1VAKALAKALA daligamu ki na noqu vosa, Jiova; kila na noqu nanuma.
2Vakarogoca na domo ni noqu tagi, noqu Tui kei na noqu Kalou, niʼu na masu ga vei iko.
3E na mataka, Jiova, ko na rogoca na domoqu; e na mataka kaʼu na vakarau ga vei iko, ka ta cake.
4Ni ko sa sega na Kalou sa rekitaka na ka e tawa dodonu; ena sega na ca me tiko vata kei iko.
5Ena sega ni wavutu e matamu ko ira na lialia: o sa cati ira kecega era sa kitaka nai valavala ca.
6O na vakarusai ira era sa vosa lasu: na tamata tauvi dra kei na dauveivakaisini ena cata sara ko Jiova.
7Ia koi au, e na vuku ni nomu loloma levu, kaʼu na curu ki na nomu vale: kaʼu na cuva kivakaki na nomu vale tabu niʼu sa rerevaki iko.
8Jiova, tuberi au ena nomu yalododonu e na vukudra na noqu meca; vakadodonutaka e mataqu na nomu sala.
9Ni sa sega na ka dina e gusudra; sa ca sara na lomadra; ai bulubulu sa dola tu na nodrai tilotilo; era sa dau veicavilaki e na yamedra.
10Na Kalou, mo vakacalai ira; me ra bale ga e na nodra bose; vakasevi ira e na vuku ni nodrai valavala ca e vuqa; ni ra sa dautalaidredre vei iko.
11Ia me ra reki ga ko ira kece sa vakararavi vei iko: me ra meke vakadomoilevu ga ka tawa mudu, ni ko na vakarurugi ira: me ra marautaki iko ko ira era sa lomana na yacamu.
12Ni sai iko, Jiova, ena vakalougatataka na yalododonu; o na vakavolivoliti koya e na loloma me vaka e nai sasabai.
Who We AreWhat We EelieveWhat We Do
2025 by iamachristian.org,Inc All rights reserved.
