Ai Vola I Esira 4 - AI VOLA TABU（FIJ1864）

Sa gumatua ko ira na kai Samaria, me kua ni tara rawa na vale ni soro mai Jerusalemi.

1IA ni ra sa rogoca ko ira na nodra meca na Juta kei ira na Penijamini, ni ra sa tara na vale vei Jiova na nodra Kalou na Isireli ko ira era a vakabobulataki;

2era sa qai lako mai kivei Sirupapeli, kei ira era liu vei ira na qase, ka kaya vei ira, Me da tara vata: ni keimami sa qarava na nomudou Kalou, me vakataki kemudou; ia keimani sa soro vua mai na gauna i Esari-atoni na tui Asuri, o koya ka kauti keimami mai kike.

3A sa kaya vei ira ko Sirupapeli, kei Josua, kei ira sa vo vei ira era liu vei ira na qase ni Isireli, Dou sa sega ni vakaitavi vata kei keimami e na tara na vale vua na neimami Kalou; koi keimami ga ena tara vakai keimami vei Jiova na Kalou nei Isireli, me vaka ka vakaroti keimami na tui ko Koresi na tui Perisia.

4Sa qai vakataqayataki ira na tamata ni Juta ko ira na lewe ni vanua, ka vakararawataki ira ni m tara vale,

5ka volia na tamata vuku e na veileti, me vakatawayagataka na ka era nakita, e na gauna kecega i Koresi na tui Perisia, ka yacova na gauna i Tario na tui Perisia.

6Ia ni sa lewa ko Easivero, ni sa qai vakatekivu na nona lewa, era sa vola na ka me ra beitaki ira kina na kai Juta kei ira na kai Jerusalemi.

7Ia e na gauna i Aritasasita, eratou sa vola vei Aritasasita na tui Perisia, ko Pisilami, ko Miciritaci, ko Tapeli, kei ira na tamata tani era nodratoui tokani; a sa volai nai vola e na vosa vaka-Siria, ka tukuni na kenai balebale e na vosa vaka-Siria.

8Sa vola nai vola ko Riumi na turaga ni lewa, kei Simisei na dauvolavola, kivei Aritasasita na tui, me beitaki Jerusalemi, ka vaka,

9Ko Riumi na turaga ni lewa, kei Simisei na dauvolavola, kei ira kece na nodraui tokani; ko ira na Tinaye, kei ira na Afarisacikai, kei ira na Taripalai, kei ira na Efarisai, kei ira na kai Ireki, kei ira na kai Papiloni, kei ira na kai Susa, kei ira na Teave, kei ira na kai Elami,

10kei ira na veimatanitu sa vo, o ira ka kauta mai ko Osina-pari, o koya sa turaga ka rogo, ka vakatikora e na veikoro ni Samaria, kei ira na vo e na tai o qo ni uciwai, ia mo vaka sa dauvolai.

11O qo nai vola era sa vakauta vua, io vei Aritasasita na tui: O ira na nomu tamata era tiko e na tai o qo ni uciwai, ia me vaka sa dauvolai.

12Me kila na tui, ni ra sa lako mai ki Jerusalemi, ko ira na Jiu era lako maivei iko vei keimami, a ra sa tara tiko na koro dauvere ka ca, ka sa viria oti na kena bai, ka sa veiuturitaka na kena yavu.

13Ia me kila na tui, kevaka sa tara na koro o qo, ka viri na kena bai, era na sega ni kitaka nai vakacavacava, se na kamunaga, se na ka sa daukitaki vua na tui, o na qai vakayalia vei iko na nodra kamunaga na tui.

14E na vuku ni keitou sa vakani mai na vale ni tui, a sa sega ni kilikili kei keitou me raica na be vei iko na tui, o koya keitou sa talaki kina ka vakatakila vei iko na tui;

15me ia na vakasaqaqara e nai vola ni nodrai tukutuku na nomu qase: o na kunea kina e nai vola ni tukutuku, ka kila ni sa koro talaidredre na koro o qo, ka dauvakacacani ira na tui kei na veiqali, ni ra sa buki vere talega kina eliu: e na vuku ni ka o qo sa vakarusai kina na koro o qo.

16Keitou sa vakatakila vei iko na tui, kevaka sa tara tale na koro o qo, ka viri na kena bai, ena sega kina na nomu qali e na tai o qo ni uciwai.

17Sa qai talaki ko na tui kivei Riumi na turaga ni lewa, kei Simisei na dauvolavola, kei ira kece na nodraui tokani era sa tiko mai Samaria, kei ira kece era tiko mai tai kadua ni uciwai, Sa loloma; ia me vaka sa dau volai.

18Ai vola dou a tala vei keitou sa wiliki vakamacala e mataqu.

19Ia kaʼu a vakarota, a sa ia oti na vakasaqaqara, a sa kunei ni sa ia makawa na vere na koro o qo vei ira na tui, a sa ia kina na talaidredre kei na vere.

20A sa so talega na tui kaukauwa mai Jerusalemi, era sa lewa kece e na yasana kadua ni uciwai; ka dausoli vei ira nai vakacavacava, na kamunaga, kei na ka e daukitaki vua na tui.

21Ia dou vakarota me mudu ko ira na tamata o qo, ka me kakua ni tara na koro o qo, ka meʼu solia mada nai vakaro.

22Dou qarauni kemudou, mo dou kitaka na ka o qo: me tubu meicavai na ka me ca kina ko ira na tui?

23Ia ni sa wili nai vola i Aritasasita na tui e na mata i Riumi, kei Simisei na dauvolavola, kei ira na nedraui tokani, era sa qai lako vakusakusa ki Jerusalemi vei ira na Jiu, ka vakasaurarataki ira vakaukauwa me mudu na nodra cakacaka.

24Sa qai mudu na cakacaka ni vale ni Kalou mai Jerusalemi. A sa mudu ka yacova nai karua ni yabaki ni lewa i Tario na tui Perisia.