Ai Vola Kei Ruci 2 - AI VOLA TABU（FIJ1864）

Sa caka vinaka sara vei Ruci ko Poasi.

1A SA vei Naomi e dua na weka i watina, e na mataqali i Elimeleki, a tamata vutuniyau sara, na yacana ko Poasi.

2A sa kaya vei Naomi ko Ruci na kai Moapi, Meʼu lako mada ki na were, meʼu tomitomika na sola ni sila niʼu sa muri koya ena lomani au. A sa kaya vua ko koya, Mo lako ga, na luvequ.

3A sa lako yani ko koya, ka lako mai, ka tomitomi e na were ka muri ira era tamusumusu: ia ka sa lako vakatawakila ki na tiki ni were sa nei Poasi, o koya mai na mataqali i Elimeleki.

4Ka, raica, sa lako mai Pecileema ko Poasi, a sa kaya vei ira na tamata sa tamusuki sila, Me tiko kei kemudou ko Jiova. A ra sa kaya vua, Me vakalougatataki iko ko Jiova.

5A sa kaya ko Poasi ki na nona tamata sa lesi me vakaraici ira era tamusuki sila, A nei cei na alewa o qo?

6A sa vosa ko koya na tamata sa lesi me vakaraici ira era tamusuki sila, a sa kaya, Na alewa o qo na kai Moapi, o koya ka lesu mai kei Naomi mai na veiyasana nei Moapi:

7a sa kaya ko koya, Meʼu tomitomika mada ka kumukumuna na sila e na maliwa ni veivau sila, ka muri ira era tamusuki sila: a sa lako mai ko koya, a sa tikoga mai na mataka ka yacova na tiki-ni-siga o qo; sa tiko vakalailai walega mai vale ko koya.

8Sa qai kaya ko Poasi vei Ruci, O sa rogoca, na luvequ, se segai? Mo kakua ni laʼki tomitomika na sila e na were tani, ia mo kakua ni lako tani eke, mo tiko dei ga eke kei ira na noqu gonealewa:

9mo raica tiko na were era sa tamusuki sila kina, ka muri ira tiko: au sa sega li ni vakaroti ira na cauravou, me ra kakua ni tarai iko? ia ni ko sa viagunu, mo lako ga ki na veisaqa, ka gunuva na ka era sa takiva na tagane cauravou.

10A sa bale e matana ko koya, ka cuva vaka ki na qele, a sa kaya vua, E na vuku ni cava kaʼu sa kune loloma kina e matamu, mo via kilai au kina, niʼu sa kai tani?

11A sa vosa ko Poasi, ka kaya vua, Sa tukuni vakavinaka vei au na ka kecega ko sa cakava vua na vugomu ni sa mate oti na watimu: ka ni ko sa biuta na tamamu kei na tinamu kei na vanua ko a sucu kina, ia ko sa lako mai vei ira na tamata ko a sega ni kila eliu:

12me sauma ko Jiova na nomu cakacaka, ia me vakayacori sara na nomui sau maivei Jiova na Kalou nei Isireli, o koya ko sa mai vakararavi e ruku ni tabana.

13Sa qai kaya ko koya, Meʼu kune loloma mada e matamu, noqu turaga; ni ko sa vakacegui au, ka vosa loloma vei au na nomu vada, ia kaʼu sa sega ga ni tautauvata kei na dua na nomu vada.

14A sa kaya vua ko Poasi, E na gauna sa ia kina na kana mo toro mai kike, ka kania e so na kakana, ka tonisua na kemu tikina e na wai wiwi.

A sa tiko vata ko koya kei ira era tamusuka na sila: a sa dodoka vua ko koya na sila sa tavuni, a sa kania ko koya, a sa mamau, ka vakacauna.

15Ia ni sa tu cake ko koya me tomitomi, sa rotaki ira na nona cauravou ko Poasi, ka kaya, Me tomitomi ko koya e na maliwa ni veivau sila, ka dou kakua ni vakamaduataka:

16ia mo dou cavuta talega me nona e so na sila, mai na veivau sila, ka vakalutuka me tomika ko koya, ia dou kakua ni vunauca.

17A sa tomitomi tiko mai na were ko koya, ka yakavi mai, a sa samuta na ka ka tomika: a sa vaka beka e dua na efa parile.

18A sa taura ko koya, ka lako mai ki na koro: a sa raica ko vugona na ka ka tomika: a sa kauta mai, ka solia vua na ka sa vo ni sa mamau ko koya.

19A sa kaya vua ko vugona, O a tomitomi maivei edaidai? ia ko a cakacaka maivei? me kalougata ko koya ka via kilai iko. A sa tukuna ko koya vei vugona se ko cei sa cakacaka kaya ko koya, a sa kaya, Na tamata kaʼu a cakacaka kaya edaidai, na yacana ko Poasi.

20A sa kaya ko Naomi vua na vugona, Me kalougata maivei Jiova ko koya sa sega ni biuta tani na nona loloma vei kedaru sa bula tiko, kei iratou sa mate tu. A sa kaya vua ko Naomi, Sa wekadatou na tamata ko ya, sa dua vei ira na wekadatou dina.

21A sa kaya ko Ruci na kai Moapi, Sa kaya talega vei au ko koya, Mo kabiti ira ga na noqu cauravou, ka yacova nai otioti ni tamusuka na noqu sila kecega.

22A sa kaya ko Naomi vei Ruci na vugona, Sa vinaka, na luvequ, mo dou lako kei ira na nona alewa, ia me ra kakua ni tavaki iko e na were tani.

23A sa kabiti ira na alewa nei Poasi ko koya me tomitomi me yacova nai otioti ni tamusuki parile, kei na tamusuki witi; a rau sa tiko ko koya kei na vugona.