Ai Vola I Joeli Na Parofita 1 - AI VOLA TABU（FIJ1864）

A WASE I. —O Joeli, ni sa tukuna na veicudruvi ena yaco mai vua na Kalou, sa vakarota vei ira na bete me lesia na siga, mc ia kina na lolo kei na veivutuni, 1-20.

1A VOSA i Jiova sa yaco vei Joeli na luve i Picueli.

2DOU rogoca na ka o qo, na qase, ka vakatu daliga, oi kemudou kece na lewe ni vanua. Sa yaco beka na ka vakaoqo e na nomudou gauna, se na nodra gauna na nomudou qase?

3Dou tukuna matua vei ira na luvemudou, kei ira na luvemudou ki na luvedra, kei na luvedra ki nai tabatamata e tarava.

4A ka sa voca na vodre dauquru, sa kania na vodre dina; kei na ka sa voca na vodre dina, sa kania na vodre dramidrami; kei na ka sa voca na vodre dramidrami, sa kania na nuve.

5Dou yadra mai, na daumateni, ka tagi; ia dou qoqolou kece, na daugunu waini, e na vuku ni waini vou; ni sa muduki tani mai na gusumudou.

6Ni sa dua na matanitu sa lako cake mai ki dela ni noqu vanua, e kaukauwa ka tawa wiliki rawa, a batidra na bati vakalaioni, a ra sa vaka-galegalena me vaka na laioni alewa.

7Sa cakava na noqu vaini me malai, kei na noqu lolo me lauvoci: sa luvata laivi na kulina, a sa biuta; sa vakavulavulataki na tabana.

8Mo tagi me vaka na gonealewa sa vauci e nai sulu taqarotu nai loloku ni watina ni sa gonealewa.

9Sa muduki tani mai na vale i Jiova nai madrali laukana kei nai madrali gunuvi: era sa tagi na bete, nai talatala i Jiova.

10Sa vakacacani na were, sa tagi na qele; ni sa vakacacani na sila: sa di na waini vou, sa ceguoca na waiwai.

11Dou madua, nai vakatau-ni-were; dou qoqolou, na dausamaki vaini, e na vuku ni witi kei na parile; ni sa yali na vuata ni were.

12Sa malai na vaini, a sa ceguoca na lolo; io, na kau kecega ni vanua sa malai: na karaniti, na balabala talega, kei na wi: ni sa malai yani na nodra marau na luve ni tamata.

13Dou vauci kemudou, na bete, ka osima: dou qoqolou, sa qarava nai cabocabo-ni-soro: dou mai curu, ka vakabogi e nai sulu taqarotu, oi kemudou nai talatala ni noqu Kalou: ni sa bureitaki ki na vale ni nomudou Kalou nai madrali laukana kei nai madrali gunuvi.

14Dou vakatabuya na siga me ia kina na lolo, kacivaka e dua nai soqosoqo tabu, vakasoqoni ira na qase kei ira kece na lewe ni vanua ki na vale i Jiova na nomudou Kalou, ka tagi vei Jiova.

15Ule na siga ko ya! ni sa voleka na siga i Jiova, ia ena yaco mai me vaka na veivakarusai maivei Koya sa Kaukauwa.

16Sa sega li ni muduki tani mai matada na kakana, na marau kei na reki mai na vale ni noda Kalou?

17Sa vuca na sore ni sila e na ruku ni kena qele, sa lala na lololo, sa rusa na valevale: ni sa malai na sila.

18Ule na kedra vutugu na manumanu! sa kidroa na qele ni karavau, ni sa sega na kedra veico; io, na qele ni sipi sa ca mai.

19Vei iko, Jiova, kaʼu na tagi kina: ni sa katia na buka na veico mai veikau, ia na yameyame ni buka sa caudreva na, kau kecega ni vanua.

20A manumanu ni vanua talega sa tagi cake vei iko: ni sa di mai na dreke ni wai, ia na buka sa katia na veico mai veikau.