Ai Vola I Jeremaia Na Parofita 6 - AI VOLA TABU（FIJ1864）

O ira na meca era sa talai mai me ia nai valu ki Juta e na vuku ni nodrai valavala ca na lewena, 1-8. Sa cudruvi ira na Kalou e na vuku ni nodrai valavala ca, 9-17. Sa tukuni yani na nona cudru, 18-26. Sa lesi ko Jeremaia me vakatovolei ira me vaka e dau vakatovolei na siliva, a ra sa tukuni me siliva biu, 27-30.

1DOU dro tani vata, koi kemudou na luve i Penijamini, mai na loma i Jerusalemi; ia mai Tikoa, dou uvuca na davui, ka mai Peci-akarimi, dou vakaduria na buka mei vakatakilakila: ni sa dua na ca sa rairai mai na mata ni tokalau, ia e dua na veivakarusai levu.

2Au sa vakatauvatani koya na gonealewa ni Saioni kei na dua na alewa matavinaka ka tabu siga;

3o koya eratou na lakova mai nai vakatawa kei na nodratou qele ni sipi; era na mai birika vakavolivoliti koya na nodra vale malo; era na dui kana yadua e nona tikina.

4Dou vakaraui valu vua; dou tu, me da lako cake kei na siga levu. Ule koi keda! ni sa kala na siga, ni sa balavu mai na yaloyalo ni yakavi:

5dou tu cake, me da lako kei na bogi, me da vakarusa na nona veivale vakaturaga.

6Ni sa vakaoqo na vosa i Jiova ni lewe vuqa, Dou tavakabalea na kau, ka viri suva kei Jerusalemi: o qo na koro me cudruvi; sa oti ko koya e nai valavala vakausausa e lomana.

7Mo vaka ni sa vakadavea na mata-ni-wai na kena wai, sa vakadavea vakakina ko koya na nona ca: nai valavala kaukauwa kei na veivakacacani sa daurogo kina; sa tiko ga e mataqu na mate kei na vue.

8Mo vakavulici, Jerusalemi, de tawase tani vei iko na yaloqu; deʼu cakavi iko me lala, me vanua o sega ni tawa.

9Sa vosa vakaoqo ko Jiova ni lewe vuqa, Era na vetia sara na kena vo ni Isireli me vaka na vaini: mo vakalesuya tale na ligamu ki nai sova mo vaka na dauveti vaini.

10Meʼu vosa vei cei, ka ia kina na vakatusa, me ra rogoca? raica, sa tawa cilivi na daligadra, a ra sa tawa vakarorogo rawa: raica, na vosa i Jiova sai rogo ca vei ira; era sa sega ni vinakata.

11Ia kaʼu sa sinai kina e na cudru i Jiova; kaʼu sa oca ni vosota: kaʼu na sova yani vei ira na gone o taudaku, vei ira vata kei na nodrai soqosoqo vuni na cauravou: ni na tauri vata na tagane kei na watina, na qaso kei koya sa vuqa na nona siga.

12Ia ena musu vei ira na tani na nodra vale, o qori vata kei na nodra veiwere kei na watidra: niʼu na dodoka na ligaqu vei ira na lewo ni vanua, sa kaya ko Jiova.

13Ni ra sa daukocokoco kecega na kaisi ka yacovi ira talega na turaga; a ra sa cakacaka vakailasu kecega na parofita ka yacovi ira talega na bete:

14a ra sa vakamavotaka na nona vue na gonealewa ni noqu tamata me vakaca, ni ra kaya, Na vakacegu, na vakacegu; ni sa sega na vakacegu.

15Se ra madua beka ni ra sa kitaka na ka vakasisila? e segai, era sa sega sara ni madua vakalailai, sa sega sara talega ni kila madua na matadra: o koya o qo era na bale vata kina kei ira sa bale: e na gauna kaʼu na cudruvi ira kina era na vakabalei sobu, sa kaya ko Jiova.

16Sa vosa vakaoqo ko Jiova, Dou tu e na sala, ka vakararai, ka taroga nai lakolako makawa, se evei na sala vinaka, ia dou lako ga kina, dou na qai kunea kina na vakacegu ni yalomudou. A ra sa kaya, Keimami na sega ni lakova.

17Au a lesia talega e so me nomudoui vakatawa, ka kaya, Dou vakarorogo ki na domo ni davui. A ra sa kaya, Keimami na sega ni vakarorogo.

18O koya o qo dou rogoca kina, na lewe ni veivanua, ka kila, koi kemudou nai vavakoso, na ka sa tu vei ira.

19Rogoca, vuravura: raica, kaʼu na vakayacora na ca vei ira na tamata o qo, io na vua ni nodra nanuma, e na vuku ni ra sa sega ni rogoca na noqu vosa, se na noqu vunau; era sa biuta ga.

20A cava na betena ni sa kau mai vei au na ka boi vinaka mai Sipa, kei na kalamo vinaka mai na vanua vakayawa? a nomudoui soro kama sa sega ni donu, kei na nomudoui madrali sa sega ni kamikamica vei au.

21O koya sa vosa vakaoqo kina ko Jiova, Raica, kaʼu na tauca vei ira na tamata o qo na ka me ra toqi kina, a ra na bale vata kina na qase kei na luvedra; na tamata kei na wekana erau na rusa.

22Sa vosa vakaoqo ko Jiova, Raica, e dua na mataqali sa lako mai na vanua mai na tokalau, ia e dua na matanitu levu ena vakaturi mai nai yalayala kei vuravura:

23a dakai kei na moto era na lukuta; era sa yalokaukauwa, ka tawa kila loloma; a domodra ena vadugu me vaka na Wasawasa; i era sa vodo tu e na ose, ka lautuva me vaka na tamata me ia nai valu vei iko, na gonealewa ni Saioni.

24Keitou sa rogoca na kenai rogorogo: sa malumalumu mai na liga i keitou: a rarawa sa tauvi keitou, kei na yaluma me vaka na alewa sa taratara.

25Kakua ni ko lako yani ki na were, ia na gau-ni-sala mo kakua ni lakova; e na vuku ni seleiwau ni meca kei na rere sa tu o na veiyasana.

26O iko, na gonealewa ni noqu tamata, vauci iko o nai sulu taqarotu, ka qiqi o na dravusa: mo ia na tagi, me vaka e dua sa tagicaka na luvena e dua bau ga, na tagi rarawa sara: ni na vakidacala na nona lako mai na dauvakacaca vei keda.

27Au sa lesi iko mo vale-cecere e na kedra maliwa na noqu tamata, mo vale kaukauwa, mo kila ka vakatovolea kina na nodrai valavala:

28o ira kecega era sa dauvuki yalovakatani, era sa dauia na vosa veivakacacani: era sa parasa ka aironi; o ira kecega era sa dauvakacaca:

29sa kama nai iri ni buka, a sa oti e na buka na uma; sa tawa yaga na nona ia na vakariri na dauvakarai siliva: ni sa sega ni takivi tani na tamata ca:

30era na vakatokai me siliva biu, e na vuku ni sa biuti ira ko Jiova.