Ai Vola I Jona Na Parofita 4 - AI VOLA TABU（FIJ1864）

O Jona, ni sa yaloca mai, sa vunauci, 1-11.

1A SA cata vakalevu ko Jona, a sa cudru sara.

2A sa masu vei Jiova, ka kaya, I Jiova, sai koya ga o qo kaʼu a kaya niʼu a tiko e na noqu vanua, se segai? sai koya talega o qo kaʼu a dro vakasauri kina ki Tarisisi: niʼu a kila ko sa Kalou daulomasoli, ka yalololoma, sa cudru malua, ka dauyalovinaka, a sa dauveivutuni e na vuku ni ca.

3Ia o qo ga, Jiova, au masuti iko kina mo kauta tani vei au na noqu bula; ni sa vinaka meʼu mate ka ca meʼu bula.

4A sa kaya ko Jiova, E ka vinaka beka mo cudru mai?

5A sa lako ki nai bili ni koro ko Jona, ka tiko e na yasa ni koro kivakaki na tu i cake, a sa cakava maikea e dua na nona vale vakacevaceva, ka tiko sobu ki rukuna, ka me raica mada se na cava ena yacova na koro.

6A sa vakarautaka na Kalou ko Jiova e dua na bele, a sa vakatubura me vakarurugi Jona, mei vakaruru ni uluna, me cegu kina ko koya mai na nona rarawa: a sa reki vakalevu ko Jona e na vuku ni bele.

7A sa vakarautaka na Kalou e dua na yavato ni sa kida na mataka e na sabogibogi, a sa kania na bele, a sa malai kina.

8A sa yaco, ni sa cadra na siga, sa vakarautaka na Kalou na tokalau e makausu na kena buno; a sa yavita na ulu i Jona na siga, a sa malumalumu ko koya, ka gadreva e lomana me mate, a sa kaya, E vinaka ga meʼu mate ka ca meʼu bula.

9A sa kaya vei Jona na Kalou, E vinaka beka vei iko mo cudru e na vuku ni bele, ne? A sa kaya ko koya, E vinaka meʼu cudru, io, meʼu mate ga.

10A sa kaya ko Jiova, O iko, ko sa lomana na bele, o koya ko a sega ni oca kina, ka sega ni vakatubura, ia ka tubu ga e na bogi e dua ka malai e na bogi e dua;

11ia koi au, meʼu kakua li ni lomani Ninive, na koro levu ko ya, era sa tiko kina na tamata e udolu vakadrau ka ruasagavulu era sega ni kila rawa na ligadra i matau kei na ligadra i mawi; ka levu talega na manumanu?