Ai Vola Kei Josua 7 - AI VOLA TABU（FIJ1864）

Sa kilai na kocokoco i Akani, a sa cudruvi ko koya.

1IA ka ra sa vakacataka na tabu ko ira na luve i Isireli e na ka sa lesi me vakarusai: ni sa tara e so na ka sa lesi me vakarusai ko Akani, na luve i Karimi, na luve i Sapiti, na luve i Sera, e na yavusa i Juta: a sa waqa mai na cudru i Jiova vei ira na luve i Isireli.

2A sa tala na tamata e so ko Josua mai Jeriko ki Ai, o qori sa voleka ki Peci-aveni, mai na tu i cake ki Peceli, a sa vosa vei ira, ka kaya, Dou lako cake, ka rai vanua. A ra lako cake na tamata ka yamata ki Ai.

3A ra lesu vei Josua, ka kaya vua, Me kakua ni lako cake na tamata kecega; me rua beka ga na udolu na tamata, se tolu na udolu, me lako cake ka samuti Ai; me kakua ni oca na tamata kecega ni ra lako kina, ni sa lewe lailai ga ko ira o qori.

4A sa lako cake kina e tolu beka na udolu na tamata maivei ira na tamata: a ra drotaki ira na kai Ai.

5A sa mokuta e lewe tolusagavulu ka ono beka vei ira ko ira na kai Ai: ka vakasavi ira mai na matamata-ni-koro, ka yaco ki Siparimi, ka ra mokuti ira e nai sobusobu: a sa malumalumu na yalodra na tamata, a ra sa waicala.

6A sa dresuka na nonai sulu ko Josua, ka bale vakatobocu ki na qele e na mata ni kato i Jiova, ka yakavi mai, o koya kei ira na qase ni Isireli, ka viria na kuvu ni qele ki na buradeladra.

7A sa kaya ko Josua, Ule. Turaga, Jiova, e na vuku ni cava ko sa kauti ira kina na tamata o qo ki na tai o qo ni Joritani, me soli keimami ki na ligadra na luve i Amori, me keimami vakarusai kina? ia kevaka keimami a lasa e na tai kadua ni Joritani ka tiko kina, ke sa vinaka!

8Oi, Turaga, a cava meʼu kaya ni ra sa vakanadaku mai na Isireli vei ira na nodra meca?

9Ia era na rogoca na kai Kenani kei ira kece sa tiko e na vanua o qo, a ra mai vakavolivolita keimami, ka vakaotia na yaca i keimami e vuravura, ia ka cava ko na cakava e na vuku ni yacamu levu?

10A sa kaya vei Josua ko Jiova, Tu cake; a cava ko sa bale vakatobocu kina vakaoqo?

11Sa kitaka oti nai valavala ca ko ira na Isireli, a sa vakacataka na noqu veiyalayalati kaʼu a cakava vei ira mei vakaro: ia era sa tara e so na ka sa lesi me vakarusai, a ra sa butakoca, ka lasu talega, ka viria vata talega kei na nodra yau.

12Ia era tawa tu rawa kina ko ira na luve i Isireli e na matadra na nodra meca; era sa vakanadaku mai e na matadra na nodra meca, e na vuku ni ra sa mai lesi me vakarusai: au na sega tale ni tiko kei kemuni, kevaka dou na sega ni vakaotia na ka sa lesi me vakarusai me kua ni tiko vei kemuni.

13Tu cake, mo vakasavasavataki ira na tamata, ka kaya, Ni vakasavasavataki kemuni ka waraka na mataka: ni sa vosa vakaoqo ko Jiova na Kalou nei Isireli, Sa tu na ka sa lesi me vakarusai vei kemuni, na Isireli: kemuni na sega ni tu rawa e na matadra na nomuni meca, mo ni biuta tani mada na ka sa lesi me vakarusai me kua ni tiko vei kemuni.

14E na sabogibogi dou na toro mai vakayavusa: ia na yavusa sa cavuta ko Jiova, ena toro mai vakamataqali; ia na mataqali sa cavuta ko Jiova, ena toro mai vakavuvale; ia na vuvale sa cavuta ko Jiova, ena toro mai na tamata vakayadua.

15Ia ko koya sa cavuti ni sa tu vua na ka sa lesi me vakarusai, ena vakamai e na buka, ko koya kei na nona ka kecega: e na vuku ni sa vakacataka na veiyalayalati i Jiova, ka ni sa kitaka na ka vakalialia e Isireli.

16A sa sou ko Josua e na sabogibogi, ka kauti ira mai na Isireli me vaka na nodra veiyavusa; a sa cavuti na yavusa i Juta.

17A sa kauti ira mai na mataqali i Juta; a sa cavuti na nodra mataqali na luve i Sera: a sa kauta mai na nodra mataqali na luve i Sera na tamata vakayadua; a sa cavuti ko Sapiti:

18a sa kauta mai ko koya na nona vuvale na tamata vakayadua; a sa cavuti ko Akani, na luve i Karimi, na luve i Sapiti, na luve i Sera, e na yavusa i Juta.

19A sa kaya vei Akani ko Josua, Na luvequ, mo vakavinavinaka mada vei Jiova na Kalou nei Isireli, ka vakatusa vua; ka tukuna mada vei au na ka ko sa cakava; kakua ni vunia vei au.

20A sa vosa vei Josua ko Akani, ka kaya, E dina kaʼu a kitaka nai valavala ca vei Jiova na Kalou nei Isireli, ia kaʼu sa kitaka vaka:

21Niʼu a raica ni sa tu vata kei nai toki ni valu e dua nai sulu vinaka mai Sainari, kei na siliva e rua na drau na sikeli, kei na dua na uma ni koula sa limasagavulu na sikeli na kena bibi, au a qai kocova, ka kauta; ka, raica, sa vuni e na qele e na loma ni noqu vale, ia na siliva sa tu e rukuna.

22A sa tala e so nai talatala ko Josua, ka ra cici ki na vale, ka, raica, sa vuni tu e nona vale, kei na siliva sa tu e rukuna.

23A ra sa kauta na veika o qo, mai na loma ni vale, ka kauta vei Josua, vei ira talega na luve i Isireli kecega, a ra viria yadua e na mata i Jiova.

24Ia ko Josua, kei ira vata kaya na Isireli kecega, era kauti Akani na luve i Sera, kei na siliva, kei nai sulu, kei na uma ni koula, kei iratou na luvena tagane, kei iratou na luvena alewa, kei na nona veika-ravau, kei na nona veiasa, kei na nona vei-sipi, kei na nona vale, kei na nona ka kecega; a ra sa kauti ira ki na buca i Akori.

25A sa kaya ko Josua, A cava ko sa vakararawataki keimami kina? ena vakararawataki iko e na siga edaidai ko Jiova. A sa viriki koya e na vatu ko ira kecega na Isireli; ia era vakamai ira e na buka, ka viriki ira e na vatu.

26A ra binia e delana nai binibini vatu levu, a ya sa tu edaidai. A sa saumaki ko Jiova mai na katakata ni nona cudru. O koya o qo sa vakatokai kina na yaca ni tikina ko ya, Na buca i Akori, ka yacova na siga edaidai.