Ai Vola Kei Josua 4 - AI VOLA TABU（FIJ1864）

Sa kau yani mai na Joritani na vatu e tinikarua, ka vakaturi mai Kilikali, mei vakatakilakila ni ka lako-kosova na Joritani e na qele mamaca ko ira kecega na Isireli.

1IA ni sa lako-kosova oti na Joritani na matanitu taucoko, sa qai vosa ko Jiova vei Josua, ka kaya,

2Dou lesia vei kemudou na tamata e le tinikarua maivei ira na tamata, me tauyadua mai na veiyavusa,

3ka vakaroti iratou, ka vakaoqo, Dou laveta cake vei kemudou eke, na vatu e tinikarua, mai na loma ni Joritani, mai na tikina ka tu dei kina na yavadra na bete, ka kauta vei kemudou ki na tai kadua, ka laiva tu e na tikina dou na moce kina e na bogi o qo.

4A sa kaciva na tamata e tinikarua ko Josua, ko iratou ka lesia eliu ko koya maivei ira na luve i Isireli, na tamata tauyadua mai na veiyavusa:

5a sa kaya vei iratou ko Josua, Dou liutaka na kato i Jiova na nomudou Kalou, ki na loma ni Joritani, ka tauca me tauyadua na tamata na nona vatu me nonai colacola, me vaka nai wiliwili ni nodra veiyavusa na luve i Isireli:

6mei vakatakilakila vei kemudou o qo, ni ra na taroga na luvemudou e na gauna maimuri, ka kaya, Mei cavai na veivatu o qo vei kemudou?

7dou na qai kaya vei ira, Sa muduki na wai ni Joritani e na mata ni kato ni veiyalayalati i Jiova: ni sa lako-kosova o qori na Joritani, sa muduki na wai ni Joritani: ia na veivatu o qo nai vakatakilakila vei ira na luve i Isireli e na gauna kecega.

8A sa kitaka vakaoqo ko ira na luve i Isireli me vaka ka vakarota ko Josua, ka ratou laveta na vatu e tinikarua mai na loma ni Joritani, me vaka ka kaya ko Jiova kivei Josua, me vaka nai wiliwili ni nodra veiyavusa na luve i Isireli, ka ratou a kauta voli ki na tai kadua, ki na tikina era moce kina, ka laiva tu maikeri.

9Ia ka vakatura cake tale ko Josua na vatu e tinikarua e na loma ni Joritani, e na tikina ka tu kina na yavadra na bete ka colata na kato ni veiyalayalati: a sa tu maikina ka yacova na siga o qo.

10A sa tu e na loma ni Joritani ko ira na bete ka colata na kato, me oti mada eliu na ka kece ka vakarota ko Jiova vei Josua me vosataka vei ira na tamata, me vaka na ka kecega ka kaya ko Mosese vei Josua: a ra sa kusarawa na tamata ni ra lako ki tai kadua.

11A sa yaco, ni sa oti na tamata kecega ni ra lako ki tai kadua, sa qai lako ki tai kadua na kato i Jiova, kei ira na bete, me liutaki ira na tamata.

12Ia ko ira na luve i Rupeni, kei ira na luve i Kata, kei na dua na wase ni yavusa i Manase, era sa lako vakaiyaragi ka liutaki ira na luve i Isireli, me vaka ka vosa vei ira ko Mosese:

13era vasagavulu beka na udolu sa vakaiyaragi ki nai valu, ka lako e na mata i Jiova ki tai kadua, ki na cecelevu mai Jeriko, me valu.

14E na siga ko ya sa vakalevutaki Josua kina ko Jiova e na matadra kecega na Isireli, ka ra rerevaki koya, e na veisiga kecega sa bula kina ko koya, me vaka era a rerevaki Mosese.

15A sa vosa ko Jiova vei Josua, ka kaya,

16Mo vakaroti ira na bete era sa colata na kato ni vunau, me ra lako cake mai na Joritani.

17A sa vakaroti ira na bete ko Josua, ka kaya, Dou lako cake mai na Joritani.

18Ia ni ra sa lako cake mai na loma ni Joritani ko ira na bete ka colata na kato ni veiyalayalati i Jiova, ka sa cavuti cake na qeteqete ni yavadra na bete ki na qele mamaca, sa qai lesu tale mai na wai ni Joritani, ki na nona tikina, ka vuabale na batina kecega, me vaka eliu.

19A ra lako cake mai na Joritani na tamata e na kenai katini ni siga e nai matai ni vula, ka ra tiko mai Kilikali, mai na kena yasana kivaka ki cake ki Jeriko.

20Ia na vatu e tinikarua ko ya, ka ratou kauta mai na Joritani, sa vakatura ko Josua mai Kilikali.

21A sa vosa ko koya vei ira na luve i Isireli, ka kaya, Ni ra na taroga na tamadra na luvemudou e na gauna maimuri, ka kaya, Mei cavai na veivatu o qo?

22dou na qai vakatakila vei ira na luvemudou, ka kaya, Sa lako-kosova na Joritani o qo ko ira na Isireli e na qele mamaca.

23Ni sa vakadiva e na matamudou ko Jiova na nomudou Kalou na wai ni Joritani, mo dou lako oti mada ki na tai kadua, me vaka ka cakava ko Jiova na nomudou Kalou ki na Wasa Damudamu, a ya ka vakadiva ko koya e na matada me da lako oti mada ki na tai kadua:

24me kila kina na lewe ni vanua kecega, ni sa kaukauwa na liga i Jiova, ka mo dou rerevaki Jiova kina na nomudou Kalou e na gauna kecega.