A Kedrai Vola Na Dauveilewai 7 - AI VOLA TABU（FIJ1864）

Sa rotaki Kitioni ko Jiova e na nonai valu, 1-8. Na tadra ni kai Mitiani, 9-14. Nai valavala ni valu, 15-20: era sa moku na kai Mitiani, 21-25.

1A SA sou e na mataka ko Yimpeali, o koya ko Kitioni, kei ira na tamata kecega era vata kaya, ka ra laʼki tiko mai na mata-ni-wai ko Eroti: a sa toka na nodrai tikotiko na kai Mitiani vaka ki na tokalau vei ira, voleka ki na vanua-cecere ko More, e na buca.

2A sa kaya ko Jiova vei Kitioni, Na kedra vuqa na tamata era vata kei iko sa tarova na noqu soli ira na kai Mitiani ki na ligadra, de ra qaciqacia vei au ko ira na Isireli, ka kaya, A ligaimami ga sa vakabulai keimami.

3Ia o qo, mo kaila e na daligadra na tamata, ka kaya, Ko cei sa rere ka yalolailai? me lesu yani vakasauri ko koya mai na ulu-ni-vanua ko Kiliati. A ra sa lesu yani e rua na oba ka rua na udolu vei ira na tamata; ka sa vo ga e tini na udolu.

4A sa kaya ko Jiova vei Kitioni, Era sa lewe vuqa tiko na tamata; kauti ira sobu ki na wai, kaʼu na vakatovolei ira maikeri vei iko: ia ko koya kaʼu na kaya kina vei iko, Me lako kei iko ko koya o qo, ena lako kei iko ko koya; ia ko koya yadua kaʼu na kaya kina vei iko, Me kakua ni lako kei iko ko koya o qo, ena sega ni lako ko koya.

5A sa kauti ira sobu na tamata ko koya ki na wai: a sa kaya vei Kitioni ko Jiova, Ko koya yadua sa dramica na wai e na yamena, me vaka sa dramica na koli, mo kauta me tu vakai koya; kei ira kece talega era cuva e durudra me gunu.

6Ia na kedrai wiliwili era sa dramidrami, ni ra sa kauta na ligadra ki na gusudra, era sa tolu na drau na tamata; ia ko ira kece na tamata sa vo, era sa cuva e durudra me gunu wai.

7A sa kaya ko Jiova vei Kitioni, Ko ira na lewe tolu na drau na tamata sa dramidrami kaʼu na vakabulai kemudou kina, ka soli ira na kai Mitiani ki na ligamu: ia me ra lako ki na nodra tikina ko ira kecega na tamata.

8A ra sa kauta nai vaqa e ligadra ko ira na tamata, kei na nodra davui: a sa talai ira kecega na Isireli ko koya, na tamata yadua ki na nona vale, ka tauri ira ga na lewe tolu na drau na tamata. A sa no yani kira vei koya e na buca na nodrai tikotiko na kai Mitiani.

9A sa kaya vua e na bogi ko ya ko Jiova, Mo tu cake, mo lako sobu ki na nodrai tikotiko, niʼu sa solia oti ki na ligamu:

10ia kevaka ko sa rere tiko ni lako sobu, mo drau lako sobu kei Fura, na nomu tamata, ki na nodrai tikotiko:

11ko na rogoca kina na ka era sa kaya, ia emuri ena vakaukauwataki na ligamu, ko na qai lako sobu ki na nodrai tikotiko. Sa qai lako sobu ko koya kei Fura, na nona tamata, ki na nodrai yalayala na tamata sa vakaiyaragi e na nodrai tikotiko.

12A ra sa koto e na buca me vaka na vodre na kedrai wiliwili ko ira na kai Mitiani, kei ira na Amaleki, kei ira kecega na kai na tu i cake; kei na nodra kameli sa sega ni wili rawa, me vaka na nuku sa no mai na matasawa na kedrai wiliwili.

13Ia ni sa lako mai ko Kitioni, raica, sa tukuna tiko e dua na tamata e dua na tadra vua na kai nona, ka sa kaya, Raica, au sa tadrataka e dua na tadra, ka, raica, sa dua nai buli madrai parile sa vakatatoqitoqi voli e na nodrai tikotiko na kai Mitiani, ka sa curuma na vale, ka yavita, a sa bale kina, a sa vakavulica sara, ka sa bale tu kina na vale.

14A sa vosa mai na kai nona, ka kaya, Sa sega ni ka tani, nai seleiwau ga i Kitioni na luve i Yoasi, e dua na Isireli; sa soli ira na kai Mitiani ki na ligana ko na Kalou, kei na nodrai tikotiko taucoko.

15Ia ni sa rogoca oti ko Kitioni nai tukutuku ni tadra, kei na kenai balebale, sa soro ko koya; a sa lesu tale ki na nodrai tikotiko na Isireli, ka kaya, Dou ia; ni sa solia ki na ligamudou ko Jiova na nodrai tikotiko na kai Mitiani.

16A sa wasea ko koya na tamata e tolu na drau me tolu nai taba, ka solia yadua na davui ki na ligadra; kei na veibilo sa lala, kei na veicina me tu e loma ni veibilo.

17A sa kaya vei ira, Dou raici au mai, ka kitaka vakakina: ka, raica, niʼu sa yaco ki nai bili ni nodrai tikotiko, na ka kaʼu na kitaka, dou kitaka vakakina:

18ia niʼu sa uvuca na davui, koi au kei ira kece sa vata kei au, dou uvuca na veidavui koi kemudou talega, ni dou sa volita na nodrai tikotiko taucoko, ia dou kaya, Ai seleiwau i Jiova kei Kitioni.

19A sa lako mai ko Kitioni, kei ira na tamata e dua na drau era vata kaya, ki nai bili ni nodrai tikotiko e nai vakatekivu ni vakatawa e na lomaloma-ni-bogi; (era sa qai lesia oti ga na tamatai vakatawa:) a ra sa uvuca na veidavui, ka vorolaka na veibilo era sa taura e na ligadra.

20Ia sa uvuca na veidavui ko ira nai taba e tolu, a ra sa vorolaka na veibilo, ka taura na veicina e na ligadra i mawi, kei na veidavui e na ligadra i matau me ra uvuca, ka ra kailavaka, Ai seleiwau i Jiova kei Kitioni.

21A ra sa tu na tamata yadua e na nona tikina, ni ra sa volita tu na nodrai tikotiko: a ra sa cici nai valu kece, ka kaila, ka dro.

22Ia sa uvuca tiko na veidavui ko ira na lewe tolu na drau, a sa cakava na tamata yadua na Kalou me laveta na nodrai seleiwau vua na kai nona, io, e nai valu taucoko: a ra sa dro nai valu ki Peci-sita mai Sireraci, ka yaco ki nai yalayala i Apeli-miola, ki Tapaci.

23A ra sa kailataki vata na tamata Isireli maivei ira na Nafitali, kei ira na Aseri, kei ira kecega na Manase, ka ra sa cici muri ira na kai Mitiani.

24A sa tala e so nai talatala ko Kitioni ki na ulu-ni-vanua taucoko ko Ifireimi, ka kaya, Dou lako sobu me tavaki ira na kai Mitiani, ka laʼki rawata na wai e matadra ka yaco ki Peci-para, io na Joritani. A ra sa kailataki vata ko ira kecega na tamata Ifireimi, a ra sa rawata na wai ka yaco ki Peci-para, io na Joritani.

25A ra sa tauri rau na turaga kei Mitiani, ko Orepi kei Siepi, a ra sa vakamatei Orepi e na dela ni uluvatu ko Orepi, ka ra sa vakamatei Siepi mai nai butubutu ni waini nei Siepi; a ra sa qai cici muri ira na kai Mitiani; ka kauta na uludrau ko Orepi kei Siepi kivei Kitioni mai tai kadua ni Joritani.