Ai Vola Kei Ruci 3 - AI VOLA TABU（FIJ1864）

Sa vakavulici Ruci ko Naomi, 1-5. Sa lomani Ruci ko Poasi, a sa nanuma me watina, 6-18.

1SA qai kaya vua ko Naomi na vugona, Na luvequ, meʼu sega li ni qara vei iko na vakacegu, mo vinaka kina?

2Ia o qo, sa sega li ni wekadaru ko Poasi, ko a tiko kei ira na nona alewa? Raica, sa irivi parile ko koya e na bogi edaidai e na rara ni buturaki sila.

3Mo sisili mada, ka lumuti iko, ka vakasulumi iko e na nomui sulu, ka lako sobu ki na rara; mo kakua ni vakatakilai iko vua na tamata, ka me kana ka gunu oti mada ko koya.

4Ia ni sa laʼki davo ko koya, mo kila na tikina sa davo kina ko koya, ia mo lako kina, ka cereka nai tutuvi sa ubi kina na yavana, ia mo koto sobu; ia ena tukuna ko koya vei iko na ka mo cakava.

5A sa kaya vua ko koya, A ka kecega ko sa kaya vei au kaʼu na kitaka.

6A sa lako sobu ko koya ki na rara, a sa cakacaka me vaka na ka kecega ka rotaka vua ko na vugona.

7Ia ni sa kana ka gunu oti ko Poasi, a sa marau na yalona, sa laʼki koto mai na mua ni binibini sila: a sa lako vakamalua ko koya, ka cereka nai tutuvi sa ubi kina na yavana, a sa koto sobu.

8Ia ni sa lomaloma-ni-bogi, sa rere ko koya na tamata, a sa vuki, ka, raica, sa dua na alewa sa koto ki na yavana.

9A sa kaya ko koya, O cei ko iko? A sa kaya ko koya, Oi au ko Ruci, na nomu vada: mo tevuka na nomui tutuvi me ubia na nomu vada: ni dara sa veiwekani.

10A sa kaya ko koya, Mo kalougata maivei Jiova, na luvequ: sa levu na loloma ko sa cakava emuri o qo ka lailai eliu, e na vuku ni ko sa sega ni muri ira na tagane cauravou, se dravudravua se vutuniyau.

11Ia o qo, na luvequ, mo kakua ni rere; au na cakava vei iko na ka kecega ko sa kaya: ni ra sa kila ko ira kecega na kai noqu, era sa mai na matamata-ni-koro, ni ko sa alewa yalododonu.

12Ia o qo, sa dina niʼu sa wekamu dina; a sa dua ga na wekamu voleka ka yawa koi au.

13Mo tikoga e na bogi o qo, ia e na mataka, kevaka ena cakava ko koya vei iko nai valavala ni veiwekani dina, sa vinaka; me cakava ko koya na cakacaka ni veiwekani: ia kevaka sa bese ni cakava vei iko na cakacaka ni veiwekani dina, me vaka sa bula ko Jiova, kaʼu na cakava vei iko na cakacaka ni veiwekani: mo koto me sabogibogi.

14A sa koto ki na yavana ko koya ka mataka mai: a sa tu cake ko koya ni sa sega ni veikilaki rawa na tamata. A sa kaya ko koya, Me kakua mada ni kilai ni sa lako mai na alewa ki na rara.

15Sa kaya tale ko koya, Mo kauta mai nai tutuvi ko sa vakaisulu kina, ka taura. Ia ni sa taura tiko ko koya, sa vakarauta ko koya e ono nai vakarau parile, a sa tauca vua: a sa lako ko koya ki na koro.

16Ia sa lako mai ko koya ki na vugona, a sa kaya ko koya, O sa vakaevei, na luvequ? A sa tukuna vua ko koya na ka kecega ka cakava vua ko koya na tamata.

17A sa kaya ko koya, Sa solia mai vei au ko koya nai vakarau parile o qo e ono; ni sa kaya vei au, Mo kakua ni lako lala ki na vugomu.

18A sa kaya ko koya, Mo wa wa, na luvequ, mo kila mada se na vakaevei nai otioti ni ka o qo: ni na sega ni vakacegu na tamata, ka me vakaotia mada na ka edaidai.