Ai Vola Kei Josua 16 - AI VOLA TABU（FIJ1864）

A nodraui votavota na luve i Josefa, 1-4. Ai votavota nei Ifireimi, 5-10.

1IA na nodraui votavota na luve i Josefa, sa mai na tiki ni Joritani sa voleka ki Jeriko, mai na wai ni Jeriko e na yasana ki cake, vaka ki na veikau sa lako cake mai Jeriko e na loma ni ulu-ni-vanua mai Peceli,

2a sa lako mai Peceli ki Lusa, ka lako yani ki nai yalayala i Ariki ki Ataroci,

3a sa lako sobu vaka ki ra ki nai yalayala i Yafileti, ka lako ki nai yalayala i Peci-oroni maira, ka yaco ki Keseri: ia na kenai mudumudu na waitui.

4Ia era sa rawata na nodrai votavota na luve i Josefa, ko ira na Manase kei na Ifireimi.

5Ia nai yalayala ni nodra tikina na luve i Ifireimi me vaka na nodra veimataqali: io nai yalayala ni nodra tikina e na yasana ki cake ko Ataroci-atari, ka yacovi Peci-oroni maicake;

6a sa lako yani nai yalayala kivaka ki na waitui ki Mikimica, ki na tokalau; a sa lako voli nai yalayala vaka ki cake ka yacovi Teenaci-silo, ka sivia e na yasana ki cake, ka yaco ki Yanoa;

7a sa lako sobu mai Yanoa ki Ataroci, kei Neeraci, ka yacovi Jeriko, ka laʼki oti mai na Joritani.

8Sa lako yani mai Tapua nai yalayala, ka lako vaka ki ra, ka yaco ki na uciwai ko Kana; ia na kenai mudumudu na waitui. O qo nai votavota ni nodra yavusa na luve i Ifireimi, me vaka na nodra veimataqali.

9Ia na nodra Veikoro na luve i Ifireimi sa sega ni no e na nodra tikina, sa no e na nodra tikina na luve i Manase; na koro kecega kei na kedra Veikoro lalai.

10A ra sa sega ni vakasevi ira tani na kai Kenani ka tiko mai Kiseri. Ia sa tiko ga na kai Kenani e na kedra maliwa na luve i Ifireimi ka yacova na siga o qo, ka sa qali.