Ai Vola I Tanieli Na Parofita 1 - AI VOLA TABU（FIJ1864）

A WASE I. —Sa vakabobulataki ko Jioiakimi, 1, 2. O Esipinasi, sa kauti iratou ko Tanieli, kei Eneniya, kei Misaeli, kei Asariya, 3-7. Ni ratou sa bese ni kania na magiti i tui Papiloni, sa qai yaga vei iratou na ka ni were kei na wai, 8-16. Eratou sa uasivi cake e na vuku, 17-21.

1E NAI katolu ni yabaki ni lewa i Jioiakimi na tui Juta sa lako mai ko Nipukatinesari na tui Papiloni ki Jerusalemi, a sa buku na kena druadrua.

2Ia na Turaga sa soli Jioiakimi na tui Juta ki na ligana, ka so nai yaya ni vale ni Kalou: a sa kauta ko koya ki na vanua ko Sainari ki na vale ni nona kalou; a sa kauta nai yaya ki na vale ni yau ni nona kalou.

3A sa vosa na tui ki Esipinasi na turaga ni nona mata, me kauti ira e so na luve i Isireli, ka so era kawa ni tui, ka so na turaga;

4na cauravou sa sega na kedra ca, sa ra matavinaka ga, ka yalomatua e na vuku kecega, ka daukila-ka, ka lomama-cala e na vuli ka, ka tamata bula me ra mai tu e na vale ni tui, ka me vakavulici ira e nai vola kei na vosa ni kai Kalitea.

5A sa lesia na tui na kedrai votavota o na veisiga mai na magiti ni tui, kei na waini e so sa gunu kina ko koya: ka me vakani ira tiko ka tolu na yabaki, ka oti me ra qai mai tu e na mata ni tui.

6A sa so vei ira eratou luve i Juta, ko Tanieli, kei Eneniya, kei Misaeli, kei Asariya;

7a sa vakatoka na turaga ni mata e so na yacadratou: ni sa vakayacani Tanieli ko Pelitisasari; kei Eneniya, ko Seteraki; kei Misaeli, ko Mesaki; kei Asariya, ko Apeti-niko.

8A sa lewa oti ko Tanieli e lomana me kakua ni vakadukadukalitaki koya e nai votavota ni magiti ni tui, kei na waini sa gunuva: a sa masuta ko koya na turaga ni mata me kakua ni vakadukadukalitaki kina.

9Ia na Kalou sa vakayacori Tanieli me rau veivinakati ka veilomani sara kaya na turaga ni mata.

10A sa kaya na turaga ni mata vei Tanieli, Au sa rerevaka na noqu turaga na tui, o koya sa lesia na kemudou kei na memudou: me raica vakacava ko koya na matamudou … qo ca ka vinaka na matadra na cauravou … A taba vata? ia dou na vakacala kina na uluqu vua na tui.

11Sa qai kaya ko Tanieli vei Melisari, o koya ka lesia na turaga ni mata me vakaraici iratou ko Tanieli, kei Eneniya, kei Misaeli, kei Asariya,

12Mo vakatovolei keitou mada na nomu tamata, ka bogi tini; ia me ra solia vei keitou na ka ni were me keitou kania, kei na wai mo keitou gunuva.

13Me qai raici e matamu na mata i keitou, kei na matadra na cauravou era kania nai votavota mai na magiti ni tui: ka vaka na ka ko raica, mo cakacaka vakakina mai ki na nomu tamata.

14A sa vakarorogo vei iratou ko koya e na ka o qo, ka vakatovolei iratou ka bogi tini.

15Ia ka oti na bogi e tini, sa raici na matadratou me vinaka ka vakalewe, ka ca na matadra na cauravou kecega era kania nai votavota mai na magiti ni tui.

16A sa kauta tani ko Melisari na kedratoui votavota ni magiti, kei na medratou waini; a sa solia vei iratou na ka ni were.

17Ia ko iratou na cauravou o qo e lewe va, sa solia vei iratou na Kalou na lomavuku kei na yalomatua e nai vola kecega kei na vuku: a sa vuku ko Tanieli e na raivotu kecega kei na tadra.

18Ia ni sa oti na gauna sa vosa kina na tui me qai kauti ira yani, sa qai kauti ira yani na turaga ni mata ki na mata i Nipukatinesari.

19A sa veivosaki kei ira na tui; a sa sega ni kune vei ira kecega me tautauvata kei Tanieli, kei Eneniya, kei Misaeli, kei Asariya: o koya o qo eratou sa mai tu kina e na mata ni tui.

20Ia na ka vakavuku kecega ka vakayalomatua, sa tarogi iratou kina na tui, sa kunei iratou me vuku vakatini cake vei ira kecega na tamata vuku kei na rairai era tiko e nona matanitu kecega.

21A sa tiko ga ko Tanieli ka yacova nai matai ni yabaki i Koresi na tui.