Ai Vola I Isirieli Na Parofita 12 - AI VOLA TABU（FIJ1864）

Ni sa ia na toki ko Isikieli sa vakatakarakarataki kina na veivakabobulataki kei Sitikiya, 1-16. Ni sa sautaninini talega sa vakatakarakarataki kina na kedra ca na kai Jutia, 17-20. Era sa vunauci e na ruku ni nodra vosa vakaibalebale ca, 21-25. Ena vakayacori vakusakusa na raivotu, 26-28.

1A SA yaco vei au na vosa i Jiova, ka vaka,

2Na luve ni tamata, e na kedra maliwa na mataqali dautalaidredre ko sa tiko, era sa vakamatana me raica, ka sega ni raica; era sa vakadaligana me rogoca, ka sega ni rogoca: ni ra sa mataqali dautalaidredre.

3Ia ko iko, na luve ni tamata, mo cakava na nomui yaya ni toki vakabobula, ka toki tani kei na siga e matadra: ia mo toki tani mai na nomu tikina ki na tikina tani e matadra: era mataqali dautalaidredre, ka ra na vakanananu beka ga.

4Ia mo kauta kituba na nomui yaya kei na siga e matadra, me vaka nai yaya ni toki vakabobula: ia ko iko, mo lako tani e matadra kei na yakavi, me vaka na nodra lako tani na bobula.

5Ni ra raica tiko, mo kelibasika na bai, ka kauta yani kina kituba.

6Ni ra raica tiko, mo ia na colacola e domomu, ia ni sa yakavi mai, mo qai kauta tani: mo puloutaka na matamu, mo kakua ni raica na qele: niʼu sa cakavi iko mo kedrai vakatakilakila na mataqali nei Isireli.

7Ia kaʼu a cakacaka vakaoqo me vaka niʼu sa vakaroti: a noqui yaya kaʼu a kauta kituba kei na siga, me vaka nai yaya ni toki vakabobula, ia e na yakavi, kaʼu a kelibasika na bai e na ligaqu; ni sa yakavi mai kaʼu a qai kauta yani, kaʼu a colata e domoqu e matadra.

8Asa yaco vei au na vosa i Jiova e na sabogibogi, ka vaka,

9Na luve ni tamata, era sa kaya vei iko, se sega, na mataqali nei Isireli, na mataqali dautalaidredre ko ya, A cava li ko sa cakava?

10Mo kaya vei ira, Sa vosa vakaoqo na Turaga ko Jiova;

Sa bale vua na tui mai Jerusalemi nai colacola o qo, vei ira kece talega na mataqali nei Isireli era tiko kaya.

11Mo kaya, Sai au na kemudoui vakatakilakila: me vaka na ka kaʼu sa cakava, ena caka vakakina vei ira: era na toki tani, era na lako vakabobula tani.

12Ia na tui sa tiko kei ira ena ia na colacola e domona e na yakavi, ka curu yani: na bai era na kelibasika, me kauta yani kina ko koya kituba: a matana ena puloutaka ko koya, me kakua ni raica na qele e na matana.

13Ia kaʼu na tevuka na noqu lawa vua, ena coriti talega e na noqui cori: ia kaʼu na kauti koya ki Papiloni ki na nodra vanua na kai Kalitea; ena mate maikea ko koya, ia ena sega ga ni raica.

14Ia ko ira kece era tiko kaya me vukei koya, kei ira kece na nonai valu, kaʼu na dui vakasevi ira ki na mata ni cagi kecega; ia nai seleiwau kaʼu na ucuna me muri ira.

15A ra na kila ni sai au ko Jiova, niʼu sa dui vakasevi ira ki na veimatanitu, ka duibiubiuti ira ki na veivanua.

16Ia kaʼu na vakavoca vei ira na tamata e lewe vica mai nai seleiwau, kei na dausiga, kei na mate dauveitauvi; me ra tukuna na nodrai valavala vakasisila kecega ki na veimatanitu era na dui yaco kina; a ra na kila ni sai au ko Jiova.

17A sa yaco tale vei au na vosa i Jiova, ka vaka,

18Na luve ni tamata, na kemu madrai mo kania e na sautaninini, kei na memu wai mo gunuva e na kidroa kei na nuiqawaqawa;

19ka kaya vei ira na lewe ni vanua, Sa vosa vakaoqo na Turaga ko Jiova e na vukudra na lewe i Jerusalemi, kei na vanua ko Isireli; Na kedra madrai era na kania e na nuiqawaqawa, kei na medra wai era na gunuva e na domobula, me yali laivi mai na nodra vanua na ka kece sa sinai kina, e na vuku ni nodrai valavala kaukauwa kecega era tiko kina.

20Ia na veikoro tawa ena lala mai, ka rusa na vanua; ia dou na kila ni sai au ko Jiova.

21A sa yaco vei au na vosa i Jiova, ka vaka,

22Na luve ni tamata, a cava na vosa vakaibalebale ko ya vei kemudou e na vanua nei Isireli, ka vaka, Sa vakadedetaki na gauna, a sa sega na raivotu me yaco?

23O koya o qo mo tukuna kina vei ira,

Sa vosa vakaoqo na Turaga ko Jiova; Au na muduka na vosa vakaibalebale ko ya, a ra na sega ni taurivaka tale me vosa vakaibalebale e Isireli; ia mo kaya ga vei ira, Sa voleka mai na gauna, kei nai vakadinadina ni raivotu kecega.

24Ni na sega tale na raivotu lasu se na vosa-mana veicavilaki vei ira na mataqali nei Isireli.

25Ni sai au ko Jiova kaʼu na vosa, ia na vosa kaʼu na vosataka ena yaco; ena sega ni vakadedetaki tale: e na nomudou gauna ga, na mataqali dautalaidredre, kaʼu na cavuta na vosa, ka vakayacora, sa kaya na Turaga ko Jiova.

26A sa yaco tale vei au na vosa i Jiova, ka vaka,

27Na luve ni tamata, raica, sa ra kaya na mataqali nei Isireli, A raivotu sa raica ko koya sa ka ga ni bogi vuqa, sa gauna vakayawa yani sa parofisaitaka ko koya.

28O koya o qo mo kaya kina vei ira, Sa vosa vakaoqo na Turaga ko Jiova; Ena sega ni vakadedetaki tale e dua na noqu vosa, ia na vosa kaʼu sa cavuta ena vakayacori mai, sa kaya na Turaga ko Jiova.