Ai Vola I Sikariya Na Parofita 6 - AI VOLA TABU（FIJ1864）

A raivotu ni vale-vodoki e va, 1-8. A Mesaia, sa parofisaitaka me Bete levu ka Turaga levu, 9-15.

1AU a ta cake tale e na mataqu, ka vakaraica, ka, raica, sa va na vale-vodoki sa lako mai na tadrua ni ulu-ni-vanua e rua: ia na ulu-ni-vanua sa ulu-ni-vanua parasa.

2Sa kena nai matai ni vale-vodoki na ose damudamu; a sa kena nai karua ni vale-vodoki na ose loaloa;

3a sa kena nai katolu ni vale-vodoki na ose vulavula; a sa kena nai kava ni vale-vodoki na ose veivolavolai ka sikosikoa.

4Au a qai ia na vosa, ka vaka vua na agilose keirau sa veivosaki kaya, A cava o qo, noqu turaga?

5A sa vosa na agilose, ka kaya vei au, Sai iratou o qo na yalo vakalomalagi e va, eratou sa lako mai na nodratou tiko e na mata ni Turaga ni vuravura kecega.

6O ya e loaloa na kena ose sa lako yani ki na vanua mai na tokalau; na ka vulavula talega sa muria yani; ia na ka veivolavolai sa lako yani ki na vanua mai na mata ni ceva.

7Na ka sikosikoa talega sa lako yani, a sa kere me veilakoyaki voli e vuravura: a sa kaya ko koya, Dou lako, veilakoyaki voli e vuravura. A sa veilakoyaki voli e vuravura.

8A sa kacivi au ko koya, ka vosa vei au, ka kaya, Raica, na ka o qori sa lako yani ki na vanua mai na tokalau sa vakaceguya na yaloqu e na vanua vakatokalau.

9A sa yaco na vosa i Jiova vei au, ka vaka,

10Mo kauta maivei iratou ka vakabobulataki, ko Elitai, kei Topiya, kei Yitaya, eratou sa lako mai Papiloni, ia mo mani curu ko iko e na siga ko ya, io, mo curu ki na vale i Josaia na luve i Sifaniya,

11ka kauta na siliva kei na koula, ka cakava e so nai sala, ka vakaisalataki Josua na luve i Yiosataki, na bete levu;

12ka vosa vua, ka kaya, Sa vosa vakaoqo ko Jiova ni lewe vuqa, ka kaya,

Raica na tamata, na Coke na yacana; ia mai na nona yasana ena tubu mai ko koya, ena tara ga ko koya na vale i Jiova:

13io, ena tara na vale i Jiova ko koya, ena tu talega vei koya na kenai ukuuku; ia ena tiko ka lewa ko koya e na nonai tikotiko vakaturaga; ena bete talega ko koya e na nonai tikotiko: ia na veilewayaka na veivinakati erau na ia vata ruarua.

14Ia nai sala vakaturaga ena nodratou ko Elimi, kei Topiya, kei Yitaya, kei Eni na luve i Sifaniya, me kenai vakananumi e na vale i Jiova.

15Ia ko ira sa tiko vakayawa era na mai veivuke me tara na vale i Jiova; ia dou na kila ni sai Jiova ni lewe vuqa sa talai au mai vei kemudou. Ia ena yaco na ka o qo, kevaka dou na vakarorogo vakaidina ki na domo i Jiova na nomudou Kalou.