Meke 48 - AI VOLA TABU（FIJ1864）

Ai tukutuku kei Jiova, kei Jerusalemi na nonai tikotiko.A Meke kei na Sere na nodra na luve i Kora.

1SA levu ko Jiova, me vakavinavinakataki vakalevu e na koro ni noda Kalou, na nona ulu-ni-vanua tabu.

2Sa toka vinaka sara, a nodra marau na kai vuravura kece, na ulu-ni-vanua ko Saioni, e na yasana sa donuya na tokalau; na koro i koya na Tui levu.

3Sa kilai ko Jiova e na kena veivale vakaturaga mei drodro.

4Raica, era sa soqoni vata na tui, era lako vata yani.

5Era raica, ka ra kurabui kina; era kidroa, ka dro tani yani.

6Sa tauvi ira kikea na rere, kei na rarawa, me vaka na alewa sa taratara.

7O sa vorolaka na waqa ni Tarisisi e na cagi mai cake.

8Me vaka na ka keimami rogoca, keimami sa raica vakakina, e na koro i Jiova ni lewe vuqa, e na koro ni noda Kalou: ena vakataudeitaka na Kalou me tawa oti rawa. Sela.

9Keimami a veinanuyaka na nomu yalololoma, na Kalou, e loma ni nomu vale ni soro.

10Me vaka na yacamu, na Kalou, sa vakakina na vakavinavinaka me ia vei iko ka yacova nai yalayala kei vuravura: sa sinai na ligamu i matau e na cakacaka dodonu.

11Me mani reki na ulu-ni-vanua ko Saioni, me ra mani marau na gonealewa ni Juta, e na vuku ni nomu lewa.

12Dou lako voli mai Saioni, ka vakavolivolita: wilika na kena veivale-cecere.

13Vakaraica vinaka na kena bai, vakananuma na kena veivale vakaturaga; mo dou tukuna ki nai tabatamata e muri mai.

14Ni sa noda Kalou ka tawa mudu na Kalou o qo: ena tuberi keda ko koya ka yacova na noda mate.