Ai Vola I Jeremaia Na Parofita 43 - AI VOLA TABU（FIJ1864）

O Yoanani, ni sa tawa vakadinata na parofisai i Jeremaia, sa kauti Jeremaia kei ira na tamata e so ki Ijipita, 1-7. O Jeremaia, sa parofisaitaka na ca me yacovi Ijipita maivei ira na kai Papiloni, 8-13.

1A SA yaco, ni sa vakaotia ko Jeremaia ni tukuna vei ira kece na tamata na vosa kecega i Jiova na nodra Kalou, o qori sa talai koya kina vei ira ko Jiova na nodra Kalou, io na vosa kecega o qo,

2sa qai vosa ko Asariya na luve i Osaya, kei Yoanani na luve i Karea, kei ira na tamata viavialevu kecega, a ra sa kaya vei Jeremaia, E lasu na ka ko sa vosataka: sa sega ni talai iko ko Jiova na noda Kalou me kaya, Dou kakua ni lako yani ki Ijipita me tiko vulagi kikea:

3ia ko Paruki na luve i Neriya sa kitaki iko vakaca ga vei keimami, me soli keimami ki na ligadra na kai Kalitea, me ra vakamatei keimami, ka kauti keimami ki Papiloni.

4A ra sa sega ni vakarorogo ko Yoanani na luve i Karea, kei ira kece na turaga ni valu, kei na tamata kecega, ki na domo i Jiova, me tiko ga e na vanua ko Juta.

5Ia ko Yoanani na luve i Karea, kei ira na turaga ni valu kecega, era sa kauta na kedra vo ni Juta kecega, io ko ira era sa qai lesu mai na veivanua kece, era dui vakasevi kina, me mai tiko e na vanua ko Juta;

6o ira na tagane, kei na alewa, kei na gone, kei na luvena alewa na tui, kei na tamata kecega sa vakatikora ko Nipusaretani na turaga ni valu ei vakatawa kei Kitaliya na luve i Eiikami na luve i Safani, kei Jeremaia na parofita, kei Paruki na luve i Neriya:

7a ra sa yaco ki na vanua ko Ijipita: ni ra sa tawa vakarorogo ki na domo i Jiova: a ra sa yaco mai ki Tapanesi.

8SA qai yaco na vosa i Jiova vei Jeremaia mai Tapanesi, ka vaka,

9Mo taura e ligamu e so na vatu lelevu, ka laʼki vunia e na tete e na lovo ni vatu-buli, mai nai curucuru ki na vale i Fero mai Tapanesi, e na matadra na kai Juta;

10ka kaya vei ira, Sa vosa vakaoqo ko Jiova ni lewe vuqa, na Kalou nei Isireli;

Raica, au na talaki ka kauti Nipukatiresari mai na tui Papiloni, na noqu tamata, ka tauca na nonai tikotiko vakaturaga e na dela ni vatu o qo kaʼu sa vunia; ia ena birika na nona vale malo vakaturaga e delana.

11Ia ni sa lako mai ko koya, ena yavita na vanua ko Ijipita, ka soli ira sa lesi me mate ki na mate, kei ira me vakabobulataki ki na veivakabobulataki, kei ira sa lesi ki nai seleiwau ki nai seleiwau.

12Ia kaʼu na tutuvaka na buka e na nodra bure na kalou ni Ijipita, ena vakamai ira ko koya, ka kauti ira tani: ia ena tutuvitaki koya e na vanua ko Ijipita, me vaka ni sa tutuvitaki koya nai vakatawa ni sipi e na nonai tutuvi; ena lako tani talega maikina e na vinaka.

13Ena musuka talega na matakau i na Mata-ni-siga, o ya mai na vanua ko Ijipita; ia na nodra bure kalou na kai Ijipita ena vakama e na buka ko koya.