Meke 84 - AI VOLA TABU（FIJ1864）

Sa gadreva vakalevu me lako ki na vale ni Kalou.Vua na Domo-ni-meke e na Kitica. A nodra Meke na luve i Kora.

1A KA domoni vakaidina na nomui tikotiko, Jiova ni lewe vuqa!

2Sa domona vakalevu na yaloqu, ia sa mate e na via tiko e na lomanibai i Jiova: sa tagica na Kalou bula na lomaqu kei na lewequ.

3Io, sa kunea na vale na sivaro, kei na kakabace na nonai su, me vakotora kina na luvena, io, na nomui cabocabo-ni-soro, Jiova ni lewe vuqa, na noqu Tui, kei na noqu Kalou.

4Sa kalougata ko ira era tiko vakadua e nomu vale: era sa ia tiko na vakavinavinaka vei iko. Sela.

5Sa kalougata na tamata ko sa nona kaukauwa; a sa tiko e lomana na nomu sala.

6Ni sa daulako e na Buca ni Wai-ni-mata sa cakava kina nai keli-wai: a sa sinai mai na uca e nai keli.

7Era sa lako mai na kaukauwa ki na kaukauwa; a ra sa dui rairai e na mata ni Kalou mai Saioni.

8I Jiova na Kalou ni lewe vuqa, rogoca na noqu masu: mo vaqara daligamu mai, na Kalou i Jekope. Sela.

9Mo rai mai, na Kalou, na neimami sasabai, ka raica na matana ko a lumuta.

10Ni sa vinaka na siga e dua e nomu lomanibai ka ca na siga e udolu e na tikina tani. Ia kaʼu sa vinakata niʼu sa tiko e nai lago ni vale ni noqu Kalou, ka cata niʼu sa tiko e nodra veivale nai valavala ca.

11Ia na Kalou ko Jiova na siga kei nai sasabai: ena solia ko Jiova na loloma kei na vakarokoroko: ena sega ni bureitaka e dua na ka vinaka vei ira era sa lako vakadodonu.

12I Jiova ni lewe vuqa, sa kalougata na tamata sa vakararavi vei iko!