1UJehoshafati indodana yakhe waba yinkosi esikhundleni sakhe, wamqinisa ngokumelene no-Israyeli.
2Wamisa impi emizini yonke ebiyelweyo yakwaJuda, wamisa amakhanda ezweni lakwaJuda nasemizini yakwa-Efrayimi u-Asa uyise ayithathileyo.
3UJehova wayenaye uJehoshafati, ngokuba wahamba ngezindlela zokuqala zikayise uDavide, akabafunanga oBali;
4kepha wafuna uJehova uNkulunkulu kayise, wahamba ngemiyalo yakhe, kungenjengokwenza kuka-Israyeli.
5Ngakho uJehova wawuqinisa umbuso esandleni sakhe; wonke uJuda waletha izipho kuJehoshafati; wayenengcebo nodumo ngokuchichimayo.
6Inhliziyo yakhe yathokoza ngezindlela zikaJehova, wasusa izindawo eziphakemeyo nemithi engcwele kwaJuda.
7Ngomnyaka wesithathu wokubusa kwakhe wathumela ezikhulwini zakhe, oBeni-hayili, no-Obadiya, noZakariya, noNethaneli, noMikaya, ukufundisa emizini yakwaJuda.
8Wathuma kanye nabo amaLevi, oShemaya, noNethaniya, noZebadiya, no-Asaheli, noShemiramoti, noJonathani, no-Adoniya, noThobiya, noThobadoniya, amaLevi; kanye nabo o-Elishama noJoramu, abapristi.
9Bafundisa kwaJuda, benencwadi yomthetho kaJehova, badabula imizi yakwaJuda, bafundisa abantu.
10Ukwesaba uJehova kwehlela yonke imibuso yamazwe ahanqe uJuda, kangangokuthi ayizange ilwe noJehoshafati.
11Nabanye bamaFilisti baletha izipho nemali yentela kuJehoshafati; ama-Arabhu aletha kuye imihlambi, izinqama eziyizinkulungwane eziyisikhombisa namakhulu ayisikhombisa nezimbuzi eziyizinkulungwane eziyisikhombisa namakhulu ayisikhombisa.
12UJehoshafati waba mkhulu kakhulu; wakha izinqaba nemizi yengcebo kwaJuda.
13Wayenezindaba eziningi emizini yakwaJuda, namadoda empi, amaqhawe anamandla, eJerusalema.
14Lezi ziyizibalo zabo ngokwezindlu zoyise: kwaJuda: izikhulu phezu kwenkulungwane; u-Adna inhloko, kanye naye amaqhawe anamandla ayizinkulungwane ezingamakhulu amathathu.
15Eceleni kwakhe kwakunguJohanani inhloko, kanye naye izinkulungwane ezingamakhulu amabili namashumi ayisishiyagalombili.
16Eceleni kwakhe kwakungu-Amasiya indodana kaSigri, owazinikela ngokuzithandela kuJehova; kanye naye amaqhawe anamandla ayizinkulungwane ezingamakhulu amabili.
17LakwaBenjamini; u-Elijada, iqhawe elinamandla, kanye naye abahlome iminsalo nesihlangu abayizinkulungwane ezingamakhulu amabili.
18Eceleni kwakhe kwakukhona uJozabadi, futhi kanye naye abayizinkulungwane eziyikhulu namashumi ayisishiyagalombili abahlomele impi.
19Bakhonza inkosi, ngaphandle kwalabo inkosi eyayibabekile emizini ebiyelweyo kulo lonke elakwaJuda.
Who We AreWhat We EelieveWhat We Do
2025 by iamachristian.org,Inc All rights reserved.
