Ai Vola I Isirieli Na Parofita 2 - AI VOLA TABU（FIJ1864）

Sa talai ko Isikieli, 1-5. Sa vakaukauwataki, 6, 7. Ai valavala ni ka sa lesi kina me parofisaitaka, 8-10.

1A SA kaya vei au ko koya, Na luve ni tamata, mo tu cake e na yavamu, kaʼu na qai vosa vei iko.

2A sa curumi au na Yalo ni sa vosa vei au ko koya, a sa vakaturi au e na yavaqu, kʼau sa qai rogoci koya sa vosa vei au.

3A sa kaya vei au ko koya, Na luve ni tamata, au sa talai iko vei ira na luve i Isireli, ki na dua na matanitu dauvuki sa vuki tani vei au: o ira kei na nodra qase era sa talaidredre vei au, ka yacova sara na siga o qo.

4Ni ra sa gone vosalevu ka yalokaukauwa. Au sa talai iko vei ira; ia mo kaya vei ira, Sa vosa vakaoqo na Turaga ko Jiova.

5Ia ko ira, se ra na vakarorogo, se ra na kakua, (ni ra sa mataqali dautalaidredre,) era na kila ga ni sa dua na parofita ka tiko kei ira.

6Ia ko iko, na luve ni tamata, mo kakua ni rerevaki ira; a nodra vosa talega kakua ni ko rerevaka, ia ka ra sa kau vakavotona ga ka soni era tiko kei iko, a ra sa batibasaga dou sa tiko kaya: ia na nodra vosa mo kakua ni rerevaka, a matadra talega kakua ni ko rerevaka, ia ka sa mataqali dautalaidredre ga.

7Ia mo tukuna ga na noqu vosa vei ira, se ra na vakararogo, se ra na kakua: ni ra sa dautalaidredre vakalevu.

8Ia ko iko, na luve ni tamata, mo rogoca na ka kaʼu sa kaya vei iko; Mo kakua ni talaidredre me vaka na mataqali dautalaidredre ko ya: mo dalaga na gusumu, ka kania na ka kaʼu sa solia vei iko.

9Ia niʼu a vakasarava, raica, sa dua na liga sa talai mai vei au; ka, raica, sa tu kina e dua nai vola vivigi;

10a sa tevuka e mataqu; a sa oti na lomana kei na dakuna e na ka sa volai: a sa volai kina na lele, kei na vutugu, kei na tagi yaso.