Ai Vola I Isirieli Na Parofita 14 - AI VOLA TABU（FIJ1864）

O koya na Kalou, sa tabana yani vei ira era qarava na kalou lasu, me vaka na nodrai valavala, 1-5. Era sa vunauci me veivutuni de ra cudruvi e na dauveivakacalai, 6-11. Ena tawa vakadaroi rawa na lewa ni Kalou, ena yaco ga na viakana, kei na manumanu ca, kei nai valu, kei na mate ca, 12-21. Ena vakavoci e so me ra vakavulici kina na tamata tani, 22, 23.

1SA qai lako mai vei au e so vei ira na qase ni Isireli, ka tiko e mataqu.

2A sa yaco vei au na vosa i Jiova, ka vaka,

3Na luve ni tamata, sai ira na tamata o qo era dui vakaduria na nodra matakau e na lomadra, kei na nodra caka cala era tarabe kina era dui tauca ga e matadra: niʼu na tarogi, meʼu tarogi li vei ira o qo?

4O koya o qo mo vosa kina vei ira, ka kaya vei ira, Sa vosa vakaoqo na Turaga ko Jiova; O koya na tamata yadua ni mataqali nei Isireli sa vakaduria na nona matakau e na lomana, kei na nona caka cala e tarabe kina sa tauca ga e matana, ka sa lako vua na parofita; sai au ko Jiova, kaʼu na tabana yani vua sa lako mai me vaka na nona matakau e vuqa;

5meʼu taura na mataqali nei Isireli e na lomadra dina, ni ra sa lomavakatani vei au ko ira kecega e na nodra matakau.

6O koya o qo mo kaya kina ki na mataqali nei Isireli, Sa vosa vakaoqo na Turaga ko Jiova; Dou veivutuni, ka saumaki mai na nomudou matakau; ia mai na nomudou ka vakasisila kecega dou vagolea tani na matamudou:

7ni sai ira yadua e na mataqali nei Isireli, se ko ira na kai tani era tiko mai Isireli, sa na tawasei koya tani vei au, ka vakaduria na nona matakau e na lomana, kei na nona caka cala e tarabe kina sa na tauca e matana, ka qai lako vua na parofita me tarogi au vua; sai au ko Jiova ena tabana yani vua, koi au ga:

8ia kaʼu na vaqara na mataqu vua na tamata ko ya me ca, ka vakaluveniyalitaki koya, mei vakatakilakila kei nai bole, ka muduki koya tani maivei ira na noqu tamata; ia dou na kila ni sai au ko Jiova.

9Ia na parofita, ni sa vakacalai ni sa cavuta e dua na ka, sai au ko Jiova kaʼu sa vakacala na parofita ko ya, ia kaʼu na dodoka vua na ligaqu, ka vakarusai koya tani maivei irana noqu tamata na Isireli.

10A ra na dui colata nai sau ni nodra caka cala: me vaka na nona cudruvi sa taroga, ena vaka talega kina na nona cudruvi na parofita;

11me kakua ni lako sese tani tale kina vei au na mataqali nei Isireli, se vakadukadukalitaki tale e na nodra talaidredre kecega; me ra yaco ga me noqu tamata, oi au talega, meʼu yaco me nodra Kalou, sa kaya na Turaga ko Jiova.

12A SA yaco tale vei au na vosa i Jiova, ka vaka,

13Na luve ni tamata, ni sai valavala ca vei au e dua na vanua ni sa talaidredre sara, kaʼu na qai dodoka yani kina na ligaqu, ka musuka na kenai titoko, na madrai, ka tala kina na viakana, ka muduka tani maikina na tamata kei na manumanu:

14ke ratou tiko kina na tamata e lewe tolu o qo, ko Noa, kei Tanieli, kei Jope, ke ratou na dui vakabula ga na yalodratou e na nodratou yalododonu, sa kaya na Turaga ko Jiova.

15Kevaka sa manumanu ca kaʼu na vakalakova yani ki na vanua, ka vakacacana, me lala, ka sega na tamata me lako voli kina e na vuku ni manumanu:

16ke ratou tiko kina na tamata e lewe tolu o qo, me vaka na dina ni noqu bula, sa kaya na Turaga ko Jiova, ke na sega na luvedratou tagane se na luvedratou alewa eratou na vakabula; ke sai iratou dina ga ena vakabulai; ia na vanua, ena lala sara ga.

17Se kevaka sai seleiwau kaʼu na vakayacora ki na vanua, ka kaya, Nai seleiwau, mo lako voli yani ki na loma ni vanua; ka meʼu muduka tani maikina na tamata kei na manumanu:

18ke ratou tiko kina na tamata e lewe tolu o qo, me vaka na dina ni noqu bula, sa kaya na Turaga ko Jiova, ke ratou na tawa vakabula na luvedratou tagane se na luvedratou alewa, ke sai iratou dina ga ena vakabulai.

19Se kevaka sa mate dauveitauvi kaʼu na tala ki na vanua ko ya, ka sovaraka kina na noqu cudru e na dra, meʼu muduka tani maikina na tamata kei na manumanu:

20ke ratou tiko kina ko Noa, kei Tanieli, kei Jope, me vaka na dina ni noqu bula, sa kaya na Turaga ko Jiova, ke na sega ga e dua na luvedratou tagane se dua na luvedratou alewa eratou na vakabula; ke sa yalodratou dina ga eratou na vakabula e na nodratou yalododonu.

21Ni sa vosa vakaoqo na Turaga ko Jiova; Io ka vakaevei beka ni sa noqu ka rarawa e va kaʼu tala ki Jerusalemi, nai seleiwau, kei na viakana, kei na manumanu ca, kei na mate dauveitauvi, meʼu muduka tani maikina na tamata kei na manumanu?

22Ia ka, raica, ena vakavoci kina e so era na kauti tani mai, na goneatagane kei na gonealewa: raica, era na lako mai vei kemudou, ia dou na raica na nodrai lakolako kei na nodrai valavala: dou na qai vakacegui e na vuku ni ca kaʼu sa vakayacora ki Jerusalemi, kei na ka kece kaʼu sa vakayacora kina.

23A ra na vakacegui kemudou, ni dou sa raica na nodrai lakolako kei na nodrai valavala: dou na qai kila niʼu sa sega ni cakava wale na ka kece kaʼu sa cakava kina, sa kaya na Turaga ko Jiova.