A Kedrai Vola Na Dauveilewai 10 - AI VOLA TABU（FIJ1864）

Sa lewai ira na Isireli ko Tola, 1, 2; kei Yairi, 3-5. Sa vuki tale ko ira na Isireli me soro ki na kalou lasu e so, a sa cudruvi ira ko Jiova, 6-9. Era sa veivutuni, a sa vunauci ira ko Jiova, ka lomani ira tale, 10-16. Sa mai vala kei ira ko ira na luve i Amoni, 17, 18.

1IA sa tu cake me taravi Apimeleki ko Tola na luve i Pua, na luve i Toto, o dua maivei ira na Isakari, me vakabulai ira na Isireli; a sa tiko mai Samiri ma na ulu-ni-vanua ko Ifireimi.

2A sa lewai ira na Isireli ko koya ka yabaki ruasagavulu ka tolu, sa qai ciba ko koya, ka sa bulu mai Samiri.

3A sa tu cake me taravi koya ko Yairi, na kai Kiliati, a sa lewai ira na Isireli ko koya ka yabaki ruasagavulu ka rua.

4A sa tolusagavulu na luvena tagane, era vodo voli e na luve ni asa e tolusagavulu, a sa tolusagavulu na nodra koro, a sa vakatokai, Na Veikoro i Yairi, ka yacova na siga o qo: era sa toka mai na vanua ko Kiliati.

5A sa ciba ko Yairi, ka sa bulu mai Kamoni.

6A ra sa kitaka tale na ka e ca e na mata i Jiova ko ira na luve i Isireli, a ra sa qaravi ira na Peali, kei Aseteroci, kei na veikalou ni Siria, kei na veikalou ni Saitoni, kei na veikalou ni Moapi, kei na nodra veikalou na luve i Amoni, kei na nodra veikalou ni kai Filisitia; a ra sa biuti Jiova, ka sega ni qaravi koya.

7A sa waqa na cudru i Jiova vei ira na Isireli, ka volitaki ira ki na ligadra na kai Filisitia, kei na ligadra na luve i Amoni.

8Ia e na gauna ko ya era sa toni ira na luve i Isireli, ka qaqia, ka yabaki tinikawalu, io, ko ira kecega na luve i Isireli era sa tiko mai tai kadua ni Joritani, e na nodra vanua na luve i Amori, a ya mai Kiliati.

9A ra sa lako ki na tai kadua ni Joritani ko ira na luve i Amoni, me veivala kei ira talega na Juta, kei ira na Penijamini, kei ira na mataqali i Ifireimi: a sa qaqi vakalevu ko ira na Isireli.

10A ra sa tagi vei Jiova ko ira na luve i Isireli, ka kaya, Keimami sa valavala ca vei iko, ni keimami sa biuta na neimami Kalou, ka qaravi ira na Peali.

11A sa kaya ko Jiova vei ira na luve i Isireli, Sa sega li ni ko ira na kai Ijipita, kei ira na luve i Amori, kei ira na luve i Amoni, kei ira na kai Filisitia,

12kei ira na kai Saitoni, kei ira na Amaleki, kei ira na kai Maoni, era sa vakararawataki kemudou; kaʼu a vakabulai kemudou mai na ligadra, ni dou a tagi vei au?

13Ia dou sa biuti au ga, ka qarava e so na kalou tani; o koya kaʼu na sega kina ni vakabulai kemudou tale.

14Dou laʼki tagi ki na veikalou dou sa digitaka: me ra vakabulai kemudou ko ira o na gauna dou sa vakararawataki kina.

15A ra sa kaya vei Jiova ko ira na luve i Isireli, Keimami sa valavala ca: mo cakava vei keimami na ka kece e vinaka e matamu; mo vakabulai keimami mada ga o na gauna o qo.

16A sa biuta tani ko ira na nodra veikalou na kai tani mai na nodra maliwa, ka qaravi Jiova: a sa bi taki na yalona e na vuku ni nodra rarawa na Isireli.

17A ra sa soqoni vata na luve i Amoni, ka laʼki tiko mai Kiliati. A ra sa soqoni vata na luve i Isireli, ka tiko mai Misipe.

18A ra sa veikainaka vakai ira ko ira na tamata turaga mai Kiliati, O cei na tamata ena vakatekivuna nai valu kei ira na luve i Amoni? ena nodra turaga kecega na kai Kiliati ko koya.