Vei Ira Na Kai Kolosa 1 - AI VOLA TABU（FIJ1864）

A WASE I. —Sa vakavinavinaka e na vukudra ko Paula, a sa vakadinadinataka nai vakavuvuli kei Karisito, a sa masulaki ira, a sa qai tukuni Jisu kei na nodra bula e na vukuna, 1-29.

1O PAULA, nai apositolo i Jisu Karisito e na veitalia ni Kalou, o Timoci talega na taciqu,

2vei ira era sa lotu ka veiwekani dina, era sa tu vata kei Karisito, era sa tiko mai Kolosa: Me nomudou na loloma, kei na vakacegu, mai vua na Kalou ko Tamada kei na Turaga ko Jisu Karisito.

3Keirau sa vakavinavinaka vua na Kalou na Tama i Jisu Karisito na noda Turaga, ka masulaki kemudou e na veisiga,

4ni keirau a rogoca na nomudou vakabauti Karisito Jisu, kei na nomudou loloma vei ira kecega era sa lotu,

5e na vuku ni ka dou sa vakanuinuitaka, a ya sa maroroi mai lomalagi me nomudou, ia dou a rogoca kina e na vosa dina ni tukutuku-vinaka,

6sa yaco vei kemudou, me vaka talega ki vuravura taucoko; a sa vuataka na vuana, me vaka talega kina vei kemudou, a sa vakatekivu vata kei na siga dou a rogoca kina, ka kila dina na loloma ni Kalou:

7me vaka talega ni dou a kila maivei Epafira, a neiraui tokani daulomani, ia nai talatala yalodina i Karisito vei kemudou:

8o koya talega sa tukuna vei keirau na nomudou loloma e na Yalo.

9E na vuku ni ka o qo koi keirau talega, sa vakatekivu vata kei na siga keirau a rogoca kina, keirau sa tawa mudu kina ni masulaki kemudou, ka masu mo dou vakasinaiti e na kila na nona veitalia, e na yalomatua kei na vuku vakayalo kecega;

10mo dou ia nai valavala e kilikili kei ira sa nona na Turaga, me vinakata kecega ko koya, mo dou vua e na cakacaka vinaka kecega, me tubu cake talega na nomudou kila na Kalou;

11mo dou kaukauwa mai e na kaukauwa kecega, me vaka na nona kaukauwa vakaidina, me tubu na vosota kecega kei na vosota vakadede e na marau;

12mo dou vakavinavinaka vua na Tamada, o koya sa vakarautaki keda me da rawata na kedrai votavota era sa yalosavasava, e na rarama:

13o koya sa vakabulai keda mai na lewa ni butobuto, a sa kauti keda ki na nona matanitu na nona Gone ni toko:

14vei koya eda sa rawata kina na bula e na vuku ni nona dra, ni sa bokoci nai valavala ca:

15a yaloyalo ni Kalou tawa rairai ko koya, ka vakasikavi eliu ka qai muri na ka kecega ka caka:

16ni sa cakava na ka kecega ko koya, se ra tu mai lomalagi, se ra tu e vuravura, se ra rairai se ra tawa rairai, se ra veitikotiko vakaturaga, se ra veimatanitu, se ra turaga sa liu, se ra turaga kaukauwa; sa cakava na ka kecega ko koya, me nona talega;

17a sa bula eliu ko koya sa muri na ka kecega, a sa vakataudeitaka na ka kecega ko koya.

180 koya na ulu talega ni yago, a ya nai vavakoso lewe ni soro: o koya nai vakatekivu, na ulumatua mai na mate; me uasivi cake kina ko koya e na ka kecega.

19Ni sa vinakati me sinai ko koya e na ka kecega;

20ka me vakaveivinakatitaki ira kaya na ka kecega e na vukuna, ni sa ia mada na ka ni veivinakati e na nona dra ni sa lauvako ki na kauveilatai; io, e na vukuna ga, se ra tu e vuravura se ra tu mai lomalagi.

21Oi kemudou talega, dou a kai tani eliu ka meca e na vu ni yalomudou e na cakacaka ca, sa qai vakaveivinakatitaki kemudou ko koya,

22e na yagona vakalewe ni sa mate, me vakarairaitaki kemudou kina ni dou sa yalosavasava ka tawa beitaki rawa ka tawa vunauci rawa e matana:

23kevaka dou sa vakabauta tikoga ka vakataudeitaki ka vakaukauwataki, ka tawa vukici tani mai nai nuinui ni tukutuku-vinaka, a ya dou a rogoca, a ya ka vunautaki vei ira na tamata kecega sa tu e na ruku i lomalagi; ia koi au ko Paula au sa qisi me kenai talatala.

24Au sa qai marau niʼu sa vakararawataki e na vukumudou, ka vakayacora e na yagoqu na kena vo ni rarawa e na vuku i Karisito, e na vuku ni yagona, ko ya nai vavakoso lewe ni soro:

25au sa qisi kina meʼu kenai talatala, me vaka nai lesilesi ni Kalou, au sa lesi kina e na vukumudou, me vakayacora na vosa ni Kalou;

26na ka vuni ka vunitaki maivei ira nai tabatamata e na gauna eliu, a sa qai vakaraitaki mai vei ira na nona tamata yalosavasava:

27ni sa vinakata ko na Kalou me vakatakila vei ira na kena vakaidina kei na kena talei ni ka vuni o qo e na kedra maliwa na veimatanitu; o qori ko Karisito e na lomamudou, na vu ni vakanuinuitaka na kalougata:

28o koya keitou sa vunautaka, ni keitou sa vunauca tiko na tamata yadua, ka vakavulica na tamata yadua e na vuku kecega; me keitou vakaraitaka kina na tamata yadua, me tawa cala ni sa tu vei Karisito Jisu:

29o qo na ka kaʼu sa daucakacaka talega kina, ka gumatua me vaka na nona cakacaka sa kitaka vakaukauwa e na lomaqu.