Meke 40 - AI VOLA TABU（FIJ1864）

A nona vakamolimoli na tamata sa qai vakabulai mai na nonai valavala ca.Vua na Domo-ni-meke. A Meke i Tevita.

1AU a daunamaki Jiova sara; a sa vakatu daligana vei au, ka rogoca noqu tagi.

2Sa tuberi au cake talega mai nai keli e rorogo rerevaki, mai na qele lolobo talega, a sa vakatura na yavaqu e na dela ni Uluvatu, ka vakataudeitaka na noqui lakolako.

3A sa vulica na gusuqu e na meke vou, na vakavinavinaka vua na noda Kalou: era le vuqa ena raica, ka rere, ka vakararavi vei Jiova.

4Sa kalougata na tamata sa dauvakararavi vei Jiova, a sa gole tani vei ira na yalolevu, vei ira talega era lesu tani ki na daulasu.

5I Jiova noqu Kalou, e vuqa na nomu cakacaka vakidacala ko sa cakava, kei na nomu nanuma vei keimami: e dredre me wilika vakadodonu vei iko: kevaka kaʼu via vakatusa ka tukuna, e dredre ni wiliki.

6Ai soro kei nai madrali ko a sega ni vinakata; o sa culabasika na daligaqu: ai soro kama kei nai soro ni valavala ca ko sa sega ni rotaka.

7Au a qai kaya, Raica, au sa lako mai, au a volai e nai vola vivigi,

8au sa reki meʼu kitaka na ka ko sa vinakata, noqu Kalou: io, na nomu vunau sa tu e na vu ni yaloqu.

9Au a vunautaka na keivavadonui e nai soqosoqo levu: raica, ko sa kila ga, Jiova, niʼu sa sega ni kinoca e na tebenigusuqu.

10Au a sega ni vunia e lomaqu na nomu veivakadonui; au a tukuna ga na nomu dina kei na nomu veivakabulai: au a sega ni vunia na nomu yalololoma kei na nomu dina maivei ira nai soqosoqo levu.

11O iko talega, Jiova, kakua ni bureitaka vei au na nomu yalololoma: me maroroi au tikoga na nomu loloma kei na nomu dina.

12Ni sa voliti au na ka ca sa tawa wili rawa: sa vauci au na noqui valavala ca, kaʼu sa sega ni ta cake rawa kina; sa vuqa o qori ka lailai na drau ni uluqu: o koya sa waicala kina na yaloqu.

13Mo lomavinaka, Jiova, me vakabulai au: i Jiova, mo kusarawa mai me vukei au.

14Me ra madua ka veiseseyaki vata era qara na yaloqu me ra vakarusa; me ra vakaisuka nadaku ka vakamaduataki era gadreva tiko meʼu vakacacani.

15Me ra qeavu mei sau ni nodra veivakamaduataki era sa kaya vei au, Sai koya! Sai koya!

16Ia ko ira kecega era qarai iko, me ra reki ka marautaki iko: kei ira sa vinakata na nomu veivakabulai me ra kaya tiko, Me vakalevui ko Jiova.

17Ia koi au kaʼu sa dravudravua ka luveniyali: ia ka sa vakananumi au na Turaga: o iko na noqu veivuke kei na noqui vakabula; kakua ni berabera, noqu Kalou.