Meke 14 - AI VOLA TABU（FIJ1864）

Sa tukuni na nona ca na tamatai valavala ca; a nodai Vakabula na Kalou.Vua na Domo-ni-meke. A Meke i Tevita.

1SA kaya e lomana na tamata lialia, Sa sega na Kalou. Era sa vuca, era sa kitaka nai valavala velavela, sa sega e dua sa caka vinaka.

2Sa rai sobu mai lomalagi ko Jiova kivei ira na luve ni tamata, me raica se dua sa kila, se vakasaqara na Kalou.

3Era sa lesu tani vata kecega, era sa yaco me ra velavela: sa sega e dua sa caka vinaka, sa sega sara e dua.

4Sa sega beka na vuku vei ira kece era daukitaka nai valavala ca? o ira era sa kania na noqu tamata me vaka ni ra kana madrai, a ra sa sega ni masu vei Jiova.

5Era a rere vakalevu kikea: ni sa tiko na Kalou kei na nodra kawa na tamata yalododonu.

6Dou sa vakalialia na lewa ni tamata dravudravua, ia ka sa nonai drodro ko Jiova.

7Me lako kusarawa mada mai Saioni nai Vakabula nei Isireli! ni na kauta tale mai ko Jiova na nona tamata era vakaboicataki, ena qai reki ko ira na Jekope, ka marau ko ira na Isireli.