1E DINA, e dina, au sa kaya vei kemudou, O koya sa sega ni curu ki na katuba ni bai ni sipi, a sa kaba cake e na tikina tani, sa daubutako ka daukove ko koya o qo.
2Ia ko koya sa curu e na katuba, o koya o qo nai vakatawa ni sipi.
3Sa dolavi koya ko nai vakatawa ni katuba; a sa vakarogoca na domona ko ira na sipi: a sa kacivi ira na nona sipi e na yacadra ko koya, ka tuberi ira ki tautuba.
4Ia ni sa kauti ira na nona sipi ki tautuba, sa liutaki ira, a sa muri koya ko ira na sipi; ni ra sa kila na domona.
5Ia era na sega ni muria na vulagi, ka ra na dro tani vei koya; ni ra sa sega ni kila na domodra na vulagi.
6Sa vosataka vei ira na vosa vakatautauvata o qo ko Jisu: a ra sa sega ni kila na veika sa vosataka vei ira ko koya.
7Sa qai kaya tale vei ira ko Jisu, E dina, e dina, au sa kaya vei kemudou, Oi au na nodra katuba na sipi.
80 ira kecega sa lako mai eliu vei au era sa daubutako ka daukove: a sa sega ni vakarogoca na nodra vosa ko ira na sipi.
9Oi au na katuba: kevaka sai au ga ena curu kina e dua na tamata, ena vakabulai, ka na daucuru mai ka daucuru yani, ka kune kakana.
10Sa sega ni lako mai na daubutako, a ya ga me butako, ka ravuravu, ka vakarusa: au sa lako mai me rawa na bula, ia me rawa vakalevu sara.
11Oi au nai vakatawa vinaka: sa virino na nona bula nai vakatawa vinaka e na vukudra na sipi.
12Ia ko koya sa voli na nona cakacaka, ka sega ni koya nai vakatawa, a sa sega ni taukeni ira na sipi, sa raica na wolifa ni sa lako mai, a sa biuti ira na sipi ko koya, ka dro: a sa covi ira ko na wolifa, a sa vakatolosevi ira na sipi:
13a sa dro ko koya sa voli na nona cakacaka, e na vuku ni sa vakakina ko koya, ka sega ni daunanumi ira na sipi.
14Oi au nai vakatawa vinaka: ia kaʼu sa kilai ira sa noqu, ia ko ira sa noqu era sa kilai au;
15me vaka sa kilai au ko Tamaqu, ia me vaka kaʼu sa kilai Tamaqu: kaʼu sa virino talega na noqu bula e na vukudra na sipi.
16E so tani tale na noqu sipi, era sa sega ni tiko e na bai o qo: sa kilikili meʼu kauti ira talega mai, a ra na rogoca na domoqu; ena qai dua bau na qele ni sipi, ka dua bau nai vakatawa.
17A ka o qo sa lomani au kina ko Tamaqu, niʼu sa virino na noqu bula, meʼu kauta tale.
18Sa sega e dua sa kovea o qo vei au, ia kaʼu sa virino vakai au ga. Au sa rawata me virino, ia kaʼu sa rawata me kauta tale. A vunau o qo sa solia mai vei au ko Tamaqu.
19Era sa qai veileti tale na kai Jutia e na vuku ni vosa o qo.
20A sa lewe vuqa vei ira era sa kaya, Sa curumi koya e dua na tevoro, a sa lialia; dou sa rogoci koya e na vuku ni cava?
21Sa kaya e so tani, Sa sega ni vakaoqo na vosa ni tamata sa curumi koya e dua na tevoro: sa rawata beka e dua na tevoro me basuka na matadra na mataboko?
22SA qai ia mai Jerusalemi na solevu ni vakasavasava tiki ni vale ni soro, a sa vula i liliwa.
23A sa lako voli ko Jisu e na vale ni soro, e na yasana nei Solomoni.
24Era sa qai vakavolivoliti koya na kai Jutia, ka kaya vua. E vakaevei na kena dede ni ko sa sega ni vakataudeitaka kina na loma i keimami? kevaka na Karisito ko iko, tukuna vakavinaka mai vei keimami.
25Sa kaya vei ira ko Jisu, Au a tukuna vei kemudou, ia dou sa sega ni vakadinata: a cakacaka kaʼu sa kitaka e na yaca i Tamaqu, o koya o qo sa vakatakilai au.
26Ia dou sa sega ni vakadinata, e na vuku ni dou sa sega ni noqu sipi: me vaka kaʼu a kaya vei kemudou,
27sa rogoca na noqu vosa ko ira na noqu sipi, ia kaʼu sa kilai ira, ka ra sa muri au:
28ia kaʼu sa solia vei ira na bula tawa mudu; ia era na sega sara ni rusa, se dua e kaliraki ira mai na ligaqu.
29A Tamaqu, o koya sa soli ira vei au, sa uasivia na ka kecega: a sa sega e dua sa rawata me kaliraki ira mai na liga i Tamaqu.
30Keirau sa dua bauga kei Tamaqu.
31Sa qai tomika tale na vatu ko ira na kai Jutia, me ra viriki koya.
32Sa vosa vei ira ko Jisu, E vuqa na cakacaka vinaka kaʼu a vakatakila vei kemudou maivei Tamaqu; a cava na cakacaka vei ira o qo dou sa viriki au kina?
33Sa vosa vua ko ira na kai Jutia, ka kaya, Sa sega e na vuku ni cakacaka vinaka keitou sa viriki iko kina; e na vuku ga ni vosa sa vakacacataki kina na Kalou; e na vuku talega ni ko sa tamata ga, ka sa qisi iko mo Kalou.
34Sa vosa vei ira ko Jisu, Sa sega li ni volai e na nomudou vunau, Au a kaya, Dou sa kalou?
35Kevaka sa vakatokai ira me kalou ko koya, ni sa yaco vei ira na vosa ni Kalou, (a sa sega ni biu wale rawa nai Vola;)
36dou sa kaya li vua sa lesia ko na Tamaqu, ka tala ki vuravura, O sa vosavakacacataka na Kalou: niʼu sa kaya, Oi au na Luve ni Kalou?
37Kevaka kaʼu sa sega ni kitaka na cakacaka i Tamaqu, kakua ni vakabauti au:
38ia kevaka kaʼu sa kitaka, dou vakadinata na cakacaka, kevaka dou sa sega ni vakabauti au; mo dou kila kina, ka vakadinata, ni sa vei au ko Tamaqu, a sa vei koya koi au.
39Era sa qai via tauri koya tale: a sa dro ko koya mai na ligadra.
40A sa lako tale yani ko koya ki tai kadua ni Joritani, ki na yasana sa veipapitaisotaki kina eliu ko Joni: a sa tiko kina.
41A sa lewe vuqa era sa lako vua, ka kaya, Sa sega ni kitaka e dua na ka-mana ko Joni: ia sa dina ga na ka kecega sa vosataka kina na tamata o qo ko Joni.
42A ra sa lewe vuqa sa vakabauti koya maikeri.
Who We AreWhat We EelieveWhat We Do
2025 by iamachristian.org,Inc All rights reserved.
