Ai Vola I Isirieli Na Parofita 33 - AI VOLA TABU（FIJ1864）

A nona cakacaka dodonu nai vakatawa, 1-6. Sa vakavulici kina ko Isikieli me muria, 7-9. Sa vakatakila na Kalou ni sa dodonu na nonai valavala vei ira e veivutuni, vei ira talega e talaidredre, 10-16. Sa vakadinadina ko koya ni sa dodonu ga na nona lewa, 17-20. Ni sa rogorogo mai vei Isikieli ni sa kabai ko Jerusalemi, sa parofisaitaka na vanua ni na lala ga, 21-29. A kedra cudruvi na tamata era sa vakalialiai ira na parofita, 30-33.

1A SA yaco tale vei au na vosa i Jiova, ka vaka,

2Na luve ni tamata, mo vosa vei ira na luvedra na noqu tamata, ka kaya vei ira,

Niʼu sa vakayacora nai seleiwau ki na dua na vanua, ke ra kauta na lewe ni vanua e dua na tamata mai na nodrai yalayala, ka lesi koya me nodrai vakatawa:

3ke raica ko koya nai seleiwau ni sa lako mai ki na vanua, ka uvuca na davui, ka vakasalataki ira na tamata;

4ke rogoca dina ko koya sa rogoca na domo ni davui, ka tawa vakabauta; ka lako mai nai seleiwau, ka kauti koya tani, ke na tauca na uluna na kena dra.

5A domo ni davui sa rogoca ko koya, ka tawa vakabauta; a kena dra ena tu ga vua. Ia ko koya sa vakabauta sa na vakabula na yalona.

6Ia nai vakatawa, ke raica ko koya nai seleiwau ni sa lako mai, ka sega ni uvuca na davui, ka ra tawa vakasalataki na tamata; ke lako mai nai seleiwau, ka kauta tani e dua na tamata maivei ira, ke sa kauti tani ga ko koya e na nona caka cala; ia na kena dra kaʼu na taroga vua nai vakatawa.

7Ia ko iko, na luve ni tamata, kaʼu sa lesi iko mo nodrai vakatawa na mataqali nei Isireli; o koya o qo mo rogoca kina na vosa mai na gusuqu, ka vakasalataki ira maivei au.

8Niʼu sa kaya vua na tamata ca, Na tamata ca, ko na mate vakaidina; kevaka ko sa tawa vosa me vakasalataka na tamata ca me lesu tani mai na nona sala, sa na mate ga na tamata ca ko ya e na nona caka cala; ia na kena dra kaʼu na taroga vei iko.

9Ia ko iko, kevaka ko sa vakasalataka na tamata ca e na vuku ni nona sala me lesu tani maikina: ke tawa lesu tani ko koya mai na nona sala, ke na mate ga ko koya e na nona caka cala; ia ko iko, ko sa vakabula na yalomu.

10Ia ko iko, na luve ni tamata, mo kaya ki na mataqali nei Isireli; Dou sa vosa vakaoqo, ka kaya, Ia na noda talaidredre kei na nodai valavala ca, ke sa tauci keda, a da sa uru yani kina, ke na qai bula vakaevei koi keda?

11Mo kaya vei ira, Me vaka na dina ni noqu bula, sa kaya na Turaga ko Jiova, au sa sega ni vinakata ni sa mate na tamata ca; ni sa lesu tani ga na tamata ca mai na nona sala me bula: dou lesu tani, dou lesu tani mai na nomudou sala ca; ni sa kawa ni cava dou sa via mate kina, na mataqali nei Isireli?

12O koya o qo, ko iko na luve ni tamata, mo kaya kina vei ira na luvedra na kai nomu, A nonai valavala dodonu na yalododonu ena sega ni vakabulai koya e na siga sa talaidredre kina ko koya: ia na nona ca na tamata ca, ena sega ni bale kina ko koya e na siga sa lesu tani kina mai na nona ca; o koya talega sa yalododonu ena tawa bula rawa kina e na siga sai valavala ca kina ko koya.

13Niʼu sa kaya vua na yalododonu, ni na bula vakaidina ko koya; ke vakararavi ko koya ki na nonai valavala dodonu, ka caka cala, ke na sega ga ni nanumi na nonai valavala dodonu kecega: ia e na vuku ni nona cala sa cakava, ena mate ga kina ko koya.

14Ia, niʼu sa kaya vua na tamata ca, O na mate vakaidina; ke lesu tani ko koya mai na nonai valavala ca, ka cakava na ka sa dodonu ka vinaka;

15ia nai vakarawarawa ke sa vakasuka na tamata ca, ka vakasuka talega na ka sa butakoca, na vunau ni bula ke sa muria, ka tawa caka cala; ke na bula vakaidina ga ko koya, ena sega ni mate.

16Ena sega e dua na nonai valavala ca ka kitaka me cavuti vua: na ka dodonu ka vinaka sa cakava; ena bula vakaidina ga ko koya.

17Ia ka ra kaya na luvedra na kai nomu, Sa tawa dodonu nai valavala ni Turaga: ia ko ira ga, sa tawa dodonu na nodrai valavala.

18Ni sa lesu tani na yalododonu mai na nonai valavala dodonu, ka caka cala, ena mate ga kina ko koya.

19Ia ni sa lesu tani na tamata ca mai na nona ca, ka cakava na ka sa dodonu ka vinaka, ena bula ga kina ko koya.

20Ta dou sa kaya ga, Sa sega ni dodonu nai valavala ni Turaga. Oi kemudou na mataqali nei Isireli, au na dui lewai kemudou me vaka na nomudoui valavala.

21IA e nai katinikarua ni yabaki ni keimami veivakabobulataki, e nai katini ni vula, e nai kalima ni siga ni vula, sa qai lako mai vei au e dua sa dro mai Jerusalemi, a sa kaya, Sa samu na koro.

22Ia na liga i Jiova sa tu vei au e na yakavi, ni sa bera ni tadu mai ko koya sa dro mai, ka sa dalaga na gusuqu, ka sa bera ni lako mai vei au ko koya e na mataka; ia sa dalaga na gusuqu, kaʼu sa qai tawa galu tiko.

23Sa qai yaco vei au na vosa i Jiova, ka vaka,

24Na luve ni tamata, o ira sa vakatawa na veitikina lala ni vanua ko Isireli era sa vosa, ka kaya, Sa lewe dua ga ko Eparaama, ni sa taukena na vanua: ia koi keda, eda sa lewe vuqa; ia vei keda sa soli kina na vanua me taukena.

25O koya o qo mo kaya kina vei ira,

Sa vosa vakaoqo na Turaga ko Jiova; A dra dou sa kania nai coi ni kemudou, a matamudou talega dou sa ta cake ki na nomudou matakau, a dra talega dou sa vakadavea: ia na vanua, mo dou taukena li?

26Dou sa ravita tu na nomudoui seleiwau, dou sa cakava na ka vakasisila, kei na watina na kai nona dou sa dui vakacacana: ia na vanua, mo dou taukena li?

27Mo vosa vakaoqo vei ira, Sa vosa vakaoqo na Turaga ko Jiova, Me vaka na dina ni noqu bula, o ira era vakatawa na veitikina lala era na bale ga e nai seleiwau, o koya talega mai bili kaʼu na soli koya ki na manumanu me ra kania, o ira talega mai na Uluvatu kei na qaravatu era na mate e na mate dauveitauvi.

28Niʼu na vakalalataka vakaidina sara na vanua, ena mudu talega na nona kaukauwa lagilagi; ena lala talega na veiulu-ni-vanua nei Isireli, me sega e dua me lakova.

29Era na qai kila ni sai au ko Jiova, niʼu sa vakalalataka vakaidina sara na vanua e na vuku ni nodrai valavala vakasisila kecega era sa cakava.

30O iko talega, na luve ni tamata, o ira na luvedra na kai nomu era sa veivosaki-taki iko tikoga mai na lalaga kei na katuba ni veivale, a ra sa dui veivosaki vakai ira na veiwekani, ka kaya, Tou mai rogoca mada, se na vosa cava sa yaco maivei Jiova.

31A ra sa lako mai vei iko me vaka ni ra curu mai na tamata, a ra sa tiko o matamu me vaka na noqu tamata, ka rogoca na nomu vosa, a ra sa sega ni cakava: ni sa vosa veilomalomani era ia e na gusudra, sa nodra kocokoco ga sa muria na lomadra.

32Ka, raica, ko sa tautauvata vei ira kei na nona meke veilomalomani e dua sa domo vinaka, ka sa qiria vakavinaka nai qiriqiri: ni ra sa rogoca na nomu vosa, ka sega ni cakava.

33Ia ni sa qai yaco na ka ko ya, (raica, ena yaco ga,) era na qai kila ni sa dua na parofita ka tiko e na kedra maliwa.