Ai Vola I Jeremaia Na Parofita 8 - AI VOLA TABU（FIJ1864）

Na ka rarawa sa yacovi ira na kai Jutia, 1-3. Sa vunauci ira e na ruku ni ra tawa veivutuni, se madua, 4-13. Sa tukuna na nodra cudruvi, 14-17, ka sa tagicaka, 18-22.

1SA vaka ko Jiova, E na gauna ko ya era na kauta na suidra na tui Juta, kei na suidra na kena turaga, kei na suidra na bete, kei na suidra na parofita, kei na suidra na kai Jerusalemi, mai na nodrai bulubulu:

2a ra na veibiuyaka e na mata ni siga, kei na vula, kei na kalokalo ni lomalagi, o qori era sa lomana, o qori era sa qarava, o qori era sa muria, o qori era sa daulakova, o qori talega era sa sorova: ena sega ni kumuni vata tale se buluti; ena yaco ga me vaka na de-ni-manumanu e dela ni vanua.

3A ra na digitaka na mate ka besetaka na bula na vo kecega sa vakavoci e na mataqali ca o qo, o ira sa vakavoci e na veiyasana kecega kaʼu sa dui vakasevi ira kina, sa kaya ko Jiova ni lewe vuqa.

4MO kaya talega vei ira, Sa vosa vakaoqo ko Jiova; Me ra bale beka, ka sega ni tu cake tale? me lesu tani beka ko koya, ka sega ni lesu tale mai?

5A cava beka era sa qai vuki tani kina na kai Jerusalemi o qo e na vuki tawa mudu? era taura matua na ka lasu, era bese ni lesu mai.

6Au a vakatu daligaqu ka vakarorogo, ka sega ni ra vosa dodonu: sa sega na tamata e veivutunitaka na nona ca, mo kaya, A cava kaʼu sa cakava? era sa dui lesu ki na dui nonai lakolako, me vaka na ose sa rika ki nai valu.

7Io, na belo ni lomalagi sa kila na kena vula; kei na ruve, kei na belo loa, kei na lakaba, eratou sa nanuma na kedratou gauna me lako mai kina; ia na noqu tamata era sa sega ni kila na lewa i Jiova.

8Dou sa kaya vakacava, Keimami sa vuku, ia na vunau i Jiova sa tu vei keimami? Io, sa ka tawa yaga ga na nona cakava na peni ni volavola, sa nodra lasu ga na vu-ni-vola.

9Era sa madua mai na vuku, era sa taqaya ka tacori: raica, na vosa i Jiova era sa biuta; ia na vuku cava sa tu vei ira?

10E na vuku ni ka o qo kaʼu na solia na watidra vei ira na tani, kei na nodra veiwere vei ira era na taukena: ni sai ira na kaisi ka yacovi ira talega na turaga era sa daukocokoco kecega, a ra sa cakacaka vakailasu kecega na parofita ka yacovi ira talega na bete:

11a ra sa vakamavotaka na nona vue na gonealewa ni noqu tamata me vakaca, ni ra kaya, Na vakacegu, na vakacegu; ni sa sega na vakacegu.

12Se ra madua beka ni ra sa kitaka na ka vakasisila? e segai, era sa sega sara ni madua, a sa sega sara ni kila madua na matadra: o koya o qo era na bale vata kina kei ira sa bale: e na gauna kaʼu na cudruvi ira kina, era na vakabalei sobu, sa kaya ko Jiova.

13Niʼu na sa veti ira, kaʼu na veti ira sara, sa kaya ko Jiova: ena sega kina na vua ni vaini, se na vua ni lo o, ena malai talega na drauna; ia na ka kaʼu a solia vei ira ena takali tani vei ira.

14A cava eda sa tiko vakadua kina? dou soqoni vata, me da laʼki curu ki na Veikoro kaukauwa, ia me da tiko lo maikea: ni sai Jiova na noda Kalou sa vagalui keda, ka vagunuvi keda e na wai gaga, ni da sai valavala ca vei Jiova.

15Eda a namaka na vakacegu, ka sega na vinaka e yaco, kei na gauna ni bula vinaka, ka raica, sa rarawa ga!

16Sa mai Tani sa rogo maikina na kedra suru na nona ose: ni sa rogo mai na kedra suru na nona ose kaukauwa, sa sautaninini na vanua taucoko; ni ra sa lako ga mai, a ra sa kania na vanua, kei na ka kecega sa tu kina; na koro, kei ira era tiko kina.

17Raica, oi au kaʼu na tala vei kemudou na gata, na gata daukata, a ya ena sega ni vakadulai, ena kati kemudou ga, sa kaya ko Jiova.

18Niʼu sa via vakacegui au mai na ka rarawa, sa malumalumu ga na yaloqu e lomaqu.

19Raica, na domo ni nona tagi na gonealewa ni noqu tamata e na vukudra era tiko e na vanua vakayawa; sa kaya, Sa sega beka ni mai Saioni ko Jiova? sa sega beka ni tiko maikina na nona tui? A cava era sa vakacudrui au kina e na nodra matakau ceuceu, e na nodra ka lasu na kai tani?

20Sa oti yani na vula i matua, sa oti na vula i katakata, ia koi keda, eda sa sega ni vakabulai.

21E na vuku ni nona vue na gonealewa ni noqu tamata kaʼu sa vuetaki; au sa mata dravudravua mai; na kidacala, sa tauvi au.

22Sa sega beka na wai-ni-mate mai Kiliati; sa sega beka na vu-ni-wai maikea? a cava sa qai sega kina ni bula na nona vue na gonealewa ni noqu tamata?