Vei Ira Na Kai Efeso 6 - AI VOLA TABU（FIJ1864）

Me dautalairawarawa ko ira na gone kei ira nai talatala vei ira na nodra qase, me ra yalovinaka talega na qase vei ira, 1-9. Me da taura kecega nai yaragi ni Kalou, 10-20. Sa tukuni Tikiko vei ira ko koya, a sa tinia na nonai vola, 21-24.

1OI kemudou na gone, dou talairawarawa vei ira na nomudou qase e na ka sa vinaka vua na Turaga: ni sa dodonu o qo.

2Mo vakarokoroko vei rau na tamamu kei na tinamu; (o qori na vunau taumada sa vakaikuritaki e na vosa ni yalayala;)

3mo vinaka kina, mo bula vakadede talega e vuravura.

4Oi kemudou talega na qase, dou kakua ni vakacudrucudrui ira na nomudou gone: ia dou vakavulici ira e ua vunau kei nai vakavuvuli ni Turaga.

5Oi kemudou na tamata, dou talairawarawa vei ira na nomudou turaga vakayago, e na rere kei na sautaninini, e na loma e dua bauga me vaka vei Karisito;

6mo dou kakua ni makutu e matadra ga na turaga, mo dou vinakati kina vakatamata; ia me vaka dou sa tamata i Karisito, mo dou cakava na veitalia ni Kalou mai na vu ni yalomudou,

7ni sa vinakata tiko na lomamudou; ka me vaka vei koya na Turaga, ka sega vei ira na tamata, dou sa makutu kina:

8ni dou sa kila na ka vinaka kecega ena cakava ko na tamata yadua, se bobula sei taukei, ena saumi vakakina mai vua na Turaga.

9Oi kemudou talega, na turaga, dou kitaka vakakina vei ira, ka kakua ni vosavaka-cudrucudruya: ni dou sa kila sa tiko mai lomalagi na nomudou Turaga; a sa sega ni vinakata e dua vakailoa ko koya.

10Meʼu tinia, oi kemudou na wekaqu, dou kaukauwa e na Turaga, kei na kena levu ni nona kaukauwa.

11Dou tama kecega nai yaragi ni Kalou, mo dou tu dei rawa ka vorata nai lawaki ni tevoro.

12Ni sa sega ni ko ira na tamata eda sa veivala kina, a ya ga ko ira era sa liu, ko ira era sa kaukauwa, ko ira era sa veitaliataka na butobuto kei vuravura o qo, ko ira na yalo ca e na veiyasana vakalomalagi.

13O koya mo dou qai kauta kecega nai yaragi ni Kalou, mo dou vorata rawa kina e na siga ca, ia ni dou sa ia kece oti mo dou tu dei.

14O koya mo dou qai tu dei, ni sa vauci tu na tolomudou e na lomadina, ka sa tu e na lomaseremudou nai vakaruru ni valavala dodonu;

15ka sa vakaivava na yavamudou me vaka na cakacaka ni tukutuku-vinaka ni veivinakati;

16mei kuri, mo dou kauta na vakabauta mei sasabai dou na bokoca rawa kina na gasau vidi kecega ni tevoro,

17ka kauta na bula mei vakaruru ni ulu, kei nai seleiwau ni Yalo, o qori na vosa ni Kalou:

18dou masu tikoga e na masumasu kecega kei na daukerekere e na Yalo, ka yadrava tu kina e na gumatua kece kei na daukerekere e na vukudra kecega na tamata lotu;

19e na vukuqu talega me soli ga vei au meʼu vosa rawa, me dalaga na gusuqu, meʼu doudou meʼu tukuna na ka vuni ni tukutuku-vinaka,

20a ya kaʼu sa talai meʼu vunautaka, oi au sa vesu tu; meʼu vosataka vakadoudou, me vaka ni sa kilikili kei au me vosa.

21Ia mo dou kila talega na noqu tiko, io, na noqui valavala, ena tukuna na ka kecega vei kemudou ko Tikiko, na wekaqu daulomani kei nai talatala yalodina ni Turaga;

22o koya kaʼu sa tala vei kemudou e na vuku ni ka o qo, mo dou kila kina na neitou tiko, me vakaceguya talega na yalomudou ko koya.

23Me nodra na veiwekani na vakacegu, kei na loloma, kei na vakabauta, mai vua na Kalou ko Tamada kei na Turaga ko Jisu Karisito.

24Me tu na loloma vei ira kecega era sa lomana na noda Turaga ko Jisu Karisito e na lomadina. Emeni.