Ai Vola I Jeremaia Na Parofita 4 - AI VOLA TABU（FIJ1864）

A Kalou, sa kacivi ira na Isireli me veivutuni, me ra vinaka kina, 1, 2. Sa vakaroti ira na Juta me veivutuni, ni sa kolai yacovi ira na ca levu, 3-18. Sa tagicaki na nodra ka rarawa na Juta, 19-31.

1KEVAKA ko na lesu mai, Isireli, sa kaya ko Jiova, mo lesu mai vei au: ia kevaka ko na biuta tani na nomu ka vakasisila e mataqu, o na qai sega ni lako tani:

2ia ko na ia na vosavavakini, Sa bula ko Jiova, ka ia e na lomadina, kei na yalododonu, kei na cakacaka dodonu; ia era na vosavakalougatataki ira e na vukuna ko ira na lewe ni veimatanitu, o koya talega era na vakacaucautaka.

3Ni sa vosa vakaoqo ko Jiova vei ira na kai Juta kei Jerusalemi, Dou taura na nomudou qalau, ia dou kakua ni kaburaka na sila ki na veiwa-votovotoa.

4Dou cilivi kemudou me nei Jiova, ka kauta tani na vuso ni yalomudou, oi kemudou na kai Juta kei na lewe ni Jerusalemi: de lako yani me vaka na buka na noqu cudru, ka waqa me sega e dua e bokoca, e na vuku ni kena ca ni nomudoui valavala.

5Dou tukuna mai Juta, ka vakarogotaka mai Jerusalemi; ka kaya, Dou uvuca na davui e na vanua: dou kaci yani, dou soqoni vata, ka kaya, Dou soqoni vata mai, me da laʼki curuma na veikoro kaukauwa.

6Dou vakaduria na rogele kivakaki Saioni: dou dro, kakua ni berabera: ni sa ka ca kaʼu na vakayacora mai na tokalau, ia na veivakarusai levu.

7Sa lako cake mai na laioni mai na nona veikau, ia ko koya sa dauvakacacana na veimatanitu sa lako tu mai; sa lako cake mai na nona yasana me vakalalataka na nomu vanua; na nomu veikoro ena vakalalataki, me sega e tiko kina.

8E na vuku ni ka o qo dou vauca vei kemudou nai sulu taqarotu, dou tagi i ka qoqolou: ni sa sega ni saumaki tani na cudru waqawaqa i Jiova vei keda.

9Ia ena yaco e na siga ko ya, sa kaya ko Jiova, ena waicala na yalona na tui, kei na yalodra na turaga; a ra na kidacala ko ira na bete, ia na parofita era na kidroa.

10Au a qai kaya, Ule, Turaga Jiova! e dina ko sa vakacalai ira vakalevu na tamata o qo, kei Jerusalemi, ni ko a kaya, Dou na tiko vakacegu; ia ka sa lau ki na vu ni yalo nai seleiwau.

11E na gauna ko ya ena tukuni vei ira na tamata o qo, kei Jerusalemi, E dua na cagi todra sa liwa mai na veitikina cecere ni veikau, kivakaki na gonealewa ni noqu tamata, ka sega me iriva na sila, se vakasavasavataka,

12io sa dua na cagi kaukauwa mai na veiyasana ko ya, ena lako mai vei au: ia koi au talega kaʼu na qai ia na vosa veilewai vei ira.

13Raica, ena lako mai ko koya me vaka na o, ka vaka na covulaca na nona vale-vodoki: sa totolo na nona ose ka bera na ikeli. Ule koi keda! ni da sa vakarusai.

14Mo vuya tani na ca mai na lomamu, Jerusalemi, mo bula kina. A cava na kena dede me na tiko e lomamu na nanuma tawa yaga?

15Ni sa dua mai na domo sa tukutuku mai Tani, a sa vakarogotaka na ka rarawa mai na ulu-ni-vanua ko Ifireimi.

16Dou vakananumi ira na veimatanitu; raica, vakarogotaka ki Jerusalemi, ni ra sa lako mai nai valui vakatawa mai na vanua vakayawa, a ra na ia na veibolebolei ki na veikoro vaka-Juta.

17Me vakataki ira nai vakatawa ni were, era na viribaiti koya vakakina; e na vuku ni sa vuki tani vei au, sa kaya ko Jiova.

18A nomui valavala kei na nomu cakacaka sa vakayacora na ka o qo vei iko; na ka o qo na nomu caka ca ga, ni sa gaga, ni sa lau sara ki na vu ni yalomu.

19Na ketequ, na ketequ! sa sautaribariba na vu ni lomaqu; sa kudrukudru na yaloqu e lomaqu; au sa sega ni galu rawa, ni ko sa rogoca, yaloqu, na domo ni davui, na kaila ni valu.

20Na veivakarusai e tarava na veivakarusai sa kacivaki; ni sa vakacacani na vanua taucoko: sa vakasauri na kedra vakacacani na noqu vale malo, ka vakidacala na noqu gatu.

21A cava na kena dede meʼu raica tiko na drotini, ka rogoca tiko na domo ni davui?

22Ni ra sa lialia na noqu tamata, era sa sega ni kilai au, era sa gone sesewa, a sa sega na vuku vei ira: era sa vuku ni valavala ca, ia me caka vinaka sa sega na nodra vuku kina.

23Au a raici vuravura, ka, raica, sa sega ni vakarautaki, a sa lala tu, kei na lomalagi, a sa sega na kena rarama.

24Au a raica na veiulu-ni-vanua, ka, raica, sa sautaninini, a sa yavavala vakamamada na veiulu-ni-koro kecega.

25Au a vakararai, ka, raica, sa sega na tamata, a sa dro na manumanu ni lomalagi kecega.

26Au a vakararai, ka, raica, sa lekutu na veiwere bulabula, ia na kena veikoro kecega sa basuki sobu mai na mata i Jiova, mai na mata ni nona cudru waqawaqa.

27Ni sa vakaoqo na vosa i Jiova, Ena lala na vanua taucoko; ia kaʼu na sega ni vakaotia sara.

28E na vuku ni ka o qo ena tagi kina ko vuravura, ka loaloa mai na lomalagi ecake: niʼu sa vosataka, niʼu a nakita, niʼu na sega ni veivutunitaka, niʼu na sega talega ni suka tani maikina.

29E na vuku ni domodra era vodo e na ose kei ira era vakadakai ena dro kina na koro taucoko; era na lako ki loma ni veikau, ka kaba cake ki na vatu: ena biu na veikoro kecega, ena sega ni tiko kina e dua na tamata.

30Ia ni ko sa vakacacani, a cava mo qai cakava? Kevaka ko sa vakaisulutaki iko e na ka damudamu, kevaka ko sa vakaiukuukutaki iko e nai uku koula, kevaka ko sa qumuta na matamu me kaca sara, ena sega ga ni yaga na nomu vakama-tavinakataki iko; era na beci iko ga na nomui tau, era na qarai iko me ra vakamatea.

31Ni sa vaka na domo ni alewa sa taratara kaʼu sa rogoca, ka vaka na yaluma i koya sa vakasucuma na nona ulumatua, na domona na gonealewa ni Saioni, ni sa tagicaki koya vakai koya, ni sa dodoka na ligana, ka kaya, Ule koi au o qo! ni sa oca na yaloqu e na vukudra na daulaba!