1 Timoci 2 - AI VOLA TABU（FIJ1864）

Sa tukuna ko koya ni sa vinaka me ia na masulaki ira na tamata kecega, 1-8. Sa tukuna, na ka e kilikili kei ira na yalewa, 9-15.

1O KOYA o qo kaʼu sa vakarota kina, me ia mada eliu na masumasu, na kerekere, na veimasulaki, na vakavinavinaka, e na vukudra na tamata kecega:

2e na vukudra na tui, kei ira kecega era turaga; me da tiko vinaka kina ka vakacegu, me da ia nai valavala kece sa vakalotu ka kilikili:

3ni sa dodonu o qo, a sa vinaka talega e na mata ni Kalou na nodai Vakabula;

4o koya sa vinakata me bula na tamata kecega, ka mai kila sara nai vakavuvuli dina.

5Ni sa dua bauga na Kalou, a sa dua bauga na dauveisorovaki, e na macawa ni Kalou kei ira na tamata, io, na tamata ko Karisito Jisu;

6o koya sa soli koya me kedrai voli na tamata kecega, a ka sa tukuni e na kena gauna.

7O qori kaʼu a lesi kina meʼu vunau meʼu apositolo talega, (au sa vosataka na dina e na mata i Karisito, au sa sega ni lasu;) meʼu nodrai vakavuvuli na veimatanitu e na vakabauta kei nai vakavuvuli dina.

8O koya o qo kaʼu sa vinakata kina me masu ko ira na tagane e na yasana kecega, ni ra sa laveta cake na liga savasava, ka sega na cudru kei na veiba.

9Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua; me kakua ni tali na drau ni uludra, me sega ni vakoula, se na mata-ni-civa, se nai sulu talei;

10a ya ga (me vaka sa kili kei ira na yalewa era kaya ni ra sa lotu) e nai valavala vinaka.

11Me tiko lo na yalewa ka vakatavulici, ka vakamalumalumutaki koya vakalevu.

12Ia kaʼu sa sega ni laiva na yalewa me yaco mei vakavuvuli, se viaviaturaga vei koya na tagane, ka me tiko lo ga.

13Ni ka buli taumada ko Atama, ka muri ko Ivi.

14A sa tawa temaki ko Atama; ia na yalewa ga sa temaki, a sa ia kina na talaidredre,

15Ia ena vakabulai ga ni sa vakasucu gone, kevaka era sa tu dei e na vakabauta, kei na loloma, kei na yalosavasava, kei na yalomatua.