Vei Ira Na Iperiu 4 - AI VOLA TABU（FIJ1864）

Sa yalataki vei keda nai vakavakacegu ka yalataki vei ira na Isireli eliu; ia ko ira sa tawa vakabauta era na tawa yaco kina, 1-13. Sa qai tukuna ko Paula nai valavala ni noda Bete Levu, 14-16.

1O KOYA o qo me da qai rere, ni sa maroroi tu na vosa ni yalayala me da curu ki na nonai vakavakacegu, de sega beka ni yaco dina kina koi kemudou e so.

2Ni sa tukuni mai vei keda e dua na ka vinaka, me vaka vei ira: ia ka sega ni yaga vei ira na vosa era sa rogoca, ni sa sega ni veiwaki vata kei na vakabauta vei ira sa vakarogoca.

3Ni da sa qai curu ki nai vakavakacegu, koi keda sa vakabauta, me vaka sa vosa kina ko koya, Me vaka kaʼu a bubului kina e na noqu cudru, Era na sega sara ni curu ki na noqui vakavakacegu: io, ni sa dina ya ni ka oti na cakacaka ni sa tauyavutaki oti ko vuravura.

4Ni sa dua na tikina sa vosataka vakaoqo ko koya nai kavitu ni siga, A sa vakacegu na Kalou e na kenai kavitu ni siga mai na nona cakacaka kecega.

5Ia eke talega, Era na sega sara ni curu ki na noqui vakavakacegu.

6O koya o qo ni sa vo me curu kina e so, a ra sa sega ni curu kina ko ira ka tukuni taumada vei ira na ka vinaka, e na vuku ni tawa vakabauta:

(

7a sa qai lokuca tale e dua na siga ko koya, ka sa gusu i Tavita sa kaya kina, E na siga o qo, ni sa oti na gauna balavu; me vaka sa kainaki, E na siga o qo, kevaka dou sa via rogoca na domona, kakua ni vakaukauwataka na yalomudou.

8Io, kevaka sa solia vei ira nai vakavakacegu ko Josua, ena sega ni vosataka tale ko koya e dua tani na siga.

9O koya o qo sa vo kina nai vakavakacegu me nodra na tamata ni Kalou.

10Ia ko koya sa curu ki na nonai vakavakacegu, sa vakacegu mai na nona cakacaka, me vaka na Kalou mai na nona.)

11O koya o qo me da qai gumatua sara me da curu ki nai vakavakacegu o qori, de bale e dua na tamata e nai valavala sa tautauvata ni sa tawa vakabauta.

12Ni sa bula na vosa ni Kalou, ka kaukauwa, ka gata vakalevu ka mucu ga nai seleiwau taki-veiyamena, ka suaka me wasea rua kina na lomada kei na yaloda, kei na nodai sema kei na uto ni sui, a sa lewa rawa na nanuma kei na nakita ni yaloda.

13A sa sega talega e dua na ka e tawa rairai e matana: ia sa luvawale ga na ka kecega, ka vakaraitaki sara, e na mata i koya eda na vakatusai keda vua.

14IA ni sa dua na noda bete levu, o koya ka curu ki lomalagi, o Jisu na Gone ni Kalou, tou taura matua na vakatusa.

15Ni sa sega ni noda bete levu ko koya sa tawa lomani keda rawa ni da sa malumalumu; ia ka sa dauveretaki tautauvata e na ka kecega ko koya, ia ka sega na nonai valavala ca.

16E na vuku ni ka o qori tou toro doudou kina ki nai tikotiko-vakaturaga loloma, me da vinakati kina, me da lomani talega ka vukei kina e na gauna e yaga kina.