Meke 42 - AI VOLA TABU（FIJ1864）

A masu ni tamata sa vakacacani e na vuku ni valavala dodonu.Vua na Domo-ni-meke. A Masikili, a nodra na luve i Kora.

1ME vaka sa tagicaka na wai drodro na koti kila, sa vakakina na yaloqu ni sa tagicaki iko, noqu Kalou.

2Sa viagunu vua na Kalou na yaloqu, io vua na Kalou bula: au na lako mai ninaica ka rairai e na mata ni Kalou?

3A qau kakana tiko na wai ni mataqu e na siga kei na bogi, ni ra sa kaya tikoga vei au, Evei na nomu Kalou?

4Niʼu sa nanuma na ka o qo, kaʼu sa livia vakai au na yaloqu: niʼu a lako vata kei na le vuqa, au a lako vata kei ira ki na vale ni Kalou, e na domo ni reki kei na vakavinavinaka, kei ira na le vuqa era ia na solevu.

5Na yaloqu, o sa bibi lako e na vuku ni cava? se na vuku ni cava ko sa nuiqawaqawa e lomaqu? mo namaka na Kalou, niʼu na vakavinavinaka tale vua, ni sa noqu vu ni bula na matana.

6Noqu Kalou, sa bibi lako na yaloqu e lomaqu: o koya o qo kaʼu na nanumi iko kina e na vanua mai Joritani kei na nodra na kai Erimoni, mai na ulu-ni-vanua ko Maisari.

7Sa kaciva na wasa liwa na wasa liwa ni sa kere na nomu savu: sa sevi au na nomu biau sese kece kei na nomu biau tubu kecega.

8Ia ena lewa ga ko Jiova na nona yalololoma me yaco mai kei na siga, ia kei na bogi ena tu ga vei Jiu na nona meke, kei na noqu masu vua na Kalou ni noqu bula.

9Au na kaya vua na Kalou na noqu vatu tu, O sa guilecavi au e na vuku ni cava? a cava kaʼu lako voli kina ka tagi ni sa vakasaurarataki au na meca?

10Me vaka nai seleiwau e na suiqu, era vakasewasewani au na noqu meca; ni ra tarogi au e na veisiga, Evei na nomu Kalou?

11Na yaloqu, o sa bibi lako e na vuku ni cava? o sa nuiqawaqawa e lomaqu e na vuku ni cava? mo namaka na Kalou; niʼu na vakavinavinaka tale vua, na vu ni bula ni mataqu kei na noqu Kalou.