I. A Veika Sa Caka E Na Veigauna 5 - AI VOLA TABU（FIJ1864）

O ira ka tubu vei Rupeni, kei Kata, kei Manase.

1IA ko ira na luve i Rupeni na ulumatua i Isireli, (ni sa ulumatua ko koya; ia e na vuku ga ni sa vakadukadukalitaka nai mocemoce i tamana, sa soli na nona ka vakaulumatua vei rau na luve i Josefa na luve i Isireli: sa sega ga nai wiliwili ni tabatamata me vaka na ka vakaulumatua.

2Ia sa gumatua vei iratou na tuakana kei na tacina ko Juta, a sa mai vua na turaga sa levu cake; a sa nei Josefa ga na ka vakaulumatua:)

3io ko iratou na luve i Rupeni na ulumatua i Isireli: o Enoke, kei Falu, o Esironi, kei Karimi.

4O iratou na luve i Joeli: o Simaya na luvena, o Koko na luvena, o Simi na luvena,

5o Mika na luvena, o Riaya na luvena, o Peali na luvena,

6o Piera na luvena, o koya ka kauta tani ko Tikilaci-pilineseri na tui Asiria: o koya sa nodra turaga na Rupeni.

7Ia ko ira na tacina e na nodra veimataqali, ni sa wili nai tabatamata ni nodra kawa: o Yieli sa liu, kei Sikariya,

8kei Pela na luve i Asasi, na luve i Sema, na luve i Joeli, o koya ka tiko mai Aroeri, ka yala ki Nipo kei Peali-mioni:

9a sa tiko e na vanua vaka ki cake ko koya, ka yala ki nai cucururu ki na veikau mai na uciwai ko Uferetisi, e na vuku ni sa tubu me vuqa na nodra manumanu e na vanua ko Kiliati,

10Ia e na gauna i Saula era sa vala kei ira na Akiri, a sa bale ena ligadra ko ira o qori: a ra sa tiko e na nodra veivale gatu e na yasana kecega vaka ki cake mai Kiliati.

11Ia ko ira na luve i Kata era tiko ka donui ira e na vanua ko Pasani, ka yala ki Salika:

12o Joeli sa liu, kei Safami na kenai karua, kei Yanei, kei Safati mai Pasani:

13kei iratou na wekadratou e na mataqali i tamadratou: o Mikaeli, kei Misulami, kei Sepa, kei Yorei, kei Yakani, kei Sia, kei Eperi, e lewe vitu.

14O qo na luve i Epieyili na luve i Uri, na luve i Yaroa, na luve i Kiliati, na luve i Mikaeli, na luve i Yisisei, na luve i Yato, na luve i Pusa;

15o Ei na luve i Apitieli, na luve i Kuni, sa liu e na mataqali i tamadra.

16A ra sa tiko e Kiliati mai Pasani, kei na kena veikoro, kei nai bili kecega ni Saroni, e na nodrai yalayala.

17O ira kece o qo sa wili na nodrai tabatamata e na gauna i Yocami na tui Juta, kei na gauna i Yaropiami na tui Isireli.

18O ira na luve i Rupeni, kei ira na Kata, ka dua na wase ni yavusa i Manase, ko ira na tamata qaqa, era sa taura rawa nai sasabai kei nai seleiwau, ka dauvana-taka na dakai dina, ka daukila nai valu, era oba vakava ka va na udolu, ka vitu na drau ka onosagavulu, era lako rawa e nai valu.

19A ra sa ia nai valu kei ira na Akari, kei Jeturi, kei Nafisi, kei Notapi.

20A ra sa vukei ni sa vala kei ira, a ra sa soli ko ira na Akari ki na ligadra, kei ira kece na nodrai to: ni ra sa tagi vua na Kalou e nai valu, a sa rogoci ira ko koya; e na vuku ni nodra vakararavi vua.

21A ra sa kauta tani na nodra manumanu; e oba vakalima na nodra kameli, ka oba vakarua-sagavulu ka lima na sipi, ka rua na udolu na asa, ka oba vakatini na tamata.

22Ni ra sa bale moku na lewe vuqa, ni sa mai vua na Kalou nai valu. A ra sa tiko me kedrai sosomi ka yacova na veivakabobulataki.

23Ia ko ira na luvedra e dua na wase ni yavusa i Manase, era sa tiko e na vanua o qo: era sa tubu me lewe vuqa mai Pasani, ka yacovi Peali-erimoni, kei Siniri, ka yacova na ulu-ni-vanua ko Erimoni.

24Ia ko ira o qo na turaga ni mataqali ni nodra qase, io ko Iferi, kei Isi, kei Ilieli, kei Asirieli, kei Yirimia, kei Oteviya, kei Yatieli, era tamata qaqa, a tamata rogo, era turaga ni mataqali ni nodra qase.

25Ia ka ra sa talaidredre ki na nodra Kalou na nodra qase, ka lako vakatani me muria na veikalou ni lewe ni vanua o qori, o ira ka vakarusa ko na Kalou e na matadra.

26A sa vakayavalata ko na nodra Kalou na Isireli na yalo i Puli na tui Asiria, kei na yalo i Tikilaci-pilineseri na tui Asiria, a sa kauti ira tani, io ko ira na Rupeni, kei ira na Kata, ka dua na wase ni yavusa i Manase, ka vakayacori ira ki Ela, kei Apori, kei Ara, kei na uciwai mai Kosani, ka yacova na gauna o qo.