Ai Vola Kei Jope 42 - AI VOLA TABU（FIJ1864）

Sa vakamalumalumutaki koya ko Jope vua na Kalou, 1-6. Sa vunauci iratou na wekana ko koya, a sa vakarota rei Jope me sorovaki iratou, a sa vakadonuya na masu i Jope, 7-10. Sa vakalevulevui Jope na Kalou, 11-15. Sa mate ko Jope ni sa qase sara, 16.

1SA qai vosa vei Jiova ko Jope, ka kaya,

2Au sa kila ni ko sa rawata na ka kecega, a sa sega ni tarovi rawa e dua na ka ko sa nanuma.

3O cei o qo sa vakabutobutotaka na lewa ka yali na vuku? o koya kaʼu a cavuta kina na ka kaʼu a lecava; na ka e veivakidacalataki vei au, a ya kaʼu a tawa kila.

4Mo rogoci au mada, niʼu sa vosa: kaʼu na tarogi iko, ia mo vakatakila mai vei au.

5Kaʼu a rogoci iko e na daligaqu walega: ia ka sa qai raici iko na mataqu:

6o koya o qo kaʼu sa vakasisilataki au kina, ka veivutuni e na kuvu-ni-soso kei na dravusa.

7A sa vakaoqo, ni sa vosataka oti ko Jiova na vosa o qo vei Jope, sa qai kaya ko Jiova vei Elifasi na kai Temani, Sa waqa na noqu cudru vei iko, vei rau talega na wekamu e lewe rua: ni dou sa sega ni vosataki au vakadodonu, me vakataki Jope na noqu tamata.

8O koya o qo mo dou kauta mada kina e vitu na karavau, ka vitu na sipi tagane, ka lako vua na noqu tamata ko Jope, ka cabora nai soro kama e na vukumudou: ena masulaki kemudou ko Jope na noqu tamata, niʼu na vakadonuya na matana: deʼu ia vei kemudou me vaka na nomudou lialia, e na vuku ni dou a sega ni vosataki au vakadodonu me vakataki Jope na noqu tamata.

9Eratou sa qai lako ko Elifasi na kai Temani, kei Pilitati na luve i Sua, kei Sofari na kai Neema, ka cakacaka me vaka na vosa i Jiova vei iratou: a sa vakadonuya na mata i Jope ko Jiova.

10A sa saumaka tani na veivakabobulataki kei Jope ko Jiova, ni sa masulaki iratou na wekana: a sa solia vei Jope ko Jiova na ka sa levu cake, ka vakarua, e na ka ka tu vua eliu.

11Sa qai lako mai vua ko iratou na tacina kecega, kei iratou na ganena kecega, kei ira kece ka ra veikilaki kaya eliu, a ra sa kana madrai kaya e nona vale: a ra sa tagicaki koya, ka vakalecataki koya e na vuku ni ka rarawa kecega sa vakayacora mai ko Jiova: a ra sa dui solia vua e dua na tiki ni siliva, ka dua na sau koula.

12A sa vakalougatataka vakalevu ko Jiova na veiyabaki i Jope sa muri, ka vakalailai eliu: ni sa dua na oba ka va na udolu na nona sipi, ka ono na udolu na kameli, ka rua na udolu na karavau, ka dua na udolu na asa alewa.

13A sa vitu na luvena tagane ka tolu na luvena alewa.

14A sa vakatoka na yacana na kenai matai, ko Jemaima; kei na yacana nai karua, ko Kesaia; kei na yacana nai katolu, ko Kereni-apuka.

15A sa sega ni kune na alewa e na vanua kecega o qori me matavinaka me vaka na luve i Jope: a sa vota vei iratou ko tamadratou nai votavota e na kedra maliwa na ganedratou.

16A sa oti o qo sa bula tiko ko Jope ka yabaki e dua na drau ka vasagavulu, ka raici iratou na luvena, kei na luvedratou na luvena, me va nai tabayatamata.

17A sa mate ko Jope, ni sa qase mai ka vuqa na nona yabaki.