Meke 32 - AI VOLA TABU（FIJ1864）

Sa kalougata na tamata ni sa sega ni cudruvi koya na Kalou e na vuku ni valavala ca, 1, 2. A sa yaga me da vakatusa na nodai valavala ca me lomani keda na Kalou, me da marau kina, 3-11.A Meke i Tevita. A Masikili.

1SA kalougata ko koya sa bokoci na nonai valavala ca, a sa ubi na nona caka cala.

2Sa kalougata na tamata sa sega ni okata vua ko Jiova nai valavala ca; a sa sega na dauveivakaisini e na yalona.

3Niʼu sa galu tiko, sa vuca na suiqu e na vuku ni noqu vutugu e na siga ka bogi mai.

4Ni sa bibi vei au na ligamu e na siga kei na bogi; sa matalia na kequ drokadroka me ka e raqosa e na vula i katakata. Sela.

5Au a vakatusa vei iko na noqu caka cala, ia kaʼu sa sega ni vunia na noqui valavala ca. Au a kaya, Kaʼu na vakatusa vei Jiova na noqui valavala ca; ia ko sa qai kauta tani na kena ca na noqui valavala ca. Sela.

6E na vuku ni ka o qo ena masu kina vei iko na tamata yalododonu kecega e na gauna ko na kune rawa kina; e dina, ni sa waluvu na wai levu ena sega ni torovi koya.

7O iko na noqui vunivuni; ko na maroroi au mai na ka rarawa; ko na vakavolivoliti au e na meke ni bula. Sela.

8Au na vakavulici iko ka vakatakila vei iko na sala mo lako kina: kaʼu na vakavulici iko; ena wanonovi iko na mataqu.

9Dou kakua ni vaka na ose, se na asa, sa tawa vuku rawa; e tarovi ga na gusudrau e na kaukamea kei nai tarovi, de rau bese ni torovi iko mai.

10Ena levu na nodra ka rarawa na tamata ca; ia ko koya sa vakararavi vei Jiova, ena vakavolivoliti koya na loloma.

11Dou marautaki Jiova, ka reki, koi kemudou na yalododonu: dou qoqolou e na marau, koi kemudou kecega sa yalodina.