Meke 135 - AI VOLA TABU（FIJ1864）

Sa vakarota vei ira na tamata i Jiova me vakavinavinaka vua ni sa nodra Kalou o koya sa dauvakabulai ira, ka sa daucudruvi ira na nodra meca.

1DOU ia vei Jiova na vakavinavinaka.

Dou ia ki na yaca i Jiova na vakavinavinaka; dou ia na vakavinavinaka, oi kemudou na tamata i Jiova.

2Oi kemudou sa tiko e na vale i Jiova, e na veilomanibai ni vale ni noda Kalou.

3Dou ia na vakavinavinaka vei Jiova: ni sa yalovinaka ko Jiova; dou meketaka na yacana; ni sa ka kamikamica.

4Ni sa digitaki ira na Jekope ko Jiova me nona, ia na Isireli me nonai yau talei.

5Niʼu sa kila sa levu ko Jiova, ia na noda Turaga sa sivia na kalou kecega.

6A ka kecega sa vinakata ko Jiova, sa cakava ga mai lomalagi, kei vuravura, e na wasawasa, kei na wai titobu kecega.

7Sa cakava na kabukabu me lako cake mai nai yalayala kei vuravura; sa cakava na livaliva me tau kina na uca; sa kauta mai na cagi mai na nona lololo.

8O koya ka yavita na ulumatua mai Ijipita, na tamata kei na manumanu talega.

9Sa tala nai vakatakilakila kei na ka vakurabui e na loma ni nomu vanua, Ijipita, vei Fero, kei ira na nona tamata.

10O koya ka mokuta na veimatanitu lelevu, ka vakamatei ira na tui kaukauwa;

11ko Sioni na nodra tui na luve i Amori, kei Oki na tui Pasani, kei na veimatanitu kecega mai Kenani:

12a sa solia na nodra vanua mei votavota, me nodrai votavota na nona tamata na Isireli.

13A yacamu, Jiova, sa na tawa oti; ia na kemui vakananumi, Jiova, ki nai tabatamata kecega.

14Ni na lewai ira na nona tamata ko Jiova, ena veivutuni talega e na vukudra na nona tamata.

15A nodra matakau na veimatanitu na siliva kei na koula, a cakacaka ni liga ni tamata.

16Era sa vakagusuna, a ra sa sega ni vosa rawa; era sa vakamatana, a ra sa sega ni rai rawa;

17era sa vakadaligana, a ra sa sega ni rogo rawa; a sa sega na cegucegu e na gusudra.

18O ira era sa cakava era na tautauvata kei ira; o ira kece talega era sa vakararavi vei ira.

19Dou vakavinavinaka vei Jiova, na mataqali i Isireli: dou vakavinavinaka vei Jiova, na mataqali i Eroni:

20dou vakavinavinaka vei Jiova, na mataqali i Livai: oi kemudou sa rerevaki Jiova, dou vakavinavinaka vei Jiova.

21Me vakavinavinakataki ko Jiova mai Saioni, o koya sa tiko mai Jerusalemi. Dou ia vei Jiova na vakavinavinaka.