Ai Vola I Esira 3 - AI VOLA TABU（FIJ1864）

Sa viri nai cabocabo-ni-soro, a sa ia nai soro kei na solevu. Sa tauyavutaki na vale ni soro.

1IA ni sa yaco nai kavitu ni vula, a sa tiko e na Veikoro ko ira na luve i Isireli, era sa soqoni vata ko ira na tamata ki Jerusalemi me vaka na tamata e lewe dua.

2Sa qai tu cake ko Josua na luve i Yosataki, kei iratou na bete na tacina, kei Sirupapeli na luve i Sialitieli, kei iratou na tacina, ka cakava nai cabocabo-ni-soro ni Kalou nei Isireli, me vakacabora kina na veisoro kama, me vaka sa volai e na vunau i Mosese na tamata ni Kalou.

3A ra sa vakatikora nai cabocabo-ni-soro ki na kenai tutu; ni ra sa rere e na vuku ni lewe ni veivanua o qori: a ra sa vakacabora kina na veisoro kama vei Jiova, io na veisoro kama e na mataka kei na yakavi.

4A ra sa kitaka na solevu ni vale taba ni kau, me vaka sa volai, ka ia na kena veisoro kama e na kenai wili, me vaka nai valavala, me vaka na kenai valavala e na veisiga;

5ka emuri nai soro kama sa daukitaki, a ya ni veivula vou, kei na veisolevu vakatabui i Jiova era sa loku tu, kei na nodra era sa via vakacabora walega nai soro vei Jiova.

6Sa vakatekivu kaya nai matai ni siga ni kenai kavitu ni vula na nodra vakacabora na veisoro kama vei Jiova. Ia ka sa bera ni tauyavutaki na vale i Jiova.

7Era a solia talega nai lavo vei ira na matai ni vatu, kei ira na matai ni kau; kei na kakana, kei na medra, kei na waiwai, vei ira na kai Saitoni, kei ira na kai Teiri, me ra kauta mai na sitari mai Lipanoni ki na Wasawasa mai Yafa, me vaka na ka sa solia vei ira ko Koresi na tui Perisia.

8Ia e nai karua ni yabaki ni nodra lako mai ki na vale ni Kalou mai Jerusalemi, e nai karua ni vula, sa vakatekivu ko Sirupapeli na luve i Sialitieli, kei Josua na luve i Yosataki, kei na wekadra sa vo, ko ira na bete kei ira na Levi, kei ira kece era sa lesu mai ki Jerusalemi mai na vakabobulataki; a ra sa lesi ira na Levi, sa ruasagavulu na nodra yabaki ka levu cake, me vakatekivuna na cakacaka ni vale i Jiova.

9Era sa qai tu vata ko Josua kei iratou na luvena kei iratou na wekana, ko Katimieli kei iratou na luvena, ko iratou na luve i Juta, me rotaki ira na matai e na vale ni Kalou: o iratou na luve i Enatati, kei ira na luvedra kei ira na tacidra, na Levi.

10Ia ni sa tauyavutaka na vale i Jiova ko ira na matai, sa lesi ko ira na bete mo ra tu e na nodrai sulu ka taura na davui, kei ira na Levi na luve i Asafi ka taura nai qiriqiri, me ia na vakavinavinaka vei Jiova, me vaka ka vakarota ko Tavita na tui Isireli.

11A ra sa sere vata ka veivuke e na vakavinavinaka kei na vakamolimoli vei Jiova; e na vuku ni sa yalovinaka ko koya, ni sa tawa mudu na nona yalololoma vei ira na Isireli. A sa kailavaka na kaila levu ko ira kecega na tamata, ni ra vakavinavinaka vei Jiova, e na vuku ni sa tauyavutaki na vale i Jiova.

12Ia ka lewe vuqa vei ira na bete, kei ira na Levi, kei ira sa liu vei ira na qase, era tamata qase, era a kunea na vale eliu, ni sa tauyavutaki e matadra na vale o qo, era tagi vakadomoilevu; ka lewe vuqa era kaila vakadomoilevu e na marau:

13a sa sega ni kila rawa kina ko ira na tamata, na domo ni kaila e na marau mai na domo ni nodra tagi na tamata: ni sa kailavaka na kaila levu ko ira na tamata, a sa rogo vakayawa na rorogo.