A Kedrai Vola Na Dauveilewai 3 - AI VOLA TABU（FIJ1864）

A veimatanitu sa vo me vakatovolei kina ko ira na Isireli, 1-4. Sa ia na vakawati kei ira ko ira na Isireli, ka ra ca kina, ka ra sa soli vei ira na nodra meca, 5-8. Sa vakabulai ira ko Ocinieli, 9-11. Era sa valavala ca tale, ka ra sa soli tale vei ira na nodra meca, 12-14. Sa vakabulai ira ko Euti, ka mokuti ira na nodra meca, 15-30. Sa vakabulai ira ko Samikari talega e na dua na gauna, 31.

1IA ko ira o qo na veimatanitu ka laiva ko Jiova, me vakatovolei ira kina na Isireli, io ko ira kecega era a sega ni kila nai valu kecega mai Kenani:

2me ra kila ga kina ko ira na nodra veitabatamata na luve i Isireli, me vuli e nai valu ko ira era a sega ni kila eliu:

3E lewe lima na nodra turaga na kai Filisitia, kei ira kecega na kai Kenani, kei ira na kai Saitoni, kei ira na luve i Evi era tiko mai na ulu-ni-vanua ko Lipanoni, mai na ulu-ni-vanua ko Peali-erimoni ka yaco ki nai curucuru ki Emaci.

4Ia era sa ka me vakatovolei ira kina na Isireli, me kilai se ra na vakarorogo ki na veivunau i Jiova, sa vunautaka ko koya vei ira na nodra qase e na gusu i Mosese, se segai.

5IA e na kedra maliwa na kai Kenani, io, ko ira na luve i Eci, kei ira na luve i Amori, kei ira na lewe ni Veikoro lalai, kei ira na luve i Evi, kei ira na kai Jepusa, era sa tiko kina ko ira na luve i Isireli:

6ka ra kauti ira na nodra gonealewa me watidra, ka musuki ira na nodra gonealewa kivei ira na luvedra, a ra sa qarava na nodra veikalou.

7Ia era sa kitaka na ka e ca e na mata i Jiova ko ira na luve i Isireli, ka guilecavi Jiova na nodra Kalou, ka qaravi ira na Peali kei ira na kaloualewa ni veikau.

8A sa waqa kina na cudru i Jiova vei ira na Isireli, a sa volitaki ira ko koya ki na liga i Kusani-risaceimi na tui Mesopotemia: a ra sa qali kivei Kusani-risaceimi na luve i Isireli ka yabaki walu.

9A ra sa tagi vei Jiova ko ira na luve i Isireli, ka sa vakatubura vei ira na luve i Isireli e dua nai vakabula ko Jiova, ka vakabulai ira, io ko Ocinieli na luve i Kinasi, na taci i Kalepi.

10A sa tu na Yalo i Jiova vei koya, a sa lewai ira na Isireli ko koya, ka laʼki veivala: a sa soli Kusani-risaceimi na tui Mesopotemia ko Jiova ki na ligana; a sa gumatua na ligana vei Kusani-risaceimi.

11A sa cegu na vanua ka yabaki vasagavulu. A sa mate ko Ocinieli na luve i Kinasi.

12A ra sa kitaka tale na ka e ca e na mata i Jiova ko ira na luve i Isireli: a sa vakaukauwataki Ekiloni na tui Moapi ko Jiova, me veivala kei ira na Isireli, e na vuku ni ra sa caka ca e na mata i Jiova.

13A sa kauti ira na luve i Amoni kei Amaleki ko koya me nonai to, ka sa laʼki mokuti ira na Isireli, a ra sa mai taukena na koro ni veibalabala.

14A ra sa qali vei Ekiloni na tui Moapi ko ira na luve i Isireli ka yabaki tinikawalu.

15A sa tagi vei Jiova ko ira na luve i Isireli, a sa vakatubura vei ira ko Jiova e dua nai Vakabula ko Euti na luve i Kera, e na mataqali i Penijamini, a tamata sa malumalumu na ligana i matau: a sa talai koya ko ira na luve i Isireli me kauta e dua na ka ni loloma vei Ekiloni na tui Moapi.

16A sa cakava eliu me nona e dua nai seleiwau bati lua ko Euti, e rua na caga na kena balavu, a sa vauca o qori ki na sagana i matau, e ruku ni nonai sulu.

17A sa kauta ko koya na ka ni loloma vei Ekiloni na tui Moapi: a sa tamata uro sara ko Ekiloni.

18Ia ni sa solia oti ko koya na ka ni loloma, sa talai iratou yani na tamata eratou a kauta na ka ni loloma.

19Ia ka lesu tale ko koya mai na veimatakau sa tu mai Kilikali, ka sa kaya,

0iko na tui, sa dua na ka vei au meʼu tukuna vuni vei iko: sa qai kaya ko koya, Dou tiko lo. A sa lako tani vei koya kitautuba ko ira kecega era tu kaya.

20A sa lako mai vei koya ko Euti; a sa tiko duaduaga ko koya e na tiki-ni-vale vakamudremudre ecake, a ya sa nona. A sa kaya ko Euti, Sa dua vei au na vosa ni Kalou meʼu tukuna vei iko. A sa tu cake ko koya mai nai tikotiko vakaturaga.

21A sa dodoka na ligana i mawi ko Euti, ka kauta nai seleiwau mai na sagana i matau, ka cokavaka ki na kete i koya:

22a sa muria talega na yamena nai dia; a sa sogota na yamena na uro, ni sa sega ni ucuna ko koya nai seleiwau mai na ketena: a sa basika e muna.

23A sa curu yani kitautuba e na virada ko Euti, ka sogota vua na katuba ni tiki-ni-vale ecake, ka vakitaka.

24Ia ni sa lako yani oti ko koya, era sa lako mai nai talatala, a ra sa rai voli, ka, raica, sa vakitaki tu na katuba ni tiki-ni-vale ecake; a ra sa kaya, Sa vakara beka ko koya e na tiki-ni-vale vakamudremudre.

25Ia era sa madua ni ra wa wa; ka raica, sa sega e dua sa dolava na katuba ni tiki-ni-vale ecake; era sa qai kauta nai dola, ka dolava: ka, raica, sa bale koto na nodra turaga ki na qele, a sa mate tu.

26Ia ni ra sa berabera tiko, sa dro ko Euti, ka sivia na veimatakau, ka dro ki Seiraci.

27Ia ni sa yaco kina, sa uvuca na davui e na ulu-ni-vanua ko Ifireimi, a sa lako sobu kaya ko ira na luve i Isireli mai na ulu-ni-vanua, a sa liutaki ira ko koya.

28A sa kaya vei ira ko koya, Dou cici muri au mai, ni sa soli ira na nomudou meca na Moapi ki na ligamudou ko Jiova. A ra sa muri koya sobu, ka rawata na veiyasana era sa daulako-kosova kina na Joritani ko ira na Moapi, ka sega ni laiva e dua na tamata me lako-kosova.

29A ra sa mokuti ira na Moapi, e na gauna ko ya, e tini beka na udolu na tamata, era tamata bula sara kecega, ka tamata qaqa kecega, ia ka sega ni dro bula e lewe dua na tamata.

30A sa vakamalumalumutaki ko ira na Moapi e na ligadra na Isireli e na siga ko ya. A sa cegu na vanua ka yabaki walusagavulu.

31A sa taravi koya ko Samikari na luve i Anaci, ia sa mokuta ko koya e ono na drau vei ira na kai Filisitia, e na moto ni karavau: a sa vakabulai ira na Isireli ko koya talega.