Ai Vola I Jeremaia Na Parofita 41 - AI VOLA TABU（FIJ1864）

O Isimeeli, sa yaviti Kitaliya kei ira na tamata e lewe vuqa, a sa qai drotaki ira na tamata e so me laki tiko kei ira na luve i Amoni, 1-10. O Yoanani, sa cicimuri ira, a sa vakabulai ira tale na bobula, a sa qai lesu tani yani ki Kimami, ni sa lomana me dro ki Ijipita, 11-18.

1A SA yaco e nai kavitu ni vula, sa qai lako mai ko Isimeeli na luve i Nicaniya na luve i Ilisama, e na kawa ni tui, kei ira na kena turaga na tui, io ko ira vata na tamata e lewe tini, vei Kitaliya na luve i Eiikami ki Misipa; a ra sa kania vata maikea na madrai mai Misipa.

2Sa qai tu cake ko Isimeeli na luve i Nicaniya, kei ira na tamata e lewe tini era tiko kaya, a ra sa yaviti Kitaliya na luve i Eiikami na luve i Safani e nai seleiwau, ka vakamatei koya, sa lesia ko tui Papiloni me lewa na vanua:

3o ira kece talega na kai Jutia era tiko kei Kitaliya mai Misipa, kei ira na kai Kalitea era kune maikea, era tamatai valu, sa vakamatea ko Isimeeli.

4A sa yaco ni bogi rua ni sa vakamatei oti ko Kitaliya, ka sega na tamata e kila,

5sa qai lako mai e so mai Sikemi, kei Silo, kei Samaria, era tamata lewe walusagavulu, sa tasi na kumidra, ka kadresu na nodrai sulu, ka ra tavai, era sa taura nai cabocabo kei nai madrali boi vinaka, me kau mai ki na vale i Jiova.

6A sa lako tani yani mai Misipa ko Isimeeli na luve i Nicaniya me tavaki ira, ka sa tagi lako ga: a sa yaco, ni sa tavaki ira ko koya sa kaya vei ira, Me da mai lako yani vei Kitaliya na luve i Eiiakami.

7Ia ni ra sa yaco ki na loma ni koro, sa qai vakamatei ira ko Isimeeli na luve i Nicaniya, ka biuta ki loma ni keli, ko koya, kei ira na tamata era tiko kaya.

8A sa lewe tini na tamata ka tu vata kei ira, a ra sa kaya vei Isimeeli, Mo kakua ni vakamatei keitou: ni sa tu vei keitou e so nai yau sa vuni tu e na were, na witi, kei na parile, kei na waiwai, kei na oni. A sa cegu kina ko koya, ka sega ni vakamatei ira vata kei na wekadra.

9Ia nai keli, sa biuta kina ko Isimeeli na yagodra kece na tamata sa vakamatea ko koya, na lewe ni qali i Kitaliya, sai koya sa cakava ko Asa na tui ni sa rerevaki Pasa na tui Isireli: a sa vakasinaita ko Isimeeli na luve i Nicaniya e na moku.

10A sa vakabobulataka ko Isimeeli na kedra vo kece ni tamata mai Misipa, io ko iratou na luvena alewa na tui, kei ira kece na tamata sa vo mai Misipa, o ira sa solia ko Nipusaretani na turaga ni valu ei vakatawa vei Kitaliya na luve i Eiikami, me vakaraica: ia sa vakabobulataki ira ko Isimeeli na luve i Nicaniya, a sa laʼki lako tani yani vei ira na luve i Amoni.

11Ia ni sa rogoca ko Yoanani na luve i Karea, kei ira kece na turaga ni valu era tiko kaya, na ca kecega sa cakava ko Isimeeli na luve i Nicaniya,

12era sa qai kauti ira na tamata kecega, ka laʼki veivala kei Isimeeli na luve i Nicaniya, a ra sa kunei koya mai na wai levu mai Kipioni.

13Ia ko ira na tamata kece era tiko kei Isimeeli na luve i Nicaniya, ni ra sa raici Yoanani na luve i Karea, kei ira kece na turaga ni valu era tiko kaya, era sa qai reki.

14A ra vuki na tamata kecega sa vakabobulataka ko Isimeeli mai Misipa, ka lesu, ka lako yani vei Yoanani na luve i Karea.

15Ia ko Isimeeli na luve i Nicaniya kei ira na tamata e lewe walu, era sa dro tani maivei Yoanani, a ra sa lako vei ira na luve i Amoni.

16Ia ko Yoanani na luve i Karea, kei ira kece na turaga ni valu era tiko kaya, era sa kauta na kedra vo kece na tamata sa Vakabula ko koya maivei Isimeeli na luve i Nicaniya, mai Misipa, ni sa vakamatei Kitaliya na luve i Eiikami, io na tamatai valu era qaqa, kei ira na alewa, kei na gone, kei na matanivanua, o ira sa kauta tale mai Kipioni ko koya:

17a ra sa lako tani yani, me tiko e nai tikotiko i Kimami, mai Peci-leema, me ra laʼki curu ki Ijipita,

18e na vukudra na kai Kalitea: ni ra rerevaki ira, e na vuku i Isimeeli na luve i Nicaniya, ni sa vakamatei Kitaliya na luve i Eiikami, o koya ka lesia ko tui Papiloni me lewa na vanua.