Ai Vola I Osea Na Parofita 4 - AI VOLA TABU（FIJ1864）

Ai valavala ca sa ra cudruvi kina na lewe ni vanua, 1-5, kei ira na bete, 6-10. Sa ka veivakalialiai sara na qarava na kalou lasu, 11-14. Sa ra vakasalataki kina na Juta, ni ra sa kunea na nodra cudruvi na Isireli, 15-19.

1DOU rogoca na vosa i Jiova, na luve i Isireli: ni sa dua na veilewai nei Jiova kei ira na lewe ni vanua, e na vuku ni sa sega na vosa dina, se na loloma, se na kila na Kalou e na vanua.

2A ruru, kei na vosa lasu, kei na laba, kei na butako, kei na veibutakoci, sa basu mai, ia na dia sa veitaravi kei na dra.

3O koya o qo ena tagi kina na vanua, a ra na dui ceguoca kecega era tiko kina, kei na manumanu ni vanua, kei na manumanu ni lomalagi; io, na ika talega ni waitui ena kauti.

4Me kakua ga e dua me veilewai, se veivunauci kaya e dua; ni sai ira na kai nomu era vakataki ira era sa ia na veilewai kaya na bete.

5O koya o qo ko na toqi kina e na siga, ia drau na toqi vata kaya talega na parofita kei na bogi, au na vakarusai koya talega na tinamu.

6Sa ra rusa na noqu tamata e na vuku ni sa yali vei ira na vuku: ni ko sa biuta na vuku, au na biuti iko talega, mo kakua ni bete tiko vei au: ni ko sa guilecava na vunau ni nomu Kalou, oi au talega, kaʼu na guilecavi ira na luvemu,

7Me vaka ni ra tubu mo levu, sa tubu vakakina na nodrai valavala ca vei au: na nodra lagilagi kaʼu na vukica me madua.

8Ai soro ni nodrai valavala ca na noqu tamata era sa kania, ia na nodra caka cala sa ra gadreva e na vu ni yalodra.

9Ia ena yaco, me vaka ko ira na tamata, ena vaka talega kina ko koya na bete: ia kaʼu na cudruvi ira e na vuku ni nodrai valavala, io, na nodra cakacaka kaʼu na sauma vei ira.

10Ni ra na kana, ka sega ni mamau; era na ia na veibutakoci, ka sega ni tubu: ni sai Jiova era sa mudu ni qarava.

11A dauyalewa kei na waini kei na waini vou sa kauta vakatani na loma ni tamata.

12A noqu tamata era sa taroga na nodra kau, ia na nodrai titoko sa tukuna vei ira: ni sa yalo ni veibutakoci sa vakacalai ira, ni ra dauyalewa, sa ra lako tani kina mai na lewa ni nodra Kalou.

13E dela ni veiulu-ni-vanua era sa daucakai soro, e na veiulu-ni-koro talega era sa dauvakacaudreva kina nai madrali boi vinaka, e na ruku ni oki kei na ivi kei na paini, ni sa rugurugu vinaka o qori: o koya o qo era na ia kina na dauyatagane na luvemudou alewa, kei ira na vugomudou, na veibutakoci.

14Au na sega ni cudruvi ira na luvemudou alewa ni ra ia na dauyatagane, se na vugomudou ni ra ia na veibutakoci: ni sai ira dina sa ra tawase vata kei na dauyatagane, kei ira talega na dauveitau sa ra cakai soro kaya; ia ko ira sa tawa yalomatua sa ra na viritaki sobu ga.

15Kevaka dou sa ia na veibutakoci, na Isireli, me kakua ga ni caka cala ko ira na Juta; ia kakua ni dou cabe cake ki Kilikali, se lako cake ki Peci-aveni, se vosavavakini, ka kaya, Sa bula ko Jiova.

16Ni sa vaka ni sa besebese na karavau, sa ra besebese vakakina na Isireli: ena qai vakani ira edaidai ko Jiova me vaka na lami e na yasana rabailevu.

17Sa vei-vauci vata kei na matakau ko ira na Ifireimi: laivi ira ga.

18Ni sa gunuvi na medra, era sa qai ia sara na veibutakoci: o ira na nodra turaga era sa vinakata na ka e veivakamaduataki.

19Sa vauci ira ko cagi e na tabana, me ra madua e na vuku ni nodra dausoro.