Ai Vola I Isirieli Na Parofita 4 - AI VOLA TABU（FIJ1864）

Sa vakatakarakarataki na ca me yacovi Jerusalemi ni na sa buku na druadrua ni koro nai sau ni nodra vuki tani na kai Jutia maivei Jiova, 1-8, kei na levu ni nodra viakana na lewe ni koro ni sa buku na druadrua e Jerusalemi, 9-17.

1IA ko iko, na luve ni tamata, mo kauta e dua na vatu-buli, ka vakotora e matamu, ka vola kina na koro ko Jerusalemi:

2ka buku na druadrua kina, ka tara na kena valei valu, ka viria na kena suva; mo vakatikora talega na kenai valu, ka viritura na kenai tukituki-ni-bai me vakavolivolita.

3Mo kauta talega e dua na tavuteke, ka viritura me kena bai e na kemudrau maliwa kei na koro: ia mo vaqara kina na matamu, me na buku na druadrua ni koro, mo na kaba. O qo nai vakatakilakila ki na mataqali nei Isireli.

4Ia ko iko, mo bika na sarisarimu i mawi, ka vakotora kina na nodra caka cala na mataqali nei Isireli: nai wiliwili ni bogi ko sa bika tu kina, ena vakakina na nomu colata tu na nodra caka cala.

5Niʼu sa tauca vei iko na yabaki ni nodra caka cala, me vaka nai wiliwili ni bogi, e bogi tolu na drau ka ciwasagavulu: ena vakakina na nomu colata tu na nodra caka cala ua mataqali nei Isireli.

6Ia ni ko sa vakaotia o qori, mo qai bika talega na sarisarimu i matau, mo colata tu na nodra caka cala na mataqali nei Juta ka bogi vasagavulu: e dua na bogi nai sosomi ni dua na yabaki kaʼu sa dui lesia vei iko.

7Ia ki Jerusalemi mo vaqara kina na matamu me kabai, ia na ligamu me sa luvawale tu, mo qai parofisaitaka na kena ca.

8Ka, raica, kaʼu na vauci iko e na dali, mo na sega kina ni veivukiyaki rawa, ka mo vakaotia mada na bogi ni nomu buku na druadrua ni koro.

9Mo kauta talega me nomu na witi, kei na parile, kei na pini, kei na pini damu, kei na sila, kei na kumini, ka viria ki na dua na dari, ka cakava kina na kemu madrai, me vaka nai wiliwili ni bogi ko na bika tu kina na sarisarimu, me bogi tolu na drau ka ciwasagavulu mo kana tiko kina.

10Ia na kena bibi ni kemu kakana mo kania, na sikeli e ruasagavulu e na veisiga: me vakamudumudu ga na nomu kana kina.

11Ia na kenai vakarau ni wai mo gunuva, nai kaono ni wase ni ini; me vakamudumudu ga na nomu gunu kina.

12Ia nai buli madrai parile mo sa kania, me kena buka talega ko vavia kina e matadra na de ni tamata.

13A sa kaya ko Jiova, Ena vakaoqo na nodra kania na kedra madrai tawa savasava na luve i Isireli e na veivanua, kaʼu na dui vakasevi ira kina.

14Au a qai kaya, Ule, Turaga Jiova! raica, na yaloqu e sa sega ni vakadukadukalitaki: ia na ka sa mate loa, se dresulaki, kaʼu a sega ga ni kania mai na gauna kaʼu a gone kina ka yacova na siga o qo; sa sega talega ni curu ki gusuqu e dua na lewe-ni-manumanu vakasisila.

15Sa qai kaya vei au ko koya, Raica, au sa solia vei iko na de ni karavau mei sosomi ni de ni tamata, ia mo cokonaka na kemu madrai e na buka ko ya.

16A sa kaya vei au ko koya, Na luve ni tamata, raica, au na musuka nai titoko, na madrai, mai Jerusalemi: a ra na kania na madrai ni sa vakarauti, a ra na nuiqawaqawa; a ra na gunuva na medra wai ni sa vakarauti, a ra na kidacala:

17me ra dravudravua e na madrai kei na wai, ka dui veivakidacalataki, ka uru yani e navuku ni nodra caka cala.