Meke 22 - AI VOLA TABU（FIJ1864）

Sa tagi vua na Kalou ko Tevita ni sa vakararawataki ka rere, 1-10, masu vua, 11-21. Sa qai vakavinavinaka, 22-31.Vua na Domo-ni-meke e na Aijeleca Saara. A Meke i Tevita.

1NOQU Kalou! noqu Kalou! o sa biuti au e na vuku ni cava? a cava ko sa yawa kina ka tawa vakabulai au, se rogoca na vosa ni noqu tagi?

2Noqu Kalou! au sa kaci e na siga, ia ko sa sega ni rogo mai; kei na bogi talega, ia kaʼu sa sega ni vakacegui.

3Ia ko sa yalosavasava ga, ko iko sa tiko kei na nodra dauvakavinavinaka na Isireli.

4Sa vakararavi vei iko ko ira na tama i keitou: era a vakararavi vei iko, ia ko a vakabulai ira.

5Era a qoqolou vei iko, a ra sa vakabulai: era a vakararavi vei iko, a ra sa tawa vakamaduataki.

6Ia koi au na baca, ka sega ni tamata; a ka era vakasewasewana na tamata, a ra sa beca ko ira na lewe vuqa.

7Era sa dredrevaki au ko ira kece era sa raici au: era vaka-be gusu, era sa kuretaka na uludra, ka kaya,

8Sa vakararavi vei Jiova ko koya o qo me vakabulai koya: me mani vakabulai koya ga, kevaka e sa rekitaka.

9Ia sai iko sa kauti au mai na kete i tinaqu: o sa maroroi au niʼu sa sucuma tiko na sucu i tinaqu.

10Au a biuti ga vei iko niʼu sa qai sucu: o iko na noqu Kalou niʼu sa qai lako mai na kete i tinaqu.

11Kakua ni ko sudra tani vei au; ni sa toro voleka mai na rarawa; a sa sega e dua me vukei au.

12Sa vakavolivoliti au na karavau tagane e le vuqa; sa tu vakavolivoliti au na karavau tagane kaukauwa ni Pasani.

13Sa dalaga na gusudra vei au, me vaka na laioni sa dauveidresulaki ka dautagi.

14Au sa sovaraki yani me vaka na wai, a sa mavule kecega nai sema ni suiqu: sa yaco me vaka na drega ni vola na yaloqu, sa waicala e loma ni ketequ.

15Sa mamaca na noqu kaukauwa me vaka nai caca ni bilo, a sa kabi ki na sui ni galegalequ na yamequ; o sa lesi au ki na kuvu-ni-soso ni mate.

16Ni sa vakavolivoliti au ko ira na koli: era sa vakavolivoliti au nai vavakoso era tamata lomaca: era sa coka na ligaqu kei na yavaqu.

17Au sa wilika kecega na suiqu: e sa wanonovi au ka vakaraici au matua.

18Era sa vota vei ira na noqui sulu, a ra sa vakalutuka na madigi e na noqui tutuvi.

19Ia ko iko, Jiova, mo kakua ni yawa vei au: na noqu kaukauwa, mo kusarawa me vukei au.

20Vakabula na yaloqu mai nai seleiwau; na noqu ka duaduaga mai na kaukauwa ni koli.

21Vakabulai au mai na gusu ni laioni: ni ko a rogoci au mai na kaukamea ni yunikoni.

22Au na vakatusa na yacamu vei ira na taciqu: e na kedra maliwa nai vavakoso lewe ni soro kaʼu na vakavinavinaka vei iko.

23Oi kemudou sa rerevaki Jiova, dou vakavinavinaka vua; dou vakamolimoli vua, koi kemudou kecega na kawa i Jekope; dou rerevaki koya, koi kemudou kecega na kawa i Isireli.

24Ni sa sega ni beca se cata na rarawa i koya sa vakararawataki; a sa sega ni vunia vua na matana; a sa rogoci koya, ni sa tagi vua.

25Au na vakamolimoli ga vei iko e nai soqosoqo levu: na ka kaʼu a yalataka kaʼu na kitaka e na matadra era rerevaki koya.

26Era na kana ka mamau ko ira sa yalomalumalumu: era na vakavinavinaka vei Jiova ko ira era sa vakasaqarai koya: ena bula na yalomudou ka tawa mudu.

27Era na vakanananu kecega nai yalayala kei vuravura, ka saumaki vei Jiova: era na cuva e matamu ko ira kecega na veimataqali ni veivanua.

28Ni sa nei Jiova na matanitu; ia ko koya ga sa turaga vei ira na veivanua.

29O ira kecega era sa uro e vuravura, era na kana ka cuva: kei ira kecega era lako sobu ki na kuvu-ni-soso era na tekiduru vua: a sa sega e Vakabula rawa na yalona.

30Ena qaravi koya e dua na kawa; ena okati vua na Turaga me nona kawa.

31Era na lako mai ka vakatusa na nona yalododonu vei ira na tamata era na sucu mai, ni sa cakava o qori ko koya.