Ai Vola Kei Josua 20 - AI VOLA TABU（FIJ1864）

A vunau e na veikoro ni drodro, 1-6. Sa lesi na veikoro ni drodro, 7-9.

1A SA vosa ko Jiova vei Josua, ka kaya,

2Mo vosa vei ira na luve i Isireli, ka kaya, Dou lesia vei kemudou na Veikoro ni drodro, kaʼu a vosa kina vei kemudou e na gusu i Mosese:

3me dro kina ko koya sa ravuravu, a ya sa mokuta-mate e dua ni sa tawa nakita, ni sa tawa kila: ia dou na dro kina maivei koya sa nonai tavi me sauma na dra.

4Ia ni sa dro ko koya ki na dua na koro o qo, ena tu ko koya e na matamata-ni-koro, ka tukuna na ka sa cakava ki na daligadra na qase ni koro ko ya, a ra na kauti koya vei ira ki loma ni koro, a ra na solia vua e dua na tikina, me tiko kina kei ira ko koya.

5Ia kevaka sa muri koya ko koya sa nonai tavi me sauma na dra, era na sega ni laivi koya ka ravuravu ki na ligana; e na vuku ni sa vakamatea na wekana ka tawa kila, ka tawa cati koya eliu.

6Ia ena tikoga ko koya e na koro ko ya, ka yaco ki na siga ena tu kina e matadra nai vavakoso me lewai, me yaco mada na mate ni bete levu ko koya sa bula e na veisiga ko ya: me na qai lesu ko koya sa ravuravu, ka lako ki na nona koro, kei na nona vale, ki na koro ka dro tani maikina.

7A ra sa lesi Ketesi mai Kalili e na ulu-ni-vanua ko Nafitali, kei Sikemi mai na ulu-ni-vanua ko Ifireimi, kei Kiriaci-aripa (a ya ko Epironi) mai na ulu-ni-vanua nei Juta.

8Ia mai tai kadua ni Joritani, ka donui Jeriko kivaka ki cake, era lesi Peseri mai na lekutu, mai na buca, mai na yavusa i Rupeni, kei Ramoci mai Kiliati, mai na yavusa i Kata, kei Kolani mai Pasani, mai na yavusa i Manase.

9O qo na veikoro sa lesi vei ira kecega na luve i Isireli, kei ira na vulagi sa tiko vulagi kei ira, me dro kina na tamata kecega sa mokuta-mate e dua ni sa tawa nakita, a me kakua ni mate e na liga i koya sa nonai tavi me sauma na dra, ka me tu mada eliu e na matadra nai vavakoso.