Ai Vola I Jeremaia Na Parofita 24 - AI VOLA TABU（FIJ1864）

Sa vakatakarakarataki na kai Jutia e na lolo vinaka kei na lolo ca, 1-3. O ira sa yalododonu era na maroroi tiko me lesu tale ki na nodra vanua, 4-7; ia ko Sitikiya kei ira na tamata ca era na vakarusai ga, 8-10.

1SA vakatakila vei au ko Jiova, ka, raica, sa rua na sova lolo ka tauci e na mata ni vale tabu i Jiova, ni sa kauti ira oti tani ko Nipukatiresari na tui Papiloni, io, ko Jekonaia na luve i Jioiakimi na tui Juta, kei ira na turaga ni Juta, kei ira na matai ni kaukamea, mai Jerusalemi, ka sa kauti ira ki Papiloni.

2E dua na sova lolo sa vinaka sara, ka vaka na lolo sa dreu taumada: ia na kenai karua sa lolo ca sara, sa sega ni kani rawa e na vuku ni sa ca.

3A sa vosa vei au ko Jiova, A cava ko sa raica, Jeremaia? Au sa kaya, Na lolo, na kena lolo vinaka, sa vinaka sara; ia na kena ca, sa ca sara, ka sa sega ni kani rawa e na vuku ni sa ca.

4A sa baki yaco tale na vosa i Jiova vei au, ka vaka,

5Sa vosa vakaoqo ko Jiova na Kalou nei Isireli; Me vaka na lolo vinaka o qo, kaʼu na kilai ira vakakina na Juta era sa vakabobulataki, o ira kaʼu sa vakatala tani e na yasana o qo ki na nodra vanua na kai Kalitea me ra vinaka kina:

6niʼu na vaqara na mataqu vei ira me ra vinaka kina, ka kauti ira tale mai ki na vanua o qo: ia kaʼu na tarai ira cake, ka sega ni basuka sobu; kaʼu na tei ira, ka sega ni cavuta:

7ia kaʼu na solia vei ira na yalo me kilai au, ni sai au ko Jiova: ia era na yaco me noqu tamata, kaʼu na yaco me nodra Kalou: ni ra na lesu mai vei au e na lomadra dina.

8Ia me vaka na lolo ca, sa sega ni kani rawa e na vuku ni sa ca; sa vosa vaka dina o qo ko Jiova: Ena vakakina kaʼu na soli Sitikiya na tui Juta, kei ira na kena turaga, kei na kedra vo ni Jerusalemi, era tiko e na vanua o qo, kei ira sa tiko mai na vanua ko Ijipita:

9ia kaʼu na soli ira me ra kauti tani me ra ca kina, ki na veimatanitu kecega kei vuravura, me ra vakalialiai, ka vakaiboletaki, ka veiwalitaki ka vosavosacati e na veiyasana kecega kaʼu na dui vakasevi ira kina:

10ia kaʼu na tala nai seleiwau, kei na viakana, kei na mate dauveitauvi, vei ira, me ra oti tani mada mai na dela ni vanua kaʼu a solia vei ira kei na nodra qase.