1I JIOVA, ena reki na tui e na nomu kaukauwa; ena marau vakalevu sara ni ko sa ia na veivakabulai!
2O sa solia vua na gadreva ni yalona, o sa sega ni bureitaka na masumasu ni tebenigusuna. Sela.
3Ni ko sa taumadaka e na nomui loloma e veivakalougatataki: o sa vakaisalataka e nai sala vakaturaga sa koula dina.
4Sa kere bula vei iko, o sa solia vua, io, na bula dede ena tawa mudu.
5Sa levu na nonai ukuuku ni ko sa vakabulai koya: o sa solia vua na vakarokoroko kei na ka vakaturaga.
6Ni ko sa vakalougatataki koya vakaidina ka tawa mudu; o sa vakamarautaki koya sara e na matamu.
7Ni sa vakararavi na tui vei Jiova; ia e na vuku ni loloma i Koya sa Cecere sara ena tawa yavalati kina ko koya.
8Ena kunei ira kecega na nomu meca na ligamu: ena kunei ira sa cati iko na ligamu i matau.
9O na biuti ira ki na lovo waqawaqa e na gauna ni nomu cudru: ena tilomi ira ko Jiova e na nona cudru, ena kani ira sara na buka waqa.
10O na vakarusa tani na vuadra mai vuravura, kei na nodra kawa maivei ira na luve ni tamata.
11Ni ra sa nakita me ra vakacacani iko; era sa vakananuma na vere ca, a ra sa sega ni rawata:
12ni ko na qai vakasavi ira, ni ko sa qai vakarautaka e matadra na nomu gasau e na kena wa.
13Mo vakaceceretaki, Jiova, e na nomu qaqa: keitou na meke kina ka vakamolimoli e na nomu kaukauwa.
Who We AreWhat We EelieveWhat We Do
2025 by iamachristian.org,Inc All rights reserved.
