dravudravua mai na ligadra na daucaka ca.

14Me ca na siga kaʼu a sucu kina: na siga sa vakasucumi au kina ko tinaqu, me kakua ni kalougata.

15Me ca na tamata sa tukuna vei tamaqu, ka kaya, Sa sucu vei iko na goneatagane: ka vakamarautaki koya sara.

16Ia na tamata ko ya me vaka ga na Veikoro ka vukica ko Jiova, ka tawa veivutuni: ia me rogoca ko koya na kaila e na sabogibogi, kei na qoqolou e na siga levu;

17e na vuku ni sa tawa vakamatei au mai na kete; me sa noqui bulubulu ga ko tinaqu, io na ketena me sa colati au tikoga.

18A cava kaʼu sa lako mai kina mai na kete meʼu kunea na oca kei na rarawa, me oti ga kina na noqu siga e na madua?