1A sa vakarota ko Josefa na tamata ka lewa na nona vale, ka vaka, Mo vakasinaita na nodra taga na tamata e na kakana, me vaka na ka era kauta rawa, ka viria na nonai lavo na tamata yadua ki na gusu ni nona taga:
2kei na mequ bilo, na bilo siliva, mo viria ki na gusu ni nona taga sa gone, kei nai lavo ni nona sila. A sa cakava ko koya me vaka na vosa ka vosataka ko Josefa.
3Ni sa kida na mataka, era sa talai yani na tamata, ko ira kei na nodra asa.
4Ni ra sa lako tani e na koro, ka sa sega ni vakayawa, sa kaya ko Josefa vua na tamata ka lewa na nona vale, Mo ia, mo muri ira na tamata; ia ni ko sa yacovi ira, mo qai kaya vei ira, A cava kemudou sa caka ca kina mei sau ni vinaka?
5sa sega beka o qo sa gunu maikina na noqu turaga, kei na ka sa kila-ka kina? dou sa caka ca e na ka dou sa cakava.
6A sa yacovi ira ko koya, ka vosataka vei ira na vosa o qo.
7A ra sa kaya vua, A cava sa vosataka na vosa vakaoqo kina na noqu turaga? me yawa sara vei ira na nomu tamata me kitaka na ka vakaoqori:
8raica, nai lavo keitou a kunea e na gusu ni neitou taga, keitou a kauta tale mai kivei iko mai na vanua ko Kenani: keitou na qai butakoca vakacava na siliva se na koula mai na vale ni nomu turaga?
9o koya vei ira na nomu tamata sa kune kaya, me mate ko koya; ia koi keitou, keitou na nona bobula na noqu turaga.
10A sa kaya ko koya, Me vaka mada ga na nomudou vosa: o koya sa kune vua ena noqu bobula; ia koi kemudou, dou na tawa cala ga.
11A ra sa kusarawa, ka tauca sobu ki na qele na tamata yadua na nona taga, ka sereka yadua na nona taga.
12A sa vakasaqara ko koya, sa vakatekivu vei koya sa qase, ka vakaotia vei koya sa gone: a sa kune na bilo e na taga i Penijamini.
13A ra sa dresuka na nodrai sulu, ka vakavodoka na tamata yadua na nona taga ki na nona asa, ka lesu ki na koro.
14A ra sa lako mai ko Juta kei na veitacini ki na vale i Josefa; ni sa tikotiko ga kina ko koya: a ra sa bale ki na soso e matana.
15A sa kaya vei ira ko Josefa, A cakacaka cava o qo dou sa cakava? dou sa lecava beka ni sa rawarawa sara ki na tamata sa vakai au me kila-ka?
16A sa kaya ko Juta, A cava keitou na kaya vua na noqu turaga? a cava me keitou vosataka? se keitou na vakadonui keitou vakacava? sa kunea na Kalou na nodra cala na nomu tamata: raica, koi keitou na nona tamata na noqu turaga, koi keitou, kei koya sa kune e ligana na bilo.
17A sa kaya ko koya, Me yawa sara vei au meʼu cakacaka vakaoqori; a tamata sa kune e ligana na bilo, o koya ga ena noqu tamata; ia koi kemudou, dou lako vakacegu vua na tamamudou.
18Sa qai toro vua ko Juta, ka kaya, Noqu turaga, laiva mada na nomu tamata me vosataka e dua na vosa e daligana na noqu turaga, ia me kakua ni waqa na nomu cudru vua na nomu tamata: ni ko sa vakataki Fero.
19A noqu turaga sa tarogi ira na nona tamata eliu, ka vaka, Sa dua li na tamamudou, se na tacimudou?
20Ia keitou a kaya vua na noqu turaga, Sa dua na tama i keitou, a qase, a sa dua sa luvena ni sa qase, a gone; a sa mate na tuakana, ia ko koya duaduaga i tinana sa vo, a sa lomani koya ko tamana.
21Ia ko a kaya vei ira na nomu tamata, Dou kauti koya sobu mai vei au, me dikevi koya na mataqu.
22Ia keitou a kaya vua na noqu turaga, E dredre ni lako tani vei tamana na gone: ni na mate ko tamana, kevaka sa lako tani vua.
23O a qai kaya vei ira na nomu tamata, Kevaka sa sega ni lako sobu mai kei kemudou na tacimudou sa gone, dou na tawa raica tale na mataqu.
24Ia sa yaco ni keitou a lako vua na nomu tamata na tamaqu, keitou sa qai tukuna vua na nona vosa na noqu turaga.
25A sa kaya na tama i keitou, Dou lako tale, volia vakalailai na keda.
26Keitou sa qai vaka, E dredre na neitou lako sobu; kevaka sa tiko kei keitou na taci i keitou sa gone, keitou na qai lako sobu: ni sa tabu ni keitou raica na matana na tamata, kevaka sa sega ni tiko kei keitou na taci i keitou sa gone.
27A sa kaya vei keitou na nomu tamata na tamaqu, Dou sa kila ni ka vakasucuma vei au ko watiqu e rua:
28e dua sa lako tani vei au, kaʼu a kaya, Sa basuki vakaidina ko koya; ia kaʼu sa tawa raica ka yacova na gauna o qo:
29ia kevaka kemudou kauta o qo talega yani vei au, a sa yacovi koya na ca, dou na qai vakayacora na noqu sika ki nai bulubulu e na rarawa.
30Ia o qo, niʼu sa lako vua na nomu tamata na tamaqu, a sa sega ni tiko kei keitou na gone; (e na vuku ni sa vauci vata na nodrau bula;)
31io ena yaco, ni sa raica ni sa yali na gone, ena qai ciba ko koya: ia ena vakayacora kina ko ira na nomu tamata na nona sika na nomu tamata na tama i keitou ki nai bulubulu e na rarawa:
32ni sa yaco na nomu tamata mei koya me taroga na tamaqu e na vuku ni gone ke sa yali, ka kaya, Kevaka kaʼu sa tawa kauti koya mai vei iko, meʼu qai cala vei iko na tamaqu, ka tawa mudu.
33Ia o qo, me tiko mada na nomu tamata mei sau ni gone, me nona bobula na noqu turaga; ia me lako cake na gone kei ira na tuakana.
34Niʼu na lako cake vakacava vei tamaqu, ni sa tawa tiko kei au na gone? deʼu raica na ca ena yacovi tamaqu.
Who We AreWhat We EelieveWhat We Do
2025 by iamachristian.org,Inc All rights reserved.
