Ai Vola I Isirieli Na Parofita 7 - AI VOLA TABU（FIJ1864）

Ena cudruvi vakaoti na vanua ko Isireli, 1-15. Ena vakabulai e so na tamata, ka laki tagici caka na nodrai valavala ca, 16-19. Ena soli na vale tabu vei ira na meca me vakacacani e na vuku ni sa vakacacataka ko ira na Isireli e na nodra matakau, 20-22. Sa vakatakarakarataki e ua sinucodo na nodra vakabobulataki vakaca na lewe ni vanua, 23-27.

1A SA yaco tale vei au na vosa i Jiova, ka vaka,

2Ia ko iko, na luve ni tamata, sa vosa vakaoqo na Turaga ko Jiova ki na vanua vaka-Isireli;

Nai otioti, sa yaco mai nai otioti ki nai yalayala e va ni vanua.

3Sa qai yaco o qo na kemui otioti, ia kaʼu na tala na noqu cudru vei iko, ka lewai iko me vaka na nomui valavala, ka sauma vei iko na nomu ka vakasisila kecega.

4Ia ena sega ni vosoti iko na mataqu, au na sega talega ni yalololoma: ni sa nomui valavala kaʼu na sauma vei iko, ia na nomu ka vakasisila sa na tu ga vei iko: ia dou na kila ni sai au ko Jiova.

5Sa vosa vakaoqo na Turaga ko Jiova: Na ca, na ca, raica, sa qai yaco vakadua mai o qo.

6Sa yaco mai nai otioti, sa yaco mai nai otioti: sa yadravi iko; raica, sa qai yaco mai.

7Sa kidaci iko mai na kena mataka, o iko sa tiko e na vanua: sa yaco mai na kena gauna, sa voleka mai na siga ni kidroa, ka sega ni yaloyalo wale ni domo ni veiulu-ni-vanua.

8Sa vo ga e lailai meʼu qai sova yani na noqu cudru vei iko, ka vakaotia yani na noqu lesa vei iko: ia kaʼu na lewai iko me vaka na nomui valavala, ka sauma vei iko na nomu ka vakasisila kecega.

9Ia ena sega ni vosovoso na mataqu, au na sega talega ni yalololoma: me vaka na nomui valavala kaʼu na sauma vei iko, ia na nomu ka vakasisila ena tu ga vei iko; ia dou na kila ni sai au ko Jiova sa ia na veiyaviti.

10Dou raica na kena siga, raica, sa yaco mai: sa lako tu yani na mataka; sa sereki mai na taba ni kau, sa kubu mai na viavialevu.

11Na veivakacacani, sa tubu cake me taba ni kau ca sara: ena sega vei ira me vo, se vei ira na nodra lewe vuqa, se vei ira na daumasa: ena sega talega na tagi yaso e na vukudra.

12Sa yaco na kena gauna, sa toro voleka mai na siga: o koya sa voli ka, me kakua ni reki; o koya sa volitaka, me kakua ni tagicaka: ni sa cudruvi kecega na kedra lewe vuqa.

13Ni sai koya sa volitaka na ka, ena sega ni lesu mai ki na ka sa volitaki, kevaka era sa bula dina tikoga: ni sa bale na raivotu o qo vei ira kecega na nodra lewe vuqa, ena sega me na lesu mai; ena sega talega e sa caka cala tiko me na vakaukauwataki koya kina.

14Era sa uvuca na davui, io me ra vakarau kecega; a sa sega e sa lako ki nai; valu: niʼu sa cudruva kecega na nodra lewe vuqa.

15Ai seleiwau, sa tu ga mai taudaku, kei na mate dauveitauvi kei na dausiga, mai vale: o koya sa tiko mai na were ena mate e nai seleiwau; o koya talega mai na koro, na dausiga kei na mate dauveitauvi ena kani koya.

16A ra na dro ko ira sa dro bula, a ra; na tiko e na veiulu-ni-vanua me vaka na ruve ni veibuca, ka dui tagi yadua e na vuku ni nonai valavala ca.

17A ligadra kece, ena wadamele; a durudra kece talega, ena vaka na wai.

18A ra na vauci ira e nai sulu taqarotu, ena nodrai tutuvi talega na domobula; e na matadra kece ena tu na madua, e na uludra kece talega na drika.

19A nodra siliva era na biuta ki na sala ni koro; kei na nodra koula ena biu ga; a nodra siliva kei na nodra koula, ena sega ni vakabulai ira rawa e na siga ni cudru i Jiova: a yalodra, ena tawa mamau kina; a ketedra talega, ena tawa vakamamautaki kina: e na vuku ni sa nodra caka cala o qo era sa tarabe kina.

20Ia na nona ka vakaiukuuku ka vakaturaga, ka vakaduria ko koya me ka lagilagi sara: ia na matakau ni nodra ka vakasisila ka velavela era sa cakava kina: o koya o qo kaʼu sa solia kina me veiyawaki kei ira:

21ia kaʼu na solia ki na ligadra na kai tani, me vakayanaki; vei ira talega na tamata ca kei vuravura, mei toki ni valu; a ra na vakacacana.

22Ia kaʼu na vagolea tani na mataqu vei ira, a ra na vakacacataka na noqu yasana tabu: ni ra na curu kina na dauvakacaca, ka vakacacana.

23Mo cakava na sinucodo: ni sa vanua o qo sa daulevu kina na veilabati; kei na koro o qo sa sinai tu e nai valavala kaukauwa.

24O koya o qo kaʼu na kauti ira kina mai era ca sara vei ira na lewe ni veivanua, a ra na taukena na nodra veivale: ia kaʼu na muduka na nodra viavialevu na kaukauwa: ena taukeni talega na nodra veiyasana tabu.

25Sa yaco mai na dauveivakarusai; a ra na ia na veisorosorovi, ka sega ga.

26Na ca ena veitaravi kei na ca; nai rogorogo talega kei nai rogorogo; era na qai taroga na raivotu vua na parofita; ia na vunau, ena yali mai vua na bete; kei na lewa, maivei irana qase.

27Ena tagi ko koya na tui, io ko koya na turaga ena vakaisulu e na rusa; a ligadra talega na lewe ni vanua, ena taqaya: me vaka na nodrai valavala, kaʼu na cakacaka vakakina vei ira; ka vaka na ka e dodonu me kedra, kaʼu na cudruvi ira vakakina; a ra na kila ni sai au ko Jiova.